Cub cyiꞌj aj Siria ex aj Amón tuꞌn David
10
Tbajlenxi jlu cyim Nahas aju rey cye aj Amón, ex aju cyaj ten te t-xel tuꞌn tcawin, atzun Hanún aju tcyꞌajal. 2 Cubtzun t-ximan David tuꞌn tbinchante xtalbil tiꞌj Hanún aju tcyꞌajal Nahas, ic tzaꞌnxju xtalbil otok tbincha ktzan tman Hanún tiꞌj David, ex e jeꞌx t-samaꞌn junjun xjal at cyoclen ttxlaj tuꞌn t-xi cykꞌukbaꞌn tcꞌuꞌj Hanún tiꞌj tcyimlen ktzan tman. Tejtzun cypon ke xjal at cyoclen ttxlaj David tuj cytxꞌotxꞌ aj Amón, 3 ke nejenel cye aj Amón xi cymaꞌn te Hanún aju cawil cyibaj: ¿Chipetzuna tat rey ka ma che tzaj t-samaꞌn David ke xinak lu kꞌukbal tcꞌuꞌja ex tuꞌn tjaw tnimsaꞌn tbi ktzan tmana? ¿Myapetzun ma che tzaj t-samaꞌn ke xinak lu queꞌyilte alcye tumel tuꞌn cyoctz tuj tnam ex tuꞌn tcub cyxitun?4 Xitzun tkꞌoꞌn Hanún jun orden tuꞌn cyocx presin ke xjal at cyoclen ttxlaj David, ex tuꞌn tel matzet mij cyxmatz, ex tuꞌn tel kesit mij cyxbalun tuꞌn tjapun max twi cyẍoꞌp, ex te tibajxi e ajtz tlajoꞌn. 5 Tejtzun tbinte David jlu, xi tmaꞌn tuꞌn cyxi canabaj ke, porque nimxix cychꞌixwi otok tzaj, ex tuꞌn t-xi kꞌmaꞌn cye tuꞌn cycyaj ten tuj tnam Jericó ocxi tchꞌiy cyxmatz, ex maxitzun tuꞌn cypon meltzꞌaj.
6 Eltzun cynicꞌ aj Amón tiꞌj ka otok cybincha jun icꞌbilxix twitz David; tuꞌn jlu tzaj cyiꞌn winkin mil soldad aj Siria tuj tnam Bet-rehob ex tuj Soba, tzaj cyiꞌn jun mil xinak tucꞌil rey te tnam Maaca ex cablaj mil tuj tnam Is-tob, ex xi cychjoꞌn twi cycꞌuꞌj. 7 Tejtzun tbinte David jlu, xi samaꞌn Joab tuꞌn, cyucꞌix cycyakil ke t-soldad. 8 E etztzun aj Amón ex baj cytxolban cyib tuꞌn tbant cyten tuj kꞌoj ax ttzi tpwertil tnam, ex atzun ke soldad aj Siria te tnam Soba ex Rehob, cyucꞌix ke soldad te tnam Is-tob ex Maaca, atzun e cub ten tuj cojbil. 9 Tej tqueꞌyinte Joab cyjaꞌtok cyoc tzokpaj aj kꞌoj tiꞌj, at cyjaꞌ cytzaj twitz ex at cyjaꞌ cyxiꞌ ttzal tiꞌj, e jaw t-scꞌoꞌn ke soldad aj Israel mas tbanilxix ex bant cyten tuꞌn cyoc tzokpaj cyiꞌj aj Siria. 10 Atzun ke mastl soldad e cyaj tkꞌoꞌn tuj tcwent Abisai aju terman, tuꞌn cykꞌojin cyucꞌil aj Amón, 11 ex xi tmaꞌn te cyjaꞌ: Ka ma cub wiꞌje cyuꞌn aj Siria, bixtzun tzaja onil weye, ex katzun ma cub tiꞌja cyuꞌn aj Amón, jacutzun chin pone onil teya. 12 Cyuwx tcꞌuꞌja ex kkꞌoꞌnc kipun tuꞌn cyclet kxjalil ex tuꞌn cyclet ke tnam etzan tuꞌn Dios. Ex bant-xwit tuꞌn Kman aju baꞌn tuj twitz.
13 Xiꞌtzun Joab cyucꞌix ke t-soldad tuꞌn cyoc tzokpaj cyiꞌj aj Siria, pero e jeꞌl ok aj Siria twitz. 14 Ex tej cyqueꞌyinte ke aj Amón otok che el ok ke aj Siria, ax icx cye e jeꞌl ok twitz Abisai, ex ocx cyclon cyib tuj tnam. Entons mintiꞌtl oc tzokpaj Joab cyiꞌj aj Amón ex aj meltzꞌaj tuj Jerusalén.
15 Tejtzun tel cynicꞌ aj Siria tiꞌj ka otok cub cyiꞌj cyuꞌn aj Israel, oc cychmon cyib juntl maj. 16 Ex xi tmaꞌn Hadad-ezer tuꞌn cyxi kꞌibaj ke aj Siria ateꞌ jlajxi nima Éufrates, e pontzun ke tuj tnam Helam. Aju nejenel cye t-soldad Hadad-ezer, atzun Sobac. 17 Pero o pon tkanil jlu tucꞌil David, ex octzun tchmoꞌn cycyakil aj Israel, icꞌxtzun tuj nima Jordán ex pon tuj tnam Helam. Ex tej cyqueꞌyinte aj Siria cyjaꞌ ttzaj David, bant cyten tuꞌn cyoc ten kꞌojlel tiꞌj, 18 pero te tibajxi e jeꞌl ok cywitz aj Israel, ex cub tbyoꞌn David 40 mil soldad cyjax cyibaj chej ex cyucꞌix wuk syent soldad cyocx cyuj carwaj in che ajben tuj kꞌoj; ax icx cub tbyoꞌn David aju xjal Sobac tbi. Aju nejenel cye cysoldad aj Siria axtzun cyim ma chixin. 19 Tejtzun cyqueꞌyinte cycyakil ke rey cymojbantok cyib tucꞌil Hadad-ezer ka otok cub cyiꞌj cyuꞌn aj Israel, bant tiꞌj jun cyyol cyucꞌil aj Israel tuꞌn miꞌn cykꞌojintl ex e cyaj ten tjakꞌ cycawbil. Biꞌxtzun oc t-xobil cyiꞌj aj Siria tuꞌn cyonin cyiꞌj aj Amón.