—Aya tcyꞌajal rey, ¿ti in baj tiꞌja? ¿Tikuꞌn teyle junjun kꞌij nok cyjaꞌ toc tiꞌja? ¿Maj miꞌn tzaj tmaꞌna weye?

Atzunte Amnón xi ttzakꞌweꞌn:

—At nim nganiye tiꞌj Tamar aju tanb wermaniye Absalón.

5 Octzun ten Jonadab consejaril te ex tma:

—Tancuya tuj tcoẍbila ex yabin cub tiba. Ex octzun tpon tmana queꞌyil teya, kꞌmanxa te cyjaꞌ: Binchama xtalbil samantza wanbe Tamar tuꞌn ttzaj tkꞌoꞌn nwaye, ex nwitzxe tuꞌn tbaj tbinchaꞌn chibj tuꞌntzun t-xi nchyoꞌne oc twile aju ctzajel tkꞌoꞌn weye, chicuya te.

6 Cubtzun tan Amnón twi watbil ex cub tyabsin tib. Ex tej t-xiꞌ rey queꞌyilte te, xi tmaꞌn Amnón te:

—Binchama xtalbil, e ttzaj wanbe Tamar tuꞌn tcub tbinchaꞌn cabe wabj ax tzalu, ex ax ctzajel kꞌonte weye. 7 Xitzun t-samaꞌn David jun xjal max tja Tamar kꞌmalte te:

—Binchama xtalbil, txiꞌya tja termaniya Amnón ex binchama chꞌin twa.

8 Xiꞌtzun Tamar tja Amnón aju t-xiban, ex coẍltok Amnón twi twatbil. Tzajtzun tiꞌn Tamar chꞌin arin ex baj t-xyokꞌin, ex axtzun ma chixin oc ten binchalte wabj ex e baj ttzkꞌajsaꞌn; 9 tzaj tiꞌn aju cꞌuxbil jatum in tzkꞌaj pan ex xi tkꞌoꞌn wabj te, pero mintiꞌ xi twaꞌn Amnón, ex xi tmaꞌn tuꞌn cyex cycyakil keju ateꞌtok tuja. 10 Tejtzun cyetz baj cycyakil, xitzun tmaꞌn Amnón te Tamar:

—Kꞌintza wabj max tuj ncwarte ex axa ctzajel kꞌonte weye.

Tzajtzun tiꞌn Tamar wabj aju otok bant tuꞌn, ex xitzun tiꞌn max tuj tcwart Amnón aju t-xiban. 11 Tejtzun tpon lakꞌeꞌ Tamar tuꞌn t-xi tkꞌoꞌn twa, tzajtzun ttzyuꞌn Amnón tanb ex xi tmaꞌn te:

—Aya wanbe tzaja, tancuya wucꞌile.

12 Atzunte Tamar xi ttzakꞌweꞌn:

—Miꞌn nxiban, miꞌn tzꞌoc tkꞌoꞌna il wiꞌje tuꞌn ncub tane tucꞌila, porque mintiꞌ in binchanjtz jlu cyxol aj Israel. Miꞌn tbinchaya aju mya baꞌn lu. 13 ¿Jatum chin xeꞌle oc tcub nchꞌixwiye? Ex atzun teya cꞌoquela cyxol aj Israel ic tzaꞌn jun xjal mintiꞌ tnabl. In chin cubsane twitza tuꞌn t-xiꞌya yolil tucꞌil rey, ex mlay cub t-xcꞌayin tuꞌn ntzaj kꞌoꞌne teya.

14 Atzunte Amnón mintiꞌ xi tniman, ex tuꞌnju mas nim tipun twitz Tamar, cyjaꞌtzun oc ten ipalte ex cub tan tucꞌil. 15 Te tibajxi jlu oc ten Amnón icꞌul tiꞌj tucꞌil jun icꞌbil nimxix, aju icꞌbil lu mas maꞌxix twitzju tcꞌujlalil attok tiꞌj nej. Cyjaꞌtzun xi tmaꞌn te cyjaꞌ:

—Weꞌctza ex texa.

16 Xitzun ttzakꞌweꞌn Tamar:

—Miꞌn nxiban, porque ka ma chin ex tlajoꞌna jaꞌlo, a jlu jun mya baꞌn mas maꞌ t-xilen twitz aju ma tbinchaya wiꞌje.

Atzunte Amnón mintiꞌ xi tbiꞌn; 17 nok oꞌcx tzaj ttxcoꞌn ju tmajen ex xi tmaꞌn te:

—Kꞌiꞌmexa xuꞌj lu, ex lamoꞌmexa tlamel ja wen.

18 Extzun tiꞌn majen aju xuꞌj tuj ja, ex etztzun tlamoꞌn tlamel ja wen. Atzunte Tamar tocsaꞌntok t-xbalun tbanilxix, aju xbalun in ajben cyuꞌn ke cymeꞌjel rey oc naꞌnxtok cymojeꞌ, 19 jax tkꞌoꞌn tzaꞌj tuj twiꞌ, el t-sbitꞌun t-xbalun tocsaꞌn tiꞌj, ex jax tkꞌoꞌn tkꞌab tuj twiꞌ ajtzun in okꞌ tuj be. 20 Xitzun tmaꞌn Absalón te, aju t-xiban:

—¿Maj atzun Amnón aju t-xibana ma binchante jlu tiꞌja? Cucxju wanb, miꞌn kꞌajta, porque termaniya jlu. Miꞌn tzaj nim tbisa tuꞌn jlu.

Axtzun cyaj ten Tamar tja Absalón aju t-xiban, in bisun wen. 21 Tejtzun tbinte rey David tcyakilju otok baj, tzaj nimxix tkꞌoj. 22 Ax icx te Absalón mintiꞌ jun yol xi tmaꞌn te Amnón ka baꞌn ex ka mya baꞌn, masque in icꞌuntok tiꞌj tuꞌnju otok cub tkꞌoꞌn tchꞌixwi Tamar aju tanb.

23 Tbajlenxi cab abkꞌi, ke tmajen Absalón in che matzontok cytzmal ẍneꞌl tuj lugar Baal-hazor tbi, nikayin ttxlaj tnam Efraín, ex e tzaj ttxcon Absalón cycyakil ke tcyꞌajal rey tuꞌn cywaꞌn tucꞌil. 24 Ax icx xiꞌ tucꞌil rey, ex xi tmaꞌn te:

—Tat Rey, jaꞌlo ke xinak ateꞌ wucꞌile in che matzon cytzmal ke nẍneꞌle. Akine tmajena wajbile tuꞌn tpona wucꞌile cyucꞌix ke xjal at cyoclen ttxlaja.

25 Atzunte rey xi ttzakꞌweꞌn:

—Miꞌn ncyꞌajal, mlay koꞌxe kcyakile tuꞌntzun mya nim tuꞌn tbaj tnajsaꞌna.

Ex masque oc tkꞌoꞌn Absalón il tiꞌj tuꞌn t-xiꞌ, pero ate rey mintiꞌ xiꞌ, nok oꞌcx cub tcyꞌiwlaꞌn. 26 Xitzun tmaꞌn Absalón:

—Katzun mlay txiꞌya, pero kꞌontza ambil tuꞌn t-xiꞌ Amnón wucꞌile, aju wermaniye.

—¿Tikuꞌntzun tajbila tuꞌn t-xiꞌ Amnón tucꞌila? Chi rey xi tkanin.

27 Pero oc tkꞌoꞌn Absalón il tiꞌj, ex cyjaꞌtzun xi tkꞌoꞌn rey ambil tuꞌn t-xiꞌ Amnón tucꞌil, cyucꞌix txkantl tcyꞌajal.

28 Ex otok txi tmaꞌn Amnón cye ke tmajen cyjaꞌ:

—Bix tzꞌoc cykꞌoꞌne cwent tiꞌj oc tchyoꞌn twiꞌ Amnón tuꞌn vin, ex oc t-xi nmaꞌne cyeye tuꞌn tcub cybyoꞌne, bixtzun cub cybyoꞌne. Miꞌn che xobe tuꞌn cybinchanteye jlu, porque wuꞌne ju orden lu. Cyjaꞌtzun cyuwx cycꞌuꞌje ex tenx cyipune.

29 Cyjaꞌtzun o japun cyuꞌn ke tmajen Absalón aju orden xi tkꞌoꞌn cye, cub byoꞌn Amnón cyuꞌn. Cycyakiltzun ke tcyꞌajal rey e jaw weꞌ, e jax tibaj cychej mul ex e jeꞌl ok.

30 Tej ateꞌxtok tuj cybe, pon tkanil tucꞌil David ka otok che cub byoꞌn cycyakil ke tcyꞌajal tuꞌn Absalón, ex ka mi jun cye otok cyaj ankꞌin. 31 Jawtzun weꞌ rey, el t-sbitꞌun t-xbalun tiꞌj te jun yecꞌbil tiꞌj tbis, ex cub t-xoꞌn tib twitz txꞌotxꞌ. Ax icx cycyakil ke xjal ateꞌtok tucꞌil, akeju at cyoclen ttxlaj, el cysbitꞌun cyxbalun cyiꞌj; 32 pero xi tmaꞌn Jonadab aju tcyꞌajal Simea, aju terman David cyjaꞌ:

—Tat Rey, miꞌn ximana tiꞌj ka ma che cub byoꞌn cycyakil ke tcyꞌajala. Oꞌcx te Amnón ma cub byoꞌn, porque atzun jlu ximamaj tuꞌn Absalón atxix tuj kꞌij tej tcub t-xoꞌn Amnón Tamar aju tanb. 33 Cyjaꞌtzun Tat Rey, miꞌn ximana tiꞌj ka cycyakil tcyꞌajala ma che cyim. Oꞌcx te Amnón ma cyim.

34 Atzunte Absalón otok tzꞌel ok. At jun cuꞌxun tocsaꞌntok te xkꞌukil o til txkan xjal cyjaꞌ cycuꞌtz tuj tbeyil tnam Horonaim, xiꞌtzun kꞌmalte te rey ka otok til txkan xjal cyjaꞌ cycuꞌtz tuj tbeyil tnam Horonaim. 35 Ex xi tmaꞌn Jonadab te rey:

—Queꞌyinxa Tat Rey, lu ke tcyꞌajala che ul ic tzaꞌnx xi nmaꞌne, akine ajbel teya.

36 Matok in baj yolin Jonadab tej cypon ke tcyꞌajal rey, ex e oc ten okꞌel tucꞌil tkꞌajkꞌajel cywiꞌ cyuwxix. Ax icx te rey cyucꞌix cycyakil xjal at cyoclen ttxlaj nimxix o che okꞌ. 37-38 Atzunte Absalón otok tzꞌel ok, ex xiꞌ tucꞌil Talmai, aju tcyꞌajal Amiud ex rey tuj tnam Gesur, ex axtzun cyaj ten ox abkꞌi ma chixin. Atzunte David in okꞌtok tcyakil kꞌij tiꞌj tcyimlen Amnón aju tcyꞌajal, 39 pero tej t-xi tcolin tuꞌn tbisun tiꞌj tcamic Amnón, tzajtzun nimxix tgan tuꞌn tqueꞌyinte twitz Absalón.