3 E cub tpaꞌn David ke tiyjil Aarón tuj cꞌlojin tuꞌntzun cyakꞌnan tiꞌj akꞌuntl at tuj cycwent; tucꞌix Sadoc aju tiyjil Eleazar ex Ahimelec aju tiyjil Itamar e onin tucꞌil tuꞌn tbant jlu. 4 El cynicꞌ tiꞌj, akeju xinak tiyjil Eleazar mas nim cyajlal cywitz ke tiyjil Itamar, cyjaꞌtzun e bjeꞌl cypaꞌn ex e cyaj ten kaklaj nejenel cyxol tiyjil Eleazar, ex wajxak nejenel cyxol tiyjil Itamar. 5 Jaw swert cyiꞌj tuꞌn cybaj paꞌn tuj cꞌlojin, tzaꞌnx cyxol ke tiyjil Eleazar ax icx cyxol ke tiyjil Itamar, porque at ke at cyoclen tuj tja Dios, ex at ke at cyoclen tuꞌn cyajben te Dios.

6 Ate Semaías aju aj tzꞌibal ex tcyꞌajal Natanael, aju tiyjil Leví, cub tzꞌibante cybi twitz rey, cywitz ke nejenel, twitz pal Sadoc, twitz Ahimelec aju tcyꞌajal Abiatar, cywitz ke nejenel te junjun cꞌloj pal, ex cywitz aj Leví. Jaw swert cyiꞌj jtoj tuꞌn tajben junjun cꞌloj. Nej jaw swert tiꞌj jun cꞌloj tiyjil Eleazar ex te tibajxi jaw swert tiꞌj jun cꞌloj tiyjil Itamar, ex iclex e tenba tejxi cyex baj cycyakil cꞌloj.

7-18 Tej tjaw cyiꞌn swert cyiꞌj, e cyajtzun ten ke cꞌloj tuj ttxolil, xi keꞌ tuj tnejel ex pon baj tuj 24 cꞌloj, ex akeju nejenel cye, atzun ke jlu: Joiarib, Jedaías, Harim, Seorim, Malquías, Mijamín, Cos, Abías, Jesúa, Secanías, Eliasib, Jaquim, Hupa, Jesebeab, Bilga, Imer, Hezir, Afses, Petaías, Hezequiel, Jaquín, Gamul, Delaía, ex Maazías.

19 Cyjaꞌtzun tten e baj paꞌn ke tuj cꞌlojin tuꞌn cyajben tuj tja Kman, ic tzaꞌnx otok cyaj tmaꞌn Kman aju Cydios aj Israel te Aarón aju ktzan cyxeꞌchel.

20 Ke mastl cꞌloj tiyjil Leví ex ke nejenel cye atzun ke jlu: Subael aju tiyjil Amram, ex Jehedías aju tiyjil Subael; 21 Isías aju nejenel cyiꞌj tiyjil Rehabías; 22 Selomot aju tiyjil Izhar; Jahat aju tiyjil Selomot. 23 Ke tcyꞌajal Hebrón atzun ke jlu: Jerías tbi tnejel, Amarías tbi tcabin, Jahziel tbi toxin, Jecamán tbi tcyajin. 24 Ax icx Micaía aju tcyꞌajal Uziel; Samir aju tcyꞌajal Micaía; 25 Isías aju terman Micaía ex Zacarías aju tcyꞌajal Isías. 26-27 Akeju tiyjil Merari atzun ke jlu: Jaazías tbi tcyꞌajal; atzun ke tcyꞌajal Jaazías atzun ke jlu: Mahli, Musi, Soahm, Zacur ex Ibri. 28-29 Ke tcyꞌajal Mahli atzun ke jlu: Eleazar ex Cis. Ate Eleazar mintiꞌ tcyꞌajal tzaj; aju tcyꞌajal Cis atzun Jerameel. 30 Ke tcyꞌajal Musi atzun ke jlu: Mahli, Edar ex Jerimot.

Atzun ke tiyjil Leví jlu, ic tzaꞌnx junjun cꞌloj cyiyjil. 31 Ax icx cye e baj paꞌn ke tuj swert, ic tzaꞌnx otok che tenba ke cyerman akeju tiyjil Aarón. A jlu o bant twitz rey David, twitz Sadoc, twitz Ahimelec, cywitz ke nejenel te junjun cꞌloj pal, ex cywitz ke nejenel te junjun cꞌloj aj Leví. Cycyakil xi kꞌoꞌn cyoclen, tzaꞌnx ke tzicbaj ax icx ke tzꞌinbaj.