Cub cyiꞌj aj Siria ex aj Amón tuꞌn David
19
Te tibajxi jlu cyim Nahas aju rey cye aj Amón, ex aju cyaj ten te cawil te t-xel, ax tcyꞌajal. 2 Ex tma David cyjaꞌ: Cxel nyecꞌune ncꞌujlalile te Hanún aju tcyꞌajal ktzan Nahas, porque aju ktzan tman o ten baꞌn wucꞌile, chi David. Xitzun t-samaꞌn junjun xjal at cyoclen ttxlaj tuꞌn cyxiꞌ kꞌukbalte tcꞌuꞌj Hanún tuꞌnju otok cyim tman, pero tej cypon ke xjal at cyoclen ttxlaj David tuj cytxꞌotxꞌ aj Amón, 3 xi cymaꞌn ke nejenel cye aj Amón te Hanún cyjaꞌ: ¿Chipetzuna tat rey ka kꞌukbal tcꞌuꞌja ma che tzaj t-samaꞌn David ke xinak lu ex ka tuꞌn ttzaj naꞌt ktzan tmana? ¿Myapetzun ma che ul ke xjal lu tucꞌila nok queꞌyilte alcye tumel tuꞌn cyoctz tuj tnam ex tuꞌn tcub cyxitun? Che chi nejenel.4 Atzunte Hanún xi tmaꞌn tuꞌn cytzaj tzyuꞌn ke xjal at cyoclen ttxlaj David ex tuꞌn tel matzoꞌn cyxmaltziꞌ, ax icx tuꞌn tel kesit mij cyxbalun tuꞌn tjapun max twi cyxix. Te tibajxi jlu e ajtz t-samaꞌn. 5 Tejtzun tpon tkanil tucꞌil David tiꞌj ju otok baj cyiꞌj ke xinak lu, xi tmaꞌn tuꞌn cyxi canábaj, porque otok tzaj nim cychꞌixwi, ex tuꞌn t-xi kꞌmaꞌn cye tuꞌn cycyaj ten max tuj Jericó, maxi tuꞌn cyajtz ocxi tchꞌiy cyxmaltziꞌ.
6 Eltzun cynicꞌ aj Amón tiꞌj ka otok tzaj tkꞌoj David cyiꞌj, cyjaꞌtzun ate Hanún ex ke aj Amón xi cysamaꞌn wuk syent tucꞌil 40 quintal sak pwak cye aj Mesopotamia, cye aj Siria, cye aj Maaca ex cye aj Soba, te twi cycꞌuꞌj carwaj tuꞌn cyajben tuj kꞌoj, ex te twi cycꞌuꞌj soldad in che bet cyibaj chej, tuꞌntzun cytzaj onil cye aj Amón. 7 Banttzun tiꞌj tuꞌn cytzaj 32 mil carwaj in che ajben tuj kꞌoj, ax icx aju rey tuj Maaca cyucꞌix ke t-soldad. Ake jlu cub cychmon cyib twitz tnam Medeba. Ax icx ke aj Amón e jeꞌtz tuj cytanmi ex oc cychmon cyib tuꞌntzun ttzyet kꞌoj cyuꞌn. 8 Pero o tbi David jlu, cyjaꞌtzun xi t-samaꞌn David Joab cyucꞌix cycyakil soldad. 9 E jeꞌtztzun ke aj Amón, ex baj cytxolban cyib tuꞌn tbant cyten tuj kꞌoj nikayin ttzi tpwertil tnam, atzun ke rey otok che tzaj tuj mastl tnam max e cyaj ten tuj cojbil. 10 Tejtzun tqueꞌyinte Joab cyjaꞌtok cyoc tzokpaj ke aj kꞌoj cyiꞌj, at cyjaꞌ cytzaj cywitz, ex at cyjaꞌ cytzaj cyiꞌjxi, e jawtzun t-scꞌoꞌn ke soldad mas at cynabl tuꞌn cykꞌojin cyxol aj Israel, bajtzun cybinchan cyib tuꞌn cyoc tzokpaj cyiꞌj aj Siria. 11 Atzun ke mastl soldad e jeꞌx tkꞌoꞌn tuj tcwent Abisai aju terman, tuꞌn cyoc tzokpaj cyiꞌj aj Amón. 12 Xitzun tmaꞌn Joab te Abisai: Ka ma cub wiꞌje cyuꞌn aj Siria, bix txiꞌya onil wucꞌile, ex katzun ma cub tiꞌja cyuꞌn aj Amón, jacu chinxe onil tucꞌila. 13 Cyuwx tcꞌuꞌja ex kkꞌonc kipun tuꞌn tclet ktanmi ex tuꞌn cyclet tnam xjal etzan tuꞌn Dios. Ex bant-xwit tuꞌn Kman aju baꞌn tuj twitz.
14 Xiꞌtzun Joab cyucꞌix ke t-soldad tuꞌn cyoc tzokpaj cyiꞌj aj Siria, atzun cye aj Siria e jeꞌl ok cywitz. 15 Tejtzun cylonte aj Amón ka otok che el ok ke aj Siria, ax icx cye e el ok twitz Abisai aju terman Joab, ex axtzun e ocx ok tuj tnam. Atzunte Joab aj meltzꞌaj tuꞌn tpon tuj Jerusalén.
16 Tejtzun cylonte aj Siria ka otok cub cyiꞌj cyuꞌn aj Israel, xitzun cysamaꞌn ke sanjel tuꞌn cyxi kꞌibaj ke aj Siria, akeju ateꞌ jlajxi nima Éufrates, ex aju nejenel cye, atzun Sofac aju nejenel cye t-soldad Hadad-ezer. 17 Pon tkanil jlu tucꞌil David; cyjaꞌtzun e oc tchmoꞌn cycyakil aj Israel, e jicꞌxtzun tuj nima Jordán ex e pon jatum ateꞌ ke aj Siria, bajtzun ttxolbaꞌn David ke t-soldad tuꞌn toc kꞌoj cyuꞌn, ex tzyettzun kꞌoj cyuꞌn aj Siria cyiꞌj aj Israel. 18 Pero e el ok aj Siria cywitz aj Israel, ex cub tbyoꞌn David wuk mil xinak aj Siria ateꞌjx cyuj carwaj in che ajben tuj kꞌoj, ex 40 mil soldad in che bet tuꞌn cykan; ax icx cub tbyoꞌn David Sofac aju nejenel cye soldad aj Siria. 19 Tej cylonte ke xjal ucꞌin tuꞌn Hadad-ezer ka otok cub cyiꞌj cyuꞌn aj Israel, bant tiꞌj jun cyyol tucꞌil David ex e cyaj ten tjakꞌ tcawbil. Atxixtzun tuj kꞌij lu, mintiꞌtl o cyajbe aj Siria tuꞌn cyonin cyucꞌil aj Amón.