7 Ke tcyꞌajal Gersón, atzun ke jlu: Laadán ex Simei. 8 Ke tcyꞌajal Laadán ox cybet ex atzun ke jlu: Jehiel tbi tnejel, Zetam tbi tcabin ex Joel tbi toxin. 9 Ex ke tcyꞌajal Simei ax icx ox cybet ex atzun ke jlu: Selomit, Haziel ex Harán. Atzun ke jlu e oc te nejenel cyxol ke tiyjil Laadán. 10 Ke tcyꞌajal Simei cyaje cybet ex atzun ke jlu: Jahat, Ziza, Jeús ex Bería. 11 Aju tnejel, atzun Jahat, ex atzun tcabin, atzun Ziza, pero ate Jeús ex Bería, mya nim cycꞌwaꞌl tzaj, cyjaꞌtzun e jeꞌx ajlaꞌn mer ic tzaꞌn jun ja xjal ke.

12 Ke tcyꞌajal Coat cyaje cybet ex atzun ke jlu: Amram, Izhar, Hebrón ex Uziel. 13 Ke tcyꞌajal Amram, atzun ke jlu: Aarón ex Moisés. Ate Aarón jaw scꞌoꞌn tuꞌn Dios tuꞌn t-xi tkꞌoꞌn ke oyaj xjansaꞌmaj, tuꞌn tcub tpatun storac twitz Kman, tuꞌn tajben te, ex cucx tuꞌn tkanin cyꞌiwbil cyibaj xjal. Aju akꞌuntl lu, tuꞌn Aarón tuꞌn tbant ex cyuꞌn tiyjil te jumajx. 14 Atzunte Moisés aju xinak scꞌoꞌmaj tuꞌn Dios, cyucꞌix ke tcyꞌajal, ax xi kꞌiꞌn cyajlal cyucꞌil ke tiyjil Leví.

15 Ke tcyꞌajal Moisés atzun ke jlu: Gersón ex Eliezer. 16 Ate Sebuel tcyꞌajal Gersón ex nejenel cyxol terman. 17 Ate Eliezer junx tcyꞌajal tzaj, atzun Rehabías, ex mintiꞌ mastl tcꞌwaꞌl tzaj, atzunte Rehabías nim tcyꞌajal tzaj. 18 Ate Selomit tcyꞌajal Izhar ex nejenel cyxol terman. 19 Ke tcyꞌajal Hebrón atzun ke jlu: Jeraías tbi tnejel, Amarías tbi tcabin, Jahaziel tbi toxin, ex Jecamán tbi tcyajin. 20 Ke tcyꞌajal Uziel atzun ke jlu: Micaías tbi tnejel, ex Isías tbi tcabin.

21 Ke tcyꞌajal Merari atzun ke jlu: Mahli ex Musi. Ke tcyꞌajal Mahli atzun ke jlu: Eleazar ex Cis. 22 Ate Eleazar cyim mintiꞌ jun tcyꞌajal tzaj, nok oꞌcx ke tmeꞌjel e tzaj, ex e baj najan cyucꞌil ke tcyꞌajal Cis aju terman cyman. 23 Ke tcyꞌajal Musi ox cybet ex atzun ke jlu: Mahli, Edar ex Jeremot.

24 Cycyakil ke jlu tiyjil Leví ke. Tej tjaw cyajlal, cuꞌx tzꞌiban cybi keju otok japun winkin ex ka mastl abkꞌi cyuꞌn. Nejenel ke te junjun cꞌloj cyiyjil, ex in che akꞌnantok tuj tja Kman.

25 Otok tma David: Tuꞌn Kman aju Cydios aj Israel ma cub cyiꞌj aj kꞌoj, tuꞌntzun cyten ke xjal etzan tuꞌn tuj txubtxaj, ex axtzun tuꞌn tnajan te jumajx tuj Jerusalén. 26 Cyjaꞌtzun ya mlay tzicꞌ cylakꞌbaꞌn aj Leví aju ja xbalun te mojbabl tibil tucꞌil Dios, ax icx ke macbil in che ajben tuj cꞌulbil, chi David.

27 Cyjaꞌtzun, ic tzaꞌnx ju yol cyaj tmaꞌn David tej naꞌnxtok tcyim, jaw jun cyajlal aj Leví, akeju otok japun winkin ex ka mastl abkꞌi cyuꞌn, 28 ex e cyaj ten tjakꞌ cycawbil pal akeju tiyjil Aarón, tuꞌn tbant akꞌuntl cyuꞌn tuj tja Kman, cyuj ke ttxaꞌn peꞌn ex cyuj ke tal cwart, ex tuꞌn tbaj cytxꞌjoꞌn cyiꞌj ke macbil xjansaꞌmaj ke, ax icx tiꞌj mastl akꞌuntl tuj tja Kman. 29 Tuj cycwent taꞌ ke pan xjansaꞌmaj, akeju in che cub kꞌoꞌn tuj txolin, ax icx aju arin tuꞌn tajben te oyaj, ex ke tal pan xaxj mintiꞌ t-samel cyuj tuꞌn tjaw mal cycꞌuꞌj, ex ke oyaj tzkꞌajsaꞌmaj tuj sartén ex tuj xcꞌoꞌn. Ax icx cycyakil txcaj malbil ex echbil tuj cycwent taꞌ cycyakil. 30 Ax icx il tiꞌj tuꞌn cyten tuj tja Kman cycyakil kꞌij te prim ex te kale, tuꞌn t-xi cykꞌoꞌn chjonte te Kman ex tuꞌn tjaw cynimsaꞌn tbi, 31 ex tuꞌn t-xi cykꞌoꞌn te Kman ke oyaj patun in che cub cyuj ke kꞌij te ojlabl, cyuj ke ninkꞌij, oc ttzaj queꞌyin juntl acꞌaj xjaw, ex cyuj ke ninkꞌij nim cyoclen; cucx tuꞌn cyajben te Kman ic tzaꞌn cyajlal ex tumel cyajni bant tiꞌj. 32 Ex tuj cycwent taꞌ tuꞌn toc cycwentin ja xbalun te mojbabl tibil tucꞌil Dios, ax icx ju Lugar Xjan ex tuꞌn cyonin cye ke cyerman akeju tcyꞌajal Aarón tiꞌj akꞌuntl tuj tja Kman.