2 Cyxol ke tcyꞌajal Asaf, atzun ke jlu: Zacur, José, Netanías ex Asarela. Aju nejenel cye, atzun Asaf aju cyman, aju oc kꞌoꞌn toclen tuꞌn rey tuꞌn ttzaj tmaꞌn tkanil aju in tzaj tmaꞌn Dios te.

3 Ke tcyꞌajal Jedutún kak cybet ex atzun ke jlu: Gedalías, Zeri, Jesaías, Simei, Hasabías ex Matatías. Aju nejenel cye, atzun Jedutún aju cyman, aju in tzaj tmaꞌn tkanil aju in tzaj tmaꞌn Dios te, tucꞌil tkꞌajkꞌajel twi arpa te akꞌbil chjonte te Dios ex tuꞌn tjaw nimset tbi.

4 Ke tcyꞌajal Hemán atzun ke jlu: Buquías, Matanías, Uziel, Sebuel, Jeremot, Hananías, Hanani, Eliata, Gidalti, Romanti-ezer, Josbecasa, Maloti, Hotir ex Mahaziot, 5 cycyakil ke jlu tcyꞌajal Hemán ke. Ate Hemán baꞌn nabin tuꞌn Dios ex in ajben ttxlaj rey, tzaj tkꞌoꞌn Dios cyajlaj tcyꞌajal ex oxe tmeꞌjel, ic tzaꞌn otok tzaj ttziyan te tuꞌntzun tten mas nim tipun. 6 Oc cybitzan tuj cꞌulbil tuj tja Kman tucꞌix ju tmoj cybitz ke tal lak cꞌuxbil, ke chnab arpa ex quitar. Aju nejenel cye, atzun Hemán, aju cyman.

Ate Asaf, Jedutún ex Hemán in cybinchaꞌn aju in tmaꞌn rey cye. 7 Aju cyajlal keju at cynabl tuꞌn cychimban, cyucꞌix ke cyerman xnakꞌtzamnike tuꞌn cybitzan tbi Kman, attok cab syent tucꞌil 88 cybet.

8 Ex jaw cyiꞌn swert cyiꞌj cycyakil tuꞌn cyakꞌnan tuj cꞌlojin, tzaꞌnx ke tij xjal ax icx ke cuꞌxun, tzaꞌnx ke xnakꞌtzal, icx keju ma in baj cyxnakꞌtzan cyib. 9-31 Tej tjaw cyiꞌn swert cyiꞌj e cyajtzun ten ke cꞌloj tuj ttxolil, xi keꞌ tuj tnejel ex pon baj tuj 24 cꞌloj, ex akeju nejenel cye, atzun ke jlu: José, Gedalías, Zacur, Izri, Netanías, Buquías, Jesarela, Jesahías, Matanías, Simei, Azareel, Hasabías, Subael, Matatías, Jeremot, Hananías, Josbecasa, Hanani, Maloti, Eleata, Hotir, Gidalti, Mahaziot, ex Romanti-ezer.

Ex teylex te junjun cye cyucꞌix ke cyerman ex ke cycꞌwaꞌl, cablaj cybet tuj junjun cꞌloj.