Cub tiꞌj tnam Rabá tuꞌn David
20
Tejtzun tel jun abkꞌi, tuj tkꞌijlalil oc in che etz ke rey kꞌojlel ic tzaꞌnx cycostumr, xiꞌ Joab cyucꞌix nimcu soldad tucꞌil, ex cub cyxitun ke cytanmi aj Amón, ex baj cytxolban cyib ke t-soldad tiꞌj tnam Rabá, oc tzokpaj tiꞌj ex biꞌx baj t-xitun tcyakil. Atzunte David ax otok cyaj ten tuj Jerusalén. 2 Tejtzun tpon David, el tiꞌn aju coron tjax tuj twiꞌ ju rey cye aj Rabá. Aju coron lu kꞌan pwak ex toctok ke tal abj tbanil tiꞌj; aju talil 75 libr, ex jaxtzun cykꞌoꞌn tuj twiꞌ David. Ax icx etz tiꞌn David nimcu macbil tbanilxix ex wiꞌyilxix tuj tnam lu, 3 cyucꞌix ke xjal otok che cyaj ankꞌin tuj tnam, ex e oc tkꞌoꞌn akꞌnal cyiꞌj sier, cyiꞌj cꞌuxbil tuꞌn tel ttxcꞌomil triw, ex cyiꞌj ke siꞌwbil cꞌuxbil. Iclex o tbincha David cyiꞌj cycyakil tnam cye aj Amón. Te tibajxi ajtz meltzꞌaj tuꞌn tul tuj Jerusalén cyucꞌix cycyakil ke t-soldad.E cub byoꞌn ke xjal maꞌ cywaꞌl cyuꞌn t-soldad David
4 Te tibajxi jlu oc juntl kꞌoj cyucꞌil aj Filistey tuj tnam Gezer. Atzun cub byoꞌn Sipai tuꞌn Sibecai aju aj Husa. Atzun elni tiyjil Sipai tiꞌj cyiyjil ke xjal maꞌ cywaꞌl; cyjaꞌtzun tten cub cyiꞌj aj Filistey. 5 Ex tuj juntl kꞌoj oc cyucꞌil aj Filistey, cub byoꞌn ju xjal Lahmi tuꞌn Elhanán aju tcyꞌajal Jair; ate Lahmi terman Goliat aju aj Gat, ex aju tlans kꞌiꞌn, matij tkan ex maꞌ tcꞌitz.
6 Oc juntl kꞌoj tuj tnam Gat. Attok jun xinak maꞌ twaꞌl, kakchak tal tkꞌab tiꞌj junjun tkꞌab, ex kakchak tal tkan tiꞌj junjun tkan, 24 tuꞌn tcyakil. Ax elni tiyjil tiꞌj cyiyjil ke xjal maꞌ cywaꞌl. 7 Ate xinak lu oc ten icꞌlelte cye aj Israel, pero cub byoꞌn tuꞌn Jonatán aju tcyꞌajal Simea, aju terman David. 8 Akeju xjal maꞌ cywaꞌl lu, tiyjil Refa ke, aju aj Gat, pero e cub byoꞌn tuꞌn David ex cyuꞌn ke t-soldad.