2 Te tibajxi jlu xi tmaꞌn David tuꞌn toc cychmon cyib ke stranjer xjal, akeju najlke cyxol aj Israel, ex e oc tkꞌoꞌn te xpeꞌlil abj, tuꞌn tajben tuꞌn tjaw binchet tja Dios. 3 Ax icx baj tchmoꞌn David txkan cꞌuxbil nimxix tuꞌn cybaj clawsyit ke tlamel, ex tuꞌn cybaj mojbet tzꞌlom, ax icx baj tchmoꞌn nim kꞌan cꞌuxbil mintiꞌ bant tmalonjtz, 4 tucꞌix nimxix tzeꞌ wiꞌten, porque ke xjal najlke tuj Sidón ex tuj Tiro otok tzul cyiꞌn nimcu tzeꞌ wiꞌten tucꞌil David.

5 Ex tma David: Aju tja Kman cjawil binchet, il tiꞌj tuꞌn toc tbanilxix queꞌyin ex mintiꞌ juntl cpol ic tzaꞌn te, ex aju ncyꞌajale Salomón ma cuꞌxunx taꞌ, naꞌnx toc tnabl. Tuꞌntzun jlu, biꞌx cyjel nchmoꞌne tcyakil aju cꞌajbel tuꞌn tbant tja Dios, chi David.

Cyjaꞌtzun, tej naꞌnxtok tcyim David, cyaj tchmoꞌn tcyakil aju at tuꞌn tajben. 6 Tzajtzun ttxcoꞌn David aju tcyꞌajal, Salomón tbi, ex xi tcyuwsaꞌn te tuꞌn tjaw tbinchaꞌn tja Kman aju Cydios aj Israel. 7 Xitzun tmaꞌn te cyjaꞌ: Ncyꞌajal, ximantok wuꞌne tuꞌn tjaw nbinchaꞌne jun ja te nimbil te Kman aju Ndiose. 8 Pero tzaj tmaꞌn Kman weye: Ma wile nimcu xjal o tzꞌel cychcꞌel tuꞌna, ex nimcu kꞌoj o tzꞌoc tuꞌna; tuꞌntzun jlu mya aya cjawil binchante jun ja tuꞌn tjaw nimsaꞌn nbiye tuj. 9 Pero tzul itzꞌj jun tcyꞌajala, ex oc tcawin tcyꞌajala lu, mintiꞌ kꞌoj cꞌoquel, porque wuꞌne ctel tuj txubtxaj ex mlay che tzaj ke aj kꞌoj kꞌojlel tiꞌj; cyjaꞌtzun Salomón cꞌoquel tbi kꞌa lu, ex tuj tkꞌijlalil oc tcawin che tel aj Israel tuj txubtxaj ex tuj tzalajbil. 10 Ate Salomón cjawil binchante jun ja te nimbil weye. Ate cꞌoquel te ncꞌwaꞌle, ex atzun weye chin oquele te tman, ex cyxol ke tiyjil cucx che jawil nscꞌoꞌne ke rey tuꞌn cycawin cyibaj aj Israel, chi Kman. 11 Jaꞌlotzun ncyꞌajal, awt Kman Dios ten tucꞌila ex onin teya tuꞌn tjaw binchet tja Dios aju Tdiosa, ic tzaꞌnx o tzaj ttziyan tuꞌn tbinchanteya. 12 Ex awt Kman tzaj kꞌonte tojtzkibla ex tnabla oc tcawina cyibaj aj Israel, tuꞌntzun tjapun tuꞌna aju tley Kman aju Tdiosa. 13 Tcyakil baꞌn cꞌelel te teya ka ma tzꞌoc tilil tuꞌna tuꞌn cyjapun ke tley ex ke t-xnakꞌtzbil, akeju e tzaj tmaꞌn Kman te Moisés tuꞌn tajben cye aj Israel. Tenx tipuna ex cyuwx tcꞌuꞌja, miꞌn xoba ex miꞌn tzaj baj tcꞌuꞌja. 14 Bintza, ma tzꞌoc tilil wuꞌne tuꞌn tbaj nchmoꞌne aju cꞌajbel tiꞌj tja Kman; ma chmet 75 mil quintal kꞌan pwak wuꞌne, wuk syent tucꞌil 50 mil quintal sak pwak, ex nimxix kꞌan cꞌuxbil, ex cꞌuxbil mlay bant tmalonjtz. Ax icx ma baj nchmoꞌne tzeꞌ ex abj, ex baꞌn tuꞌn toc ttzꞌaksaꞌna mastl. 15 Ex nimcu akꞌnal at tucꞌila, ke xjal xpeꞌlil abj, ke albañil, ke calpinter, ex nimcu xinak at cynabl tuꞌn cybinchante tcyakil txcaj akꞌuntl 16 tiꞌj kꞌan pwak, tiꞌj sak pwak, tiꞌj kꞌan cꞌuxbil, ex tiꞌj cꞌuxbil. Cyjaꞌtzun, tzyuma akꞌuntl ex awt Kman onil teya, chi David te Salomón.

17 Ax icx xi tmaꞌn David cye cycyakil nejenel cye aj Israel tuꞌn cyonin tucꞌil Salomón aju tcyꞌajal, ex xi tmaꞌn cye: 18 A Kman at cyucꞌile, ya mintiꞌtl in che kꞌojin ke mastl nasyon cyiꞌje, porque a Kman o onin weye tuꞌn tcub cyiꞌj wuꞌne ex cycyakil keju najlke cyuj o che cyaj tkꞌoꞌn Kman tjakꞌ ncawbile, ex akeju tnam lu ma che cyaj ten tjakꞌ tcawbil Kman ex tjakꞌ cycawbil xjal etzan tuꞌn. 19 Cyjaꞌtzun, jaꞌlo cynimanxe Kman aju Cydiose tuꞌn tcyakil cycꞌuꞌje; cybincham cytene tuꞌn tjaw cybinchaꞌne tja Kman tuꞌntzun ttzaj kꞌit ju cax cꞌubl tley ex ke macbil xjansaꞌmaj, tuꞌn cyul kꞌit tuj ja aju cjawil binchet te nimbil te Kman.