David ex aju xuꞌj Betsabé
11
Tuj coresma te juntl abkꞌi, tuj tkꞌijlalil oc in che ex ke rey tuj kꞌoj, xi t-samaꞌn David Joab cyucꞌix cycyakil keju at cyoclen ttxlaj, cyucꞌix cycyakil ke soldad aj Israel, ex e cub ke aj Amón cyuꞌn, ax icx baj cytxolban cyib tiꞌj tnam Rabá. Atzunte David ax cyaj ten tuj Jerusalén.2 At jun kale jaw weꞌ David tuj tcoẍbil, ex tej in bet ticꞌ twi tja tzaj tqueꞌyin lu jun xuꞌj tbanilxix queꞌyin matok in chin. 3 Xi t-samaꞌn David jun sanjel tuꞌn tbinte alcye ju xuꞌj lu, ex ultzun kꞌmaꞌn te ka ate Betsabé, aju tmeꞌjel Eliam ex t-xuꞌjil Urías aju aj Hetey. 4 Xitzun t-samaꞌn David junjun sanjel kꞌilte ju xuꞌj. Ultzun kꞌiꞌn tucꞌil, ex cub tan David tucꞌil, te tibajxi aj meltzꞌaj xuꞌj tja. Ate xuꞌj lu matok tbajlen ttxꞌjon tib tiꞌj ẍwoꞌj in cꞌuꞌl tiꞌj.
5 Biꞌx oc ten tal xuꞌj, ex xi t-samaꞌn tkanil tiꞌj jlu tucꞌil David. 6 Atzunte David xi t-samaꞌn jun xjal kꞌmalte te Joab tuꞌn tajtz samaꞌn Urías tuꞌn, aju aj Hetey, ex tbinchatzun Joab icju. 7 Tejtzun tpon Urías twitz David, xi tkanin te tzaꞌntok taꞌ Joab ex ke soldad, ex alcye tkanil tiꞌj kꞌoj. 8 Te tibajxi xi t-samaꞌn tuꞌn t-xiꞌ tja ex tuꞌn tbaj ttxꞌjoꞌn tiꞌj tkan.
Tejtzun tetz Urías tuj tja rey, xi t-samaꞌn rey jun wabj tbanilxix te Urías, ic tzaꞌn jun oyaj te. 9 Atzunte Urías ax ex akꞌbil tuꞌn ttzi tpwertil tja rey, junx cyucꞌil ke soldad in che xkꞌukin tja rey, ex mintiꞌ xiꞌ tja. 10 Tejtzun tbinte David ka mintiꞌ otok txiꞌ Urías tja, xi tkanin te:
—¿Tikuꞌn mintiꞌ xiꞌya tjaya tul-lenxiya tuj tbeya?
11 Atzunte Urías xi ttzakꞌweꞌn:
—Tzaꞌnx ju cax cꞌubl tley Dios ex ke soldad cye aj Israel ex aj Judá, atzun in che tan cyuj tal ja t-xak tzeꞌyin cywiꞌ, ax icx te Joab aju nejenel weye ex ke sanjelal teya Tat Rey, ax in che cub tan tuj cojbil; ¿maj chin oquextzune tuj njaye tuꞌn nwaꞌne ex tuꞌn ncꞌane ex tuꞌn ncub tane tucꞌil nxuꞌjile? Aya Tat Rey, mlayx bant jlu wuꞌne.
12 Atzunte David xi tmaꞌn te:
—Tencja jaꞌlo ex nchiꞌjxitzun txiꞌya.
Cyjaꞌtzun cyaj ten Urías tuj Jerusalén tuj juntl kꞌij. 13 Xitzun txcoꞌn tuꞌn David tuꞌn twaꞌn ex tuꞌn tcꞌan vin junx tucꞌil, max tejxi tchyoꞌn twiꞌ tuꞌn. Ya te konicꞌan etz Urías ex xiꞌ tal cyucꞌil ke soldad xkꞌukil tja rey, ex mintiꞌx xiꞌ tja.
14 Te prim tuj juntl kꞌij cub ttzꞌiban David jun uꞌj tuꞌn t-xi t-samaꞌn te Joab; ex ax tiꞌj Urías xi t-samaꞌn ju uꞌj. 15 Chitzun in tmaꞌn tuj uꞌj cyjaꞌ: Cykꞌoꞌnque Urías tuj tnejel txol jatum mas cyuw taꞌ kꞌoj, ex cycolincje tjunal tuꞌntzun tcꞌixbi ex tuꞌn tcyim.
16 Cyjaꞌtzun tten, tej tbaj cytxolban cyib Joab tiꞌjele tnam tuꞌn cykꞌojin, xi tmaꞌn Joab te Urías tuꞌn tcub ten tuj lugar jatum baꞌntok tuꞌn jatum ateꞌ ke soldad aj kꞌoj mas cyuw che kꞌojin. 17 E jeꞌtztzun ke soldad cwentil tnam kꞌojlel tiꞌj Joab, ex e cub junjun cyxol ke t-soldad David cyuꞌn, ex tucꞌix Urías cyim, aju aj Hetey.
18 Xitzun t-samaꞌn Joab jun tkanil cabalxix tiꞌj kꞌoj tucꞌil David, 19 ex xi tmaꞌn te sanjel cyjaꞌ: Oc tbaj ttxꞌolbaꞌna tcyakil tkanil tiꞌj kꞌoj te rey, 20 katzun ma jaw kꞌojl rey ex ka ma tzaj tkanin teya: ¿Tikuꞌn ẍe pon lakꞌeꞌye kꞌojlel tiꞌj tnam? Baka mintiꞌ baꞌn cyuꞌne ke xjal lu in cuꞌtz cyxoꞌn jun tiꞌxti max twi muro, 21 ic tzaꞌn o baj tuj tnam Tebes tej tcub byoꞌn Abimelec aju tcyꞌajal Jerobaal tuꞌn jun xuꞌj cuꞌtz t-xoꞌn jun cyaꞌ max twi muro ex tuꞌntzunju cyim. ¿Tikuꞌntzun ẍe pon lakꞌeꞌye ttxlaj muro? ka chi, atzun teya txi tmaꞌna te: Ax icx ma cyim Urías aju aj Hetey ex nejenel cyxol t-soldadiya, chicuya.
22 Xiꞌtzun ju sanjel, ex tej tpon xi ttxꞌolbaꞌn te David tcyakilju otok txi tmaꞌn Joab te.
23 Ax icx xi tmaꞌn sanjel te David:
—Ke soldad ẍe etz kꞌojlel kiꞌje tuj chkꞌajlaj, ex cyjaꞌtok tcub kiꞌje cyuꞌn, pero tuꞌnju cyuw oc kꞌoj cyiꞌj kuꞌne, cyjaꞌtzun e aj meltzꞌaj tuꞌn cyocx ttzi tpwertil tnam. 24 Cyjaꞌtzun max twi muro saj cyxoꞌn ke cyplech kiꞌje akoꞌye t-soldadiye Tat Rey, ex ma che cyim junjun nejenel cyxol ke soldad, ex tucꞌix Urías aju aj Hetey ma cyim.
25 Atzunte David xi ttzakꞌweꞌn te sanjel:
—Kꞌmanxa te Joab tuꞌn miꞌn ttzaj tbis tuꞌn jlu, porque tcyakil jlu atzun in baj tuj kꞌoj. Nok oꞌcx tuꞌn tkꞌojin tiꞌj tnam tucꞌil mas tipun max oc tcub tiꞌj tuꞌn. Atzun teya cyuwsanxa tcꞌuꞌj.