—Tuj jun tnam attok cabe xinak, jun kꞌinuntok, atzun juntl meba. 2 Aju kꞌinun, nim ke t-ẍneꞌl ateꞌ ex nim twacẍ, 3 atzunte meba, nok junx tal t-ẍneꞌl at, aju otok tzꞌel tlakꞌoꞌn. Tuꞌnx o chꞌiy, ex aju tal ẍneꞌl ax o chꞌiy tja ex cyxol ke tcꞌwaꞌl, ax in waꞌn tiꞌj twa tajwil, ex ax in cꞌan tujx tcꞌabl ex in cub tan ttzi t-xuꞌc. Ate xjal lu at-xix tgan tiꞌj, mer ic tzaꞌn jun tmeꞌjel. 4 At jun kꞌij pon jun betin xjal visitaril te kꞌinun; ex ate kꞌinun mintiꞌ tajbe tuꞌn tcub tbyoꞌn jun tal t-ẍneꞌl ex ka twacẍ tuꞌn t-xi tkꞌoꞌn te tchiꞌ ju xjal otok pon visitaril te, nok oꞌcx el tiꞌn tal t-ẍneꞌl ju xjal meba, ex baj tbinchaꞌn te tchiꞌ ju xjal otok pon visitaril te, chi Natán te David.

5 Atzunte David tzaj nimxix tkꞌoj tiꞌj ju kꞌinun lu, ex xi tmaꞌn te Natán:

—Cxel nmaꞌne teya jun nyole axix toc twitz Kman; aju xjal ma bant tuꞌn icju, baꞌn tuꞌn tcyim, 6 ex il tiꞌj tuꞌn t-xi tchjoꞌn cyaje maj tal ẍneꞌl te tajwil, tuꞌnju ma tbincha icju ex mintiꞌ ma tzaj kꞌakꞌan tcꞌuꞌj tiꞌj tal meba xjal.

7 Atzunte Natán xi ttzakꞌweꞌn:

—Aya aju xjal lu. Ex atzun jlu ma tzaj tmaꞌn Kman teya, aju Kdios aj Israel koꞌ: Akine in jaw scꞌonte teya tuꞌn toca te rey cye aj Israel, ex ma cleta wuꞌne tuj tkꞌab Saúl; 8 ma txi nkꞌoꞌne tja tpatrona teya cyucꞌix ke t-xuꞌjil, ax icx ma che cyaj aj Israel ex aj Judá tjakꞌ tcawbila. Nokwit nicꞌxi jlu, mawtlo txi ntzꞌaksaꞌne mastl teya. 9 ¿Tikuꞌn ma tzꞌel ticꞌuna nyole ex ma bant tuꞌna aju mya baꞌn nneꞌla tuj nwitze? Ma cub tbyoꞌna Urías aju aj Hetey, ex ma che ajben aj Amón tuꞌna tuꞌn tcub byoꞌn, ex ma jaw tiꞌna t-xuꞌjil. 10 Cyjaꞌtzun tuꞌn spad che bel byoꞌn junjun tcyꞌajala, tuꞌnju ma chin el ticꞌuna, ex tuꞌnju ma jaw tiꞌna t-xuꞌjil Urías aju aj Hetey tuꞌn toc te t-xuꞌjila. 11 Akine Dios clarxix in xi nmaꞌne jlu: Aju mya baꞌn tzul wiꞌne tiꞌja, ax cyuꞌn ke tcꞌwaꞌla cbantel; twitzxa che elel wiꞌne ke t-xuꞌjila ex che xel nkꞌoꞌne te juntl, ex mya tuj ewaj cbel tan cyucꞌil; nok oꞌcx kꞌijtl ex tuj kꞌanchaꞌl. 12 Tuj ewaj ma bant jlu tuꞌna, atzun weye cywitz cycyakil aj Israel cbantel wuꞌne, kꞌijtl ex tuj kꞌanchaꞌl.

13 Xitzun tmaꞌn David te Natán:

—Ma chin binchane il twitz Kman.

Atzunte Natán xi ttzakꞌweꞌn:

—Ma najset tila tuꞌn Kman; mlay cyima. 14 Pero tuꞌnju ma tbinchaya jlu, ke aj kꞌoj tiꞌj Kman ma che oc ten yolil mya baꞌn tiꞌj, cyjaꞌtzun cymel aju tcꞌwaꞌla cyꞌitzke tzul itzꞌj. 15 Tejtzun taj Natán tja, o tbincha Kman tuꞌn tyabt tal neꞌ cyuwxix wen, aju tcyꞌajal David otok tzul itzꞌj tiꞌj t-xuꞌjilben ktzan Urías. 16 Atzunte David oc ten naꞌl Dios tiꞌj tal neꞌ, ex mintiꞌ o waꞌn, ex junjun akꞌbil tuꞌn in tan twitz txꞌotxꞌ tuj tja. 17 Ke cytijil xjal ateꞌ tuj tja rey cucx in che pon kꞌmalte tuꞌn tjaw weꞌ twitz txꞌotxꞌ, pero mintiꞌ o tajbe, icx mintiꞌ o waꞌn cyucꞌil.

18 Tbajlenxitzun wuk kꞌij cyim tal neꞌ, atzun ke aj sanjelal te David nim e xob tuꞌn t-xi cymaꞌn te, porque in che ximantok tiꞌj cyjaꞌ: Tej itzꞌxtok tal neꞌ, oc in koꞌx yolin te David mintiꞌ in ko tzaj tbiꞌn; ¿tzaꞌntzun tten tuꞌn t-xi kmaꞌn jaꞌlo ka ate neꞌ ma cyim? Jaculo tcꞌixbisa tib tuꞌn tbis, che chi.

19 Pero tej tlonte David in che yolintok aj sanjelal cyxolx, el tnicꞌ tiꞌj ka otok cyim tal neꞌ; cyjaꞌtzun xi tkanin cye:

—¿Maj ma cyim tal tal neꞌ?

—Ma cyim, che chi xi cytzakꞌweꞌn.

20 Jawtzun weꞌ David twitz txꞌotxꞌ, oc ten chil ex oc tkꞌoꞌn perjum tiꞌj, baj tchꞌexpuꞌn t-xbalun ex ocxtzun tuj tja Dios tuꞌn tcꞌulun te Kman. Te tibajxi xiꞌ tja ex xi tkanin twa ex oc ten waꞌl. 21 Ex ke xjal at cyoclen ttxlaj xi cykanin te:

—¿Ti in baj teya Tat Rey? Tej itzꞌxtok tal neꞌ, o cub tyoꞌna weꞌyaj ex o tzꞌokꞌa tiꞌj; atzun jaꞌlo tej ma cyim, ma jaw weꞌya ex ma tzꞌoc tena waꞌl.

22 Atzunte David xi ttzakꞌweꞌn:

—Tej itzꞌxtok tal neꞌ, ma cub nyoꞌne weꞌyaj ex ma chin okꞌe tiꞌj, ximan wuꞌne ka tuꞌn jlu jacu tzaj kꞌakꞌan tcꞌuꞌj Kman wiꞌje ex tuꞌn tankꞌin tal neꞌ. 23 Atzun jaꞌlo ma cyim, ¿tikuꞌntzun cbel nyoꞌne weꞌyaj? ¿Jacupetzun tzul tnabl juntl maj wuꞌne? Akine chin pol tucꞌil, atzun te mlay tzul meltzꞌaj tuꞌn tten wucꞌile, chi David.

24 Te tibajxi jlu oc ten David kꞌukbalte tcꞌuꞌj Betsabé aju t-xuꞌjil. Pon tucꞌil ex cub tan tucꞌil. Ultzun itzꞌj jun tal t-xuꞌjil, ex Salomón tbi oc tkꞌoꞌn David. O tcꞌujla Kman aju cꞌwaꞌl lu, 25 ex pon tkanil te David tuꞌn Natán aju t-sanjel Dios ka cꞌujlaꞌn ju cꞌwaꞌl lu tuꞌn Kman, cyjaꞌtzun oc tkꞌoꞌn juntl tbi tal cꞌwaꞌl Jededías, ic tzaꞌnx otok tma Kman.

26 Oc tzokpaj Joab tiꞌj tnam Rabá aju tnam maꞌxix toclen cye aj Amón, ex tej chꞌixtok ttzyet tuꞌn, 27 xi t-samaꞌn tkanil lu tucꞌil David ex chi cyjaꞌ: Ma chin oc tzokpaje tiꞌj tnam Rabá ex ma che tzyet ke cywi aꞌ wuꞌne. 28 Cyjaꞌtzun, chmon baja txkantl soldad jaꞌlo, ex toc tzokpaja tiꞌj tnam ex tzyuma, tuꞌntzun mya akine chin tzyulte te ex tuꞌn miꞌn toc nbiye tiꞌj.

29 Octzun tchmon David cycyakil t-soldad, ex xiꞌtzun tuꞌn tkꞌojin tiꞌj tnam Rabá, oc tzokpaj tiꞌj ex o tzyet tuꞌn. 30 Te tibajxi el tiꞌn David tcoron ju rey tjax tuj twiꞌ, aju kꞌan pwak ttxꞌotxꞌil, cyocsaꞌn ke tal abj tbanilxix tiꞌj, 72 libr talil, ex jax cykꞌoꞌn tuj twiꞌ David. Ax icx etz tiꞌn David nimcu tiꞌxti wiꞌyilxix tuj tnam. 31 Ex e etz tiꞌn ke xjal ateꞌ tuj tnam ex e oc tkꞌoꞌn te akꞌnal tiꞌj sier, tiꞌj pyoch ex tiꞌj siꞌwbil cꞌuxbil, ex e oc tkꞌoꞌn te akꞌnal tiꞌj jorni te lagriy. Iclex o tbincha cyuj cycyakil tnam cye aj Amón, ex te tibajxi ajtz meltzꞌaj cyucꞌix cycyakil t-soldad tuꞌn cyul tuj Jerusalén.