2 Atzunte David cub weꞌ ex tma cyjaꞌ: Chin cybintze akeye wermaniye ex nxjalile: Ximantok wuꞌne tuꞌn tjaw nbinchaꞌne jun ja jatum tuꞌn tcub ten aju cax cꞌubl tley Dios tuꞌntzun miꞌn tyucch, ex atzunju lugar lu jatum tuꞌn tcub ten tkꞌukbil Kdios. Otok bant tten tcyakil wuꞌne tuꞌn tjaw nbinchaꞌne ja lu, 3 pero tzaj tmaꞌn Dios weye cyjaꞌ: Mya aya cjawil binchante jun ja te weye, porque nim kꞌoj o tzꞌoc tuꞌna ex nim xjal o che cub tbyoꞌna tuj kꞌoj. 4 Masque icju, ate Kman aju Cydios aj Israel ma jaw scꞌonte weye cyxol cycyakil tcꞌwaꞌl nmane tuꞌn woque te cyrey aj Israel te jumajx. Ate Kman ma jaw scꞌonte cye tiyjil Judá tuꞌn cycawin, ex cyxol tiyjil Judá ma jaw t-scꞌoꞌn Kman ke tcyꞌajal nmane, ex cyxol tcyꞌajal nmane, ma chin jaw t-scꞌoꞌn Kman tuꞌn woque te rey cyibaj cycyakil aj Israel. 5 O tzaj tkꞌoꞌn Kman elaꞌ ncyꞌajale, ex cyxol ke jlu ma jaw t-scꞌoꞌn ncyꞌajale Salomón tuꞌn tcub keꞌ tuj tkꞌukbil Kman tuꞌn tcawin cyibaj aj Israel. 6 Ax icx o tma Kman weye: Aju tcyꞌajala Salomón, atzunju cjawil binchante jun njaye cyucꞌix ke ttxaꞌn tpeꞌn, porque ma jaw nscꞌoꞌne tuꞌn toc te ncyꞌajale ex atzun weye chin oquele te tman, 7 ex te jumajx ccyuwsetel tcawbil wuꞌne, ka cucx ma tzꞌoc tilil tuꞌn tuꞌn cyjapun ke nmandamyente ex ke nleye tuꞌn, ic tzaꞌn in bant tuꞌn tuj tkꞌijlalil jaꞌlo.

8 Jaꞌlotzun twitz Kdios aju in binte ke, ex cywitze cycyakile akeye aj Israel akeju etzan tuꞌn, cxel ncyuwsaꞌne cyeye: Tzꞌoc tililx cyuꞌne tuꞌn cyjapun cycyakil tmandamyent Kman cyuꞌne, aju Cydiose, tuꞌntzun cucx tuꞌn toc te cyeye aju tbanil txꞌotxꞌ lu, ex tuꞌntzun tcyaj cykꞌoꞌne te cyetzbil cycꞌwaꞌle te jumajx. 9 Ex atzun teya ncyꞌajal Salomón, tzꞌelx tnicꞌa tiꞌj Ndiose, akine tmana, ex tzꞌajbena te tuꞌn tcyakil tanmiya ex tuꞌn tcyakil tcꞌuꞌja, porque ate Kman in baj tqueꞌyin tuj cyanmi xjal ex nneꞌl tnicꞌ tiꞌj nok alcyex cyximbetz. Cyjaꞌtzun, ka ma jyona tiꞌj, cnetel tuꞌna, pero ka ma tzꞌel tpaꞌn tiba tiꞌj, biꞌx cꞌelel icꞌuna tuꞌn te jumajx. 10 Kꞌonc tcwenta tiꞌj, ate Kman ma jaw scꞌonte teya tuꞌn tjaw tbinchaꞌna jun nintz ja tuꞌn tajben te tja. Cyjaꞌtzun kꞌonc tipuna ex tzyuma akꞌuntl, chi David te Salomón.

11 Xitzun tkꞌoꞌn David te Salomón aju tcyꞌajal ke yecꞌbil tzaꞌn tten tuꞌn ttenba twitz tja Dios, ex tzaꞌn tuꞌn ttenba ke mastl ja, ex ke ja te cꞌubl ke tiꞌxti, ex tzaꞌn tuꞌn ttenba ke tal cwart te tcabin col, ex ke tal cwart te tujxi ex ju Lugar Mas Xjanxix jatum tuꞌn tnajset cyil xjal. 12 Ax icx xi tkꞌoꞌn David jun yecꞌbil tiꞌj tcyakilju otok cub t-ximan tuꞌn tbant cyiꞌj ke ttxaꞌn tpeꞌn tja Dios, ex cyiꞌj ke tal cwart tiꞌjele tja Dios, ex cyiꞌj ke tal cwart tuꞌn cyajben te cꞌubl oyaj tiꞌj tja Dios ex cyiꞌj ke tal cwart tuꞌn cyajben te cꞌubl tcyakil oyaj xjansaꞌmaj. 13 Ax icx xi tmaꞌn David tzaꞌn tten tuꞌn cybaj paꞌt ke pal ex ke aj Leví tuj cꞌlojin, tuꞌn cyakꞌnan tiꞌj tcyakil akꞌuntl in bant tuj tja Dios, ex cyiꞌj cycyakil ke macbil in che ajben tuj cꞌulbil tuj tja Kman.

14 Ax icx xi tkꞌoꞌn nimxix tajlal kꞌan pwak ex sak pwak tuꞌn cybant cycyakil ke macbil kꞌan pwak ex sak pwak cytxꞌotxꞌil, akeju at tuꞌn cyajben tuj cꞌulbil, 15 ex tuꞌn tajben tuꞌn cybant ke tcubil candil ex ke candil, tzaꞌnx keju kꞌan pwak ttxꞌotxꞌil ax icx keju sak pwak ttxꞌotxꞌil, xi tkꞌoꞌn cabalxix ic tzaꞌnx talil junjun cye tuꞌn tbant. 16 Ax icx xi tkꞌoꞌn kꞌan pwak ex sak pwak tuꞌn cybant ke mes jatum tuꞌn cycub txolbet ke pan twitz Kman, at kꞌan pwak cytxꞌotxꞌil ex at sak pwak cytxꞌotxꞌil. 17 Ax icx xi tkꞌoꞌn kꞌan pwak tuꞌn cybant ke jacbil twitz chibj tiꞌj, cyucꞌix ke lak matij ex ke xar, ax icx xi tkꞌoꞌn kꞌan pwak ex sak pwak tuꞌn cybant ke vas tiꞌj; xi tkꞌoꞌn ic tzaꞌnx cyalil teyle junjun tuꞌn tbant. 18 Ax icx xi tkꞌoꞌn kꞌan pwak tbanilxix tuꞌn tbant altar jatum tuꞌn tcub patit storac, ax icx xi tkꞌoꞌn kꞌan pwak tuꞌn tbaj binchet jun carwaj cye ke tilbilal querubín, akeju licꞌun tten cyxicꞌ tibaj cax jatum cꞌuꞌn tley Dios.

19 Tcyakil jlu tuꞌn Kman cub ttzꞌiban ex ma tzaj tkꞌoꞌn nnable tuꞌn tel nnicꞌe tiꞌj tzaꞌn tten tuꞌn tbant tcyakil akꞌuntl, ic tzaꞌnxju yecꞌbil o tzaj kꞌoꞌn weye, chi David.

20 Ax icx xi tmaꞌn David te Salomón aju tcyꞌajal: Tenx tipuna ex cyuwx tcꞌuꞌja, ex tzyuma akꞌuntl. Miꞌn tzaj baj tcꞌuꞌja ex miꞌn xoba, porque ctel Kman Dios tucꞌila. Mlay cyaj kꞌoꞌna ex mlay cyaj colina tuꞌn, ocxi tbaj bant tcyakil akꞌuntl tiꞌj tja Kman. 21 Ex lutzun ke cꞌloj pal lu ex ke aj Leví cykꞌon cyib tuꞌn cyakꞌnan tiꞌj tja Kman; tuj tcyakil akꞌuntl ateꞌ ke onil teya ex jacu che akꞌnan tucꞌila nok tuꞌn cyex cygan, ex atlex cynabl tiꞌj tcyakil txcaj akꞌuntl; ex ke nejenel ex cycyakil xjal cbantel cyuꞌn aju cxel tmaꞌna cye, chi David.