—Cyxiꞌye ex cyiꞌn jawe cyajlal aj Israel, tzajx keꞌ cyuꞌne tuj Beerseba ex tuꞌn tpon baj max tuj Dan, ex cyiꞌntztzune tajlal wucꞌile tuꞌntzun nbinteye jteꞌ xjal at.

3 Atzunte Joab xi ttzakꞌweꞌn:

—Tuꞌnwt Kman chmet cyajlal ke xjal etzan tuꞌn, chmet-xwit jun syent maj ic tzaꞌn at jaꞌlo. ¿Myapetzun cycyakil xjal lu tmajena, Tat Rey? ¿Titzun tajben jlu teya, Tat Rey? ¿Ex tikuꞌn in tzaj tiꞌna jun mya baꞌn cyibaj aj Israel? Chi Joab. 4 Masque icju, pero ate rey oc tkꞌoꞌn il tiꞌj tuꞌn tbinchet jlu, cyjaꞌtzun xiꞌ Joab, baj tbetin tuj tcyakil cytxꞌotxꞌ aj Israel ex ultzun meltzꞌaj tuj Jerusalén. 5 Xi tkꞌoꞌn Joab tajlal tucꞌil David, ex japun jun cyajlal aj Israel te jun miyón ex jun syent mil xinak at cynabl tuj kꞌoj, ex cyaje syent tucꞌil 70 mil xjal tuj Judá at cynabl tuꞌn cykꞌojin. 6 Ex cyxol ke jlu mintiꞌ jaw cyajlal ke tiyjil Leví, ax icx ke tiyjil Benjamín, porque mya baꞌn eꞌla tuj twitz Joab aju yol tzaj tmaꞌn rey.

7 Ax icx te Dios mya baꞌn eꞌla tcyakil jlu tuj twitz, cyjaꞌtzun tzaj tkꞌoꞌn jun castiw cyibaj aj Israel. 8 Xitzun tmaꞌn David te Dios:

—Ma nbinchaye jun il maꞌxix tuꞌnju ma nbinchaye jlu. Pero jaꞌlo in chin cubsane twitza Nman, tuꞌn tcub tnajsana wile akine tmajena, porque ma nbinchaye jlu ic tzaꞌn jun xjal mintiꞌ tnabl, chi David.

9 Tzajtzun tmaꞌn Kman te Gad aju t-sanjel in ajben ttxlaj David: 10 Txiꞌya tucꞌil David ex kꞌmanxa te: Ox castiw cbel nkꞌoꞌne twitza, scꞌoꞌn jawa jun cyxol alcye tuꞌn nbinchanteye tiꞌja, chi Kman, ma tzaj tmaꞌn weye, chicuya te David. 11 Xiꞌtzun Gad tucꞌil David ex xi tmaꞌn te:

—Chitzun Kman ma tma cyjaꞌ: 12 Scꞌoꞌn jawa jun cyxol oxe jlu: Ox abkꞌi weꞌyaj, ex ka ox xjaw tuꞌn tcub cyiꞌje cyuꞌn aj kꞌoj cyiꞌje ex tuꞌn cycub byoꞌne tuꞌn cyspad, ex ka ox kꞌij tuꞌn ttzaj txꞌuꞌj yabil tuꞌn t-spad Kman tuj cytanmiye oc ttzaj t-anjel byol cye xjal tuj tcyakil cytxꞌotxꞌ aj Israel. Ximana tiꞌj alcye ctzajel ttzakꞌweꞌna, tuꞌntzun t-xi nmaꞌne teju ma tzaj samante weye, chi Gad.

13 Xi ttzakꞌweꞌn David te Gad:

—Atine tuj jun nintz bis, pero jaꞌlo maslo baꞌn tuꞌn tcub ncastiwoye tuꞌn Kman, porque aju t-xtalbil Kman nimxix, ex mya tuꞌn ncub tzꞌake tuj cykꞌab xjal.

14 Tzajtzun t-samaꞌn Kman txꞌuꞌj yabil cyibaj aj Israel ex biꞌx e cyim 70 mil xjal. 15 Ex tzaj t-samaꞌn Dios jun anjel tuꞌn cycyim ke xjal ateꞌ tuj tnam Jerusalén. Pero tej otok tzyet tuꞌn cycyim, tzaj tqueꞌyin Kman ex tzaj nim tbis tiꞌj ju mya baꞌn otok bant, xitzun tmayoꞌn Kman aju anjel in byontok cye xjal, chi cyjaꞌ: Acux jlu, miꞌn cub tbyoꞌna mastl xjal, chi Dios te anjel.

Tujxtzun or lu, tcubsaꞌntok t-anjel Kman ttxlaj lugar jatum nneꞌl bujet ttxcꞌomil triw tuꞌn Ornán aju aj Jebusey. 16 Jawtzun tqueꞌyin David twitz cyaꞌj ex o til jun t-anjel Kman waꞌl twitz cyaꞌj, tucꞌix jun spad tocx tuj tkꞌab, otok jatz tiꞌn tuj tjayil ex xi tyecꞌun tibaj tnam Jerusalén. Atzunte David cyucꞌix ke tij xjal ateꞌ ttxlaj toctok cyxbalun chꞌiꞌx twitz, e cub ẍmejeꞌ tejxi tpon tacl tibaj cywitz twitz txꞌotxꞌ, 17 ex xitzun tmaꞌn David te Dios:

—Wuꞌne xi nmaꞌne tuꞌn tjaw cyajlal xjal. Akine ma chin binchan il ex ma nbinchaye mya baꞌn, pero ke xjal lu mintiꞌ jun mya baꞌn ma cybincha. Aya Nman Dios, in chin cubsane twitza, kꞌoncuya castiw lu wibaje ex cyibaj keju ateꞌ tuj njaye, ex miꞌn tzaj tkꞌoꞌna txꞌuꞌj yabil cyibaj ke xjal etzan tuꞌna.

18 Xitzun tmaꞌn t-anjel Kman te Gad cyjaꞌ: Kꞌmanxa te David tuꞌn tjaw tbinchaꞌn jun altar te Kman tuj lugar jatum nneꞌl ttxcꞌomil triw tuꞌn Ornán aju aj Jebusey. 19 Xiꞌtzun David binchalte aju otok tzaj tmaꞌn Gad te, ic tzaꞌnx otok tzaj tmaꞌn Kman. 20 Nneꞌltok ttxcꞌomil triw tuꞌn Ornán, ex tej tajtz tqueꞌyin, o til aju anjel; atzun keju cyaje tcyꞌajal ateꞌtok tucꞌil xi cyewan cyib. 21 Tejtzun tpon lakꞌeꞌ David jatum taꞌ Ornán, o ilwaj David tuꞌn, etztzun tuj lugar jatum nneꞌl ttxcꞌomil triw tuꞌn, cub ẍmejeꞌ twitz David ex pon tacl tibaj twitz max twitz txꞌotxꞌ. 22 Xitzun tmaꞌn David te Ornán:

—Kꞌontza te weye aju lugar jatum nneꞌl ttxcꞌomil triw tuꞌna, tuꞌn tjaw nbinchaꞌne jun altar te Kman tuj, tuꞌntzun tmayet txꞌuꞌj yabil cyiꞌj tnam xjal, ex cꞌayintza te weye ic tzaꞌnx twiꞌ cabal.

23 Xi ttzakꞌweꞌn Ornán te David:

—Kꞌinxa, aya Tat Rey, ex binchama alcye baꞌn tuj twitza, jacu cheꞌx nkꞌoꞌne ke tor tuꞌn tcub tpatuna te oyaj, ex atzun ke tzeꞌ in che ajben tuꞌn tel ttxcꞌomil triw jacu che ajben te siꞌ, ex atzun twitz triw jacu tzꞌajben te oyaj. Tcyakil jlu jacu txi nkꞌoꞌne teya, chi Ornán.

24 Atzunte rey David xi ttzakꞌweꞌn te Ornán:

—Chjonteya tuꞌn jlu, pero il tiꞌj tuꞌn ttzaj nlakꞌoꞌne teya ic tzaꞌnx twiꞌ cabalxix, porque mlay tzꞌel wiꞌne nok cucx aju at teya, tuꞌn t-xi nkꞌoꞌne te Kman, ex mlay txi nkꞌoꞌne jun chojbil te Kman aju mya ncwesteye.

25 Cyjaꞌtzun tten, xi tchjoꞌn David te Ornán kak syent kꞌan pwak, twiꞌ ju lugar lu. 26 Ex atzun jaw tbinchaꞌn David jun altar te Kman, e cubtzun tpatun ke oyaj patun in che cub, ex xi tkꞌoꞌn ke chojbil te mojbabl tibil. Octzun ten cubsal twitz Kman, ex tzaj ttzakꞌweꞌn Kman tuꞌn tkan kꞌakꞌ tzaj twitz cyaꞌj, ex cubil jucpaj tibaj oyaj tcub tibaj altar. 27 Atzunte Kman tzaj tmaꞌn te anjel tuꞌn tcuꞌx tcꞌuꞌn t-spad tuj tjayil.

28 Tejtzun tqueꞌyinte David ka otok tzaj tzakꞌweꞌn tuꞌn Kman tuj lugar jatum nneꞌl ttxcꞌomil triw tuꞌn Ornán aju aj Jebusey, atzun xi tkꞌoꞌn ke chojbil. 29 Aju ja xbalun te mojbabl tibil tucꞌil Dios, aju otok jaw tbinchaꞌn Moisés tuj tzkij txꞌotxꞌ, tucꞌix ju altar jatum in che cub patit ke oyaj, max ateꞌtok tuj lugar te cꞌulbil tuj tnam Gabaón, 30 pero mintiꞌ xiꞌ David tuj Gabaón tuꞌn t-xi tkanin te Dios, porque otok tzaj nim t-xobil tuꞌnju otok til ju spad kꞌiꞌn tuꞌn t-anjel Kman.