Ke kꞌoj e oc tuꞌn David
8
Te tibajxi jlu o cub cyiꞌj aj Filistey tuꞌn David, e cyaj ten tjakꞌ tcawbil ex el tiꞌn ju tnam Meteg-ama tuj cykꞌab. 2 Ax icx cub cyiꞌj aj Moab tuꞌn, o tbincha tuꞌn cycub paleꞌ tuj txolin twitz txꞌotxꞌ ex e baj techan tuꞌn jun cyꞌjaj: Akeju e cyaj ten cyuj keju cabe echbin cye, atzun keju cub cysentens tuꞌn cycyim, atzun keju e cyaj ten tuj juntl echbin cye, atzun ke e cyaj ankꞌin. Cyjaꞌtzun e cyaj ten ke aj Moab tjakꞌ tcawbil David ex o chjet chojenj cyuꞌn.3 Ax icx cub tiꞌj Hadad-ezer tuꞌn David tej chꞌixtok ttzyet tcawin juntl maj tibaj ju txꞌotxꞌ at ttzi nima Éufrates. Ate Hadad-ezer tcyꞌajal Rehob ex reytok tuj txꞌotxꞌ Soba. 4 Cyxol ke xjal lu, e tzyet tuꞌn David jun mil tucꞌ wuk syent soldad cyjax cyibaj chej, ex winkin mil cucx tuꞌn cykan in che bet; ax icx baj ttokan cykan cycyakil ke chej cabay, akeju jawolte carwaj in che ajben tuj kꞌoj, pero e cyaj tcloꞌn txkan chej tuꞌn cyajben te jawol jun syent carwaj.
5 Jurattzun e tzaj naj ke aj Siria, akeju ateꞌ tuj tnam Damasco, tuꞌn cyonin tucꞌil Hadad-ezer aju rey tuj Soba, pero cub cyiꞌj aj Siria tuꞌn David, ex e cub tbyoꞌn 22,000 soldad aj Siria. 6 E cubtzun tkꞌoꞌn David junjun cꞌloj soldad te xkꞌukil tuj txꞌotxꞌ Siria te Damasco, ex atzun cye aj Siria e cyaj ten tjakꞌ tcawbil ex chjet ju chojenj cyuꞌn. Cyjaꞌtzun, tuꞌn Kman o camban David nok jaꞌx jatum oc t-xiꞌ kꞌojlel.
7 Ex el tiꞌn David ke makbil kꞌan pwak cytxꞌotxꞌil in che ajbentok cyuꞌn ke xjal maꞌ cyoclen ateꞌ ttxlaj Hadad-ezer, ex e jeꞌx tiꞌn tuꞌn cypon tuj Jerusalén. 8 Ax icx tzaj tiꞌn rey David nimcu kꞌan cꞌuxbil tuj tnam Beta ex tuj tnam Berotai, akeju tnam lu ateꞌtok tuj tcwent Hadad-ezer.
9 Tej tbinte Toi aju rey tuj tnam Hamat, ka otok cub cyiꞌj cycyakil t-soldad Hadad-ezer tuꞌn David, 10 xi t-samaꞌn ju tcyꞌajal Joram tbi, cyucꞌix ke macbil sak pwak, kꞌan pwak ex kꞌan cꞌuxbil, tuꞌn t-xi tkꞌolbeꞌn ex tuꞌn t-xi tkꞌoꞌn chjonte te rey David tuꞌnju otok kꞌojin tucꞌil Hadad-ezer ex otok cub tiꞌj tuꞌn, porque ax icx te Toi attok kꞌoj cyxol tucꞌil Hadad-ezer. 11 Atzunte David xi tkꞌoꞌn tcyakil macbil lu te Kman, junx tucꞌil sak pwak ex kꞌan pwak otok tzꞌel tpaꞌn tuꞌn tajben te Kman, aju otok tzaj tiꞌn cyuj cycyakil nasyon otok che cyaj ten tjakꞌ tcawbil, ex atzun ke jlu: 12 Edom, Moab, Amón, Filistey ex Amalec, ex tucꞌixju otok tzꞌel tiꞌn tuj kꞌoj oc tuꞌn tucꞌil Hadad-ezer aju tcyꞌajal Rehob ex rey te Soba.
13 Ate David el lakꞌeꞌ tkanil tiꞌj. Ex tej taj meltzꞌaj, tcublenxi cyiꞌj ke aj Siria tuꞌn, e cub tbyoꞌn 18,000 aj Edom tuj lugar toc tbi Chkꞌajlaj te Atzꞌan. 14 Ex e cub tkꞌoꞌn junjun cꞌloj soldad te xkꞌukil tuj Edom, ex cycyakil aj Edom e cyaj ten tjakꞌ tcawbil David, tuꞌnju a Kman o onin te tuꞌn tcamban nok jaꞌx jatum oc t-xiꞌ.
Ke xjal maꞌ cyoclen ateꞌ ttxlaj David
15 O cawin David cyibaj cycyakil aj Israel; o tbincha tcyakil tuj tumelxix ex tuj ttxolil cyucꞌil cycyakil ke t-xjalil. 16 Aju nejenel cye t-soldad, atzun Joab aju tal Sarvia; ex atzunte Josafat aju tcyꞌajal Ahilud, atzunju aj tzꞌibal te rey. 17 Atzunte Sadoc aju tcyꞌajal Ahitob, tucꞌix Ahimelec aju tcyꞌajal Abiatar, pal ke jlu. Atzunte Seraías aj tzꞌibal. 18 Atzunte Benaía aju tcyꞌajal Joiada, atzunju toc te nejenel cyxol aj Ceretey ex aj Peletey. Ex atzun ke tcyꞌajal David, atzun keju mas maꞌ cyoclen ateꞌ ttxlaj.