2 Attok jun cymajen ke tcꞌwaꞌl Saúl, Siba tbi, tzaj cytxcoꞌn tuꞌn tul tucꞌil David. Tejtzun tul Siba, xi tkanin rey David te:

—¿Apeya Siba?

—Lu kine lu te ajbel teya Tat Rey, chi Siba.

3 Atzunte rey xi tkanin te:

—¿Atxpe jun tiyjil Saúl tuꞌn nbinchanteye xtalbil te ic tzaꞌn xi ntziyane twitz Dios?

Atzunte Siba xi ttzakꞌweꞌn:

—At jun tcꞌwaꞌl ktzan Jonatán, cox cycabil tkan. 4 —¿Jatum taꞌ? Chi rey.

—Max taꞌ tuj tnam Lodebar, tuj tja Maquir aju tcyꞌajal Amiel, chi Siba.

5 Atzunte rey David xi tmaꞌn tuꞌn ttzaj kꞌiꞌn. 6 Tejtzun tul Mefi-boset aju tcyꞌajal Jonatán ex tal tchman Saúl twitz David, cub mocꞌeꞌ te jun techal te nimbil.

—Mefi-boset, chi David.

—Lu kine lu ajbel teya, Tat Rey, chi Mefi-boset.

7 Xitzun tmaꞌn David:

—Miꞌn xoba, porque oc nbinchaye baꞌn teya tuꞌn ncꞌujlalile tiꞌj ktzan tmana Jonatán. Tcyakilju ttxꞌotxꞌ ktzan tchmana cyjel ten te teya ex ax cwaꞌla tiꞌj nmese.

8 Atzunte Mefi-boset cub mucꞌeꞌ ex tma:

—¿Tikuꞌn ma chin tzaj tnaꞌna Tat Rey, akine tmajena? Porque tuj nwitze ic ntene ic tzaꞌn jun cyimni txꞌyan.

9 Tzajtzun ttxcoꞌn rey ju xinak Siba tbi, aju ojtxi tmajen Saúl, ex xi tmaꞌn te:

—Ma txi nkꞌoꞌne tuj tkꞌab Mefi-boset, aju tal tchman ktzan tpatrona, tcyakilju etzan tuꞌn nej, cyucꞌix keju etzantok cyuꞌn ke tcꞌwaꞌl. 10 Cyjaꞌtzun, aya cyucꞌix ke tcꞌwaꞌla ex ke tmajena che akꞌnale tiꞌj ttxꞌotxꞌ; ex cjawil tcꞌuꞌna tcyakil twitz awal, tuꞌntzun cycꞌaꞌchet ke tiyjil tpatrona; atzunte Mefi-boset aju tal tchman Saúl, ax cwaꞌl wucꞌile tiꞌj nmese, chi David.

Atzunte Siba attok olaj tcyꞌajal ex winkin tmajen. 11 Xi ttzakꞌweꞌn Siba te rey:

—Tcyakilju ma tzaj tmaꞌna weye Tat Rey cbantel wuꞌne akine tmajena.

Cyjaꞌtzun, ate Mefi-boset ax o waꞌn tiꞌj tmes David ic tzaꞌn jun tcꞌwaꞌl rey. 12 Ax icx attok jun tal tcꞌwaꞌl Mefi-boset, tal chꞌintok, Micaía tbi; ex cycyakil keju ateꞌ tuj tja Siba in che ajben te Mefi-boset. 13 Ate Mefi-boset coxtok cycabil tkan, ex atzun najl tuj Jerusalén porque axtok in waꞌn tucꞌil rey tiꞌj tmes.