4 Ke tcyꞌajal Obed-edom atzun ke jlu: Semaías aju nej cꞌwaꞌl, Jozabad aju tcabin, Joa aju toxin, Sacar aju tcyajin, Natanael aju tjweꞌyin, 5 Amiel aju tkakin, Isacar aju twukin, Peultai aju twajxakin; porque cub cyꞌiwlaꞌn Obed-edom tuꞌn Dios, cyjaꞌtzun tzaj nim tcꞌwaꞌl.

6 Ate Semaías aju tcyꞌajal Obed-edom tzaj cabe tcyꞌajal, ex e oc te nejenel cye ke cyerman, porque ke xinak lu attok nimxix cyipun ex cynabl. 7 Ex ke tcyꞌajal Semaías atzun ke jlu: Otni, Rafael, Obed, Elzabad, Eliú ex Samaquías; ke xinak lu at nimxix cyipun. 8 Cycyakil ke jlu tiyjil Obed-edom ke; ake cyucꞌix ke cycyꞌajal ex ke cyerman at nimxix cyipun ex cynabl tuꞌn cyajben tuj akꞌuntl. 62 cybaj tiyjil Obed-edom tuꞌn cycyakilx.

9 Ke tcyꞌajal Meselemías cyucꞌix ke terman, wajxaklaj cybaj tuꞌn tcyakil ex at nim cynabl tiꞌj akꞌuntl.

10 Ke tcyꞌajal Hosa aju tiyjil Merari, atzun ke jlu: Simri aju nejenel, masque mya nej cꞌwaꞌltok, pero oc kꞌoꞌn toclen te tnejel tuꞌn tman, 11 Hilcías tbi tcabin, Tebalías tbi toxin, Zacarías tbi tcyajin. Ke tcꞌwaꞌl Hosa cyucꞌix ke terman oxlaj cybet tuꞌn tcyakil.

12 Atzun ke jlu e baj paꞌn tuj cꞌlojin tuꞌn cyxkꞌukin ttzi tja Kman. Tzaꞌnx ke nejenel, ax icx ke cyerman, tuj cycwent cyaj tuꞌn cyajben tuj tja Kman. 13 Jawtzun cyiꞌn swert cyxolx, tzaꞌnx ke cuꞌxun icx ke tij xjal, tuꞌntzun cylonte alcye cꞌloj cyiyjil tuꞌn tten ttziꞌ junjun pwert.

14 Oc tzꞌak swert tiꞌj Selemías tuꞌn t-xkꞌukin ttzi ja tcub tuj tumlal tjawitz kꞌij, atzunte Zacarías aju baꞌn kꞌonte cynabl xjal ex aju baꞌn tmod, ex ax tcyꞌajal Selemías, oc tzꞌak swert tiꞌj tuꞌn t-xkꞌukin ttzi ja te jawni. 15 Atzunte Obed-edom oc tzꞌak swert tiꞌj tuꞌn t-xkꞌukin ttzi ja tcub cubni; atzun ke tcyꞌajal tuj cycwent cyaj ten tuꞌn cyxkꞌukin ke ja cꞌubl tiꞌxti tuj tja Dios. 16 Atzunte Supim ex Hosa oc tzꞌak swert cyiꞌj tuꞌn cyxkꞌukin ttzi ja tcub tumlal telex kꞌij, jatum taꞌ ttzi ja Salequet tbi, jatum in jax be twitz jawl.

Ke akꞌuntl lu cyjaꞌtzun e tenba: 17 Tcyakil kꞌij in che cub ten kak xkꞌukil ttzi ja aju tcub tumlal tjawitz kꞌij, ex cyaje in che cub ten ttzi ja tcub jawni, ex cyaje ttzi ja tcub cubni, ex cabe in che xkꞌukin tiꞌj ju cꞌubl twitz awal. 18 Tuj ttxaꞌn peꞌn aju tcub tumlal telex kꞌij, attok cyaje in che cwentin tuj be ex cabe ax in che xkꞌukin tuj ja. 19 Cyjaꞌtzun tten baj sipan akꞌuntl cye ke xkꞌukil ttzi ja, akeju tiyjil Coré ex Merari.

20 Ex cyxol tiyjil Leví ate Ahías toctok te cwentil cye kꞌinumabl ateꞌ tuj tja Kman ex ke cꞌubl te oyaj xjansamaj. 21 Atzun cyxol ke tcyꞌajal Laadán, akeju elni cyiyjil tiꞌj Gersón, ate Jehiel nejenel cye, 22 ex ke tcyꞌajal Jehiel cyucꞌix ke tcyꞌajal Zetam ex ke tcyꞌajal Joel aju cyerman, tuj cycwent tcyajsaꞌntok ke kꞌinumabl tuj tja Kman.

23 Atzun cyxol ke tiyjil Amram, Izhar, Hebrón ex Uziel, 24 oc kꞌoꞌn Sebuel tuꞌn tcwentin cyiꞌj ke kꞌinumabl. Ate Sebuel tiyjil Gersón aju tcyꞌajal Moisés.

25 Atzun ke terman Sebuel, akeju tiyjil Eliezer, atzun ke jlu: Rehabías aju tcyꞌajal Eliezer, Jesaías aju tcyꞌajal Rehabías, Joram aju tcyꞌajal Jesaías, Zicri aju tcyꞌajal Joram, ex Selomit aju tcyꞌajal Zicri.

26 Ate Selomit cyucꞌix ke terman, tuj cycwent tcyajsaꞌntok cycyakil ke cꞌubl macbil xjansaꞌmaj, akeju otok tzꞌel tpaꞌn David ex otok txi tkꞌoꞌn te Kman, ex aju otok xi cykꞌoꞌn ke nejenel cye junjun cꞌloj cyiyjil, cyucꞌix ke nejenel cye soldad, akeju at jun milchak soldad tuj cycwent ex keju at jun syentchak soldad tuj cycwent, ax icx ke mastl nejenel cye soldad. 27 Akeju tiꞌxti lu otok tzꞌel cyiꞌn cye ke aj kꞌoj cyiꞌj oc nnoꞌc kꞌoj, ex otok txi cykꞌoꞌn tuꞌn tajben tiꞌj tja Kman. 28 Ax icx axtok taꞌ tcyakil tiꞌxti aju otok tzꞌel tpaꞌn Samuel aju baꞌn nabin tuꞌn Dios ex otok txi tkꞌoꞌn te Kman, tucꞌix aju otok txi cykꞌoꞌn Saúl aju tcyꞌajal Cis, Abner aju tcyꞌajal Ner, ex Joab aju tal Sarvia. Cycyakil ke tiꞌxti xjansaꞌmaj tcyajsaꞌntok tuj tcwent Selomit ex tuj cycwent ke terman.

29 Ex atzun cyxol ke tiyjil Izhar jaw scꞌoꞌn Quenanías ex ke tcyꞌajal tuꞌn cyoc te ajcal ex te jwes cyxol aj Israel.

30 Atzun cyxol tiyjil Hebrón jaw scꞌoꞌn Hasabías cyucꞌix ke terman; tuꞌn cycyakil japun jun mil tucꞌil wuk syent cybaj at cyipun ex at cynabl, e oc kꞌoꞌn tuꞌn cycawin cyibaj aj Israel, akeju ateꞌ tuj tumlal telex kꞌij te nima Jordán. Tuj cycwent taꞌ tuꞌn tbant tcyakil takꞌun Kman, ax icx takꞌun rey.

31 Tej otok bant 40 abkꞌi ttzyetlen tcawin David, baj jyet alcyechak ke tiyjil Hebrón, ex cyxol cycyakil e cnet ke xinak at cyipun ex at cynabl najlke tuj Jazer, aju at tuj txꞌotxꞌ Galaad. Aju nejenel cye tiyjil Hebrón, atzun Jerías, 32 atzun ke terman at nim cyipun ex at cynabl, japun jun cyajlal tuꞌn cycyakil te cab mil tucꞌil wuk syent cybaj, nejenel ke cye junjun cꞌloj cyiyjil. Atzunte rey David e oc tkꞌoꞌn tuꞌn cycawin cyibaj ke tiyjil Rubén, ax icx cyibaj tiyjil Gad, cyucꞌix mij tiyjil Manasés. Tuj cycwent taꞌ tuꞌn tbant tcyakil takꞌun Kman, ax icx takꞌun rey.