Ke nejenel cye junjun cꞌloj soldad
27
Lu jun tajlal cyiꞌj ke aj Israel ajlaꞌmaj ke ic tzaꞌnx ke nejenel cye junjun cꞌloj cyiyjil, cyucꞌix ke nejenel cye soldad, akeju at jun milchak soldad tuj cycwent, ax icx keju at jun syentchak soldad tuj cycwent, ax icx ke mastl nejenel maꞌ cyoclen, akeju in che ajben ttxlaj rey tuj tcyakil akꞌuntl. In che cub paꞌn ke soldad tuj cꞌlojin; jun xjaw in che ajben jun cꞌloj tuj abkꞌi. Teyle junjun cꞌloj attok 24 mil cybaj.2 Aju tnejel cꞌloj, atzun ke tuꞌn cyxkꞌukin tuj tnejel xjaw cycyakil abkꞌi. Aju nejenel cye, atzun Jasobeam aju tcyꞌajal Zabdiel, 3 a jlu tiyjil Fares ex nejenel cye cycyakil nejenel cye soldad akeju in che ajben tuj tnejel xjaw.
4 Juntl cꞌloj xkꞌukil tuꞌn cyajben tuj tcabin xjaw: Aju nejenel cye, atzun Dodai aju aj Ahohit, ex aju tcabin nejenel Miclot tbi.
5 Juntl cꞌloj xkꞌukil tuꞌn cyajben tuj toxin xjaw: Aju nejenel cye, atzun Benaía aju tcyꞌajal tnejel pal Joiada. 6 Ate Benaía ajun cyxol ke 30 soldad cyuw cycꞌuꞌj tuj kꞌoj, ex ax toc te nejenel cye. Ex ate Amisabad aju tcyꞌajal toc te tcabin nejenel cye keju toxin cꞌloj soldad.
7 Juntl cꞌloj xkꞌukil tuꞌn cyajben tuj tcyajin xjaw: Aju nejenel cye, atzun Asael aju terman Joab. Ex aju t-xel cyaj ten te tibajxi, atzun Zebadías aju tcyꞌajalx.
8 Juntl cꞌloj xkꞌukil tuꞌn cyajben tuj tjweꞌyin xjaw: Aju nejenel cye, atzun Samhut aju aj Izrai.
9 Juntl cꞌloj xkꞌukil tuꞌn cyajben tuj tkakin xjaw: Aju nejenel cye, atzun Ira aju tcyꞌajal Iques, aju aj Tecoa.
10 Juntl cꞌloj xkꞌukil tuꞌn cyajben tuj twukin xjaw: Aju nejenel cye, atzun Heles aju aj Pelonit ex tiyjil Efraín.
11 Juntl cꞌloj xkꞌukil tuꞌn cyajben tuj twajxakin xjaw: Aju nejenel cye, atzun Sibecai aju aj Husa ex tiyjil Zera.
12 Juntl cꞌloj xkꞌukil tuꞌn cyajben tuj tbelajin xjaw: Aju nejenel cye, atzun Ebiezer aju aj Anatot ex tiyjil Benjamín.
13 Juntl cꞌloj xkꞌukil tuꞌn cyajben tuj tlajin xjaw: Aju nejenel cye, atzun Maharai aju aj Netofa ex tiyjil Zera.
14 Juntl cꞌloj xkꞌukil tuꞌn cyajben tuj tjunlajin xjaw: Aju nejenel cye, atzun Benaía aju aj Piratón ex tiyjil Efraín.
15 Juntl cꞌloj xkꞌukil tuꞌn cyajben tuj tcablajin xjaw: Aju nejenel cye, atzun Heldai aju aj Netofa ex tiyjil Otoniel.
Ke nejenel cye cablaj cꞌloj cyiyjil aj Israel
16 Ke nejenel cye junjun cꞌloj cyiyjil aj Israel, atzun ke jlu: Aju nejenel cye tiyjil Rubén, atzun Eliezer aju tcyꞌajal Zicri; aju nejenel cye tiyjil Simeón, atzun Sefatías aju tcyꞌajal Maaca; 17 aju nejenel cye tiyjil Leví, atzun Hasabías aju tcyꞌajal Kemuel; aju nejenel cye tiyjil Aarón, atzun Sadoc, 18 aju nejenel cye tiyjil Judá, atzun Eliú, a jlu jun terman David; aju nejenel cye tiyjil Isacar, atzun Omri aju tcyꞌajal Micael; 19 aju nejenel cye tiyjil Zabulón, atzun Ismaías aju tcyꞌajal Abdías; aju nejenel cye tiyjil Neftalí, atzun Jerimot aju tcyꞌajal Azriel; 20 aju nejenel cye tiyjil Efraín, atzun Oseas aju tcyꞌajal Azazías; aju nejenel cye mij cꞌloj tiyjil Manasés, atzun Joel aju tcyꞌajal Pedaías; 21 aju nejenel cye juntl mij cꞌloj tiyjil Manasés akeju ateꞌ tuj Galaad, atzun Iddo aju tcyꞌajal Zacarías; aju nejenel cye tiyjil Benjamín, atzun Jaasiel aju tcyꞌajal Abner; 22 ex aju nejenel cye tiyjil Dan, atzun Azareel aju tcyꞌajal Jeroham. Atzun ke nejenel jlu cye junjun cꞌloj cyiyjil aj Israel.
23 Mintiꞌ jaw tiꞌn David cyajlal keju naꞌnxtok tjapun winkin abkꞌi cyuꞌn, porque otok tzaj ttziyan Kman tuꞌn tchmet nimxix cybaj aj Israel, ic tzaꞌn cyajlal ke cheꞌw ateꞌ twitz cyaꞌj. 24 Ate Joab aju tal Sarvia oc ten kꞌilte cyajlal, pero mintiꞌ jaw baj tuꞌn, porque tuꞌn tlaj jlu tzaj jun cꞌixbisabl cyibaj aj Israel. Cyjaꞌtzun cyuj ke uꞌj tzꞌiban tuꞌn rey David mintiꞌ jun tajlal jteꞌ cybet aj Israel.
Ke mastl xjal at cyoclen ttxlaj David
25 Aju cꞌul pwak tuj tja rey atzun Azmavet aju tcyꞌajal Adiel, atzun ke txꞌutxꞌ, akeju ateꞌ tuj cojbil, ax icx keju ateꞌ cyuj tnam ex cyuj ke aldey ex cyuj ke ja maꞌ cywaꞌl, tcyajsaꞌntok tuj tcwent Jonatán aju tcyꞌajal Uzías.
26 Ex aju nejenel cye xjal in che akꞌnan tuj cojbil, atok Ezri aju tcyꞌajal Quelub. 27 Ex aju nejenel cye akꞌnal tiꞌj tkan uva, atok Simei aju aj Ramat. Aju nejenel tcyajsaꞌntok tiꞌj tuꞌn toc chmet taꞌl twitz uva tuj cꞌubl te, atok Zabdi aju aj Sefam. 28 Ex aju nejenel tiꞌj tkan olivo ex tiꞌj tkan higo te tjakꞌ cꞌul aju at tuj chkꞌajlaj t-xe witz, atok Baal-hanán aju aj Gedera; aju nejenel cye keju in che akꞌnan jatum in baj chmoꞌn aseyt, atzun Joás. 29 Aju nejenel cye pastoril wacẍ in che waꞌn tuj chkꞌajlaj Sarón, atzun Sitrai, ex ax aj Sarón te xjal lu. Aju nejenel cye pastoril wacẍ in che waꞌn cyuj ke chkꞌajlaj ttziꞌyile aꞌ, atzun Safat aju tcyꞌajal Adlai. 30 Aju nejenel cye pastoril chej camey, atzun Obil aju tiyjil Ismael. Aju nejenel cye pastoril bur, atzun Jehedías aju aj Meronot. 31 Ex aju nejenel cye pastoril ẍneꞌl, atzun Jaziz aju tiyjil Agar. Cycyakil ke jlu mayordom ke tiꞌj tkꞌinumabl rey David.
32 Atzunte Jonatán aju terman tman David at tnabl ex xnakꞌtzamaj, atzun kꞌol consej te rey; atzunte Jehiel aju tcyꞌajal Hacmoni, atzun cwentil cye ke tcyꞌajal rey. 33 Ax icx te Ahitofel kꞌol consej te rey. Atzunte Husai aju aj Arquit, atzunju mas kꞌukl tcꞌuꞌj rey David tiꞌj. 34 Tcyimlenxi Ahitofel, cyaj ten Benaía aju tcyꞌajal Joiada te t-xel, tucꞌix Abiatar. Ex aju nejenel mas maꞌ toclen cyxol cycyakil t-soldad rey, atzun Joab.