—Txiꞌya cyxol cycyakil cꞌloj cyiyjil aj Israel, tzajx keꞌ tuꞌna max tuj Dan tuꞌn tpon baj tuj Beerseba, ex kꞌin jawa cyajlal cycyakil tnam xjal, tuꞌntzun tel nnicꞌe tiꞌj nicꞌpun xjal at.

3 Atzunte Joab xi ttzakꞌweꞌn:

—Tat Rey, awt Kman aju Tdiosa binchante tuꞌn tchmet mastl cybaj tnam xjal etzan tuꞌn, jun syent maj mas ic tzaꞌn keju ateꞌ jaꞌlo, ex cucxwit itzꞌxa Tat Rey tuꞌntzun ttila; pero ¿titzun tajben teya tuꞌn tjaw jun cyajlal xjal?

4 Masque icju, pero tuꞌnju mas at tipun tyol rey, o japun tuꞌn Joab ex cyuꞌn ke nejenel cye soldad aju xi kꞌmaꞌn cye. Cyjaꞌtzun ate Joab cyucꞌix ke nejenel cye soldad e jeꞌx tuꞌn tjaw cyiꞌn cyajlal tnam xjal aj Israel. 5 E icꞌx tuj nima Jordán ex atzun e cub ten nikayin ttxlaj tnam Aroer aju tcub tuj tmijil chkꞌajlaj tumlal cytxꞌotxꞌ tiyjil Gad ex tumlal tnam Jazer. 6 Te tibajxi e jeꞌx tuj Galaad ex tuj Cades, tuj cytxꞌotxꞌ aj Hetey. E pon tuj Dan ex maxtzun tuj Dan e kꞌoꞌn welt tuꞌn cypon tuj Sidón. 7 Te tibajxi e jeꞌx tuj tnam Tiro ex cyuj cycyakil tnam cye aj Hevey ex cye aj Canaán, tuꞌn cycuꞌpun tuj txꞌotxꞌ Néguev aju at tuj tcwent Judá, ex max tuj Beerseba. 8 Tbajlenxi cybetin tcyakil txꞌotxꞌ belaj xjaw tucꞌ winkin kꞌij xi tiꞌn, ex te tibajxi e pontzun tuj Jerusalén. 9 Xitzun tkꞌoꞌn Joab te rey aju tajlal otok jaw tiꞌn cyiꞌj tnam xjal, ex cyxol aj Israel o japun jun tajlal te wajxak syent mil xinak otok bant tuꞌn cyxiꞌ tuj kꞌoj, ex cyxol aj Judá japun jun tajlal te jweꞌ syent mil xinak.

10 El tnicꞌ David tiꞌj ka ate at til tiꞌj tajlal otok jaw tiꞌn cyiꞌj tnam xjal, ex xi tmaꞌn te Kman cyjaꞌ:

—Ma bant jun il maꞌxix wuꞌne tuꞌnju ma nbinchaye jlu. Pero in chin cubsane twitza Nman tuꞌn tcub tnajsaꞌna jaꞌlo aju il ma bant wuꞌne, akine tmajena, porque ma nbinchaye jlu ic tzaꞌn jun xjal mintiꞌ tnabl, chi David. 11 Tuj juntl kꞌij tej tjaw weꞌ David, xi tmaꞌn Kman te Gad aju t-sanjel, aju in ajbentok ttxlaj David: 12 Txiꞌya tucꞌil David ex kꞌmanxa te cyjaꞌ: Ox castiw cbel nkꞌoꞌne twitza, scꞌon jawa jun cyxol ke jlu alcye tajbila tuꞌn nbinchanteye, chicuya te David, chi Kman. 13 Xiꞌtzun Gad tucꞌil David ex xi tkanin te:

—¿Alcye baꞌn tuj twitza: Ka tuꞌn ttzaj wuk abkꞌi weꞌyaj tuj cytxꞌotxꞌ aj Israel, ka tuꞌn cyel oke ox xjaw cywitz aj kꞌoj cyiꞌje, ex ka tuꞌn ttzaj ox kꞌij txꞌuꞌj yabil cyxol aj Israel? Ximana tiꞌj jaꞌlo ex kꞌmantza alcye tzakꞌwebl cxel nmaꞌne teju saj samante weye, chi Gad.

14 Atzunte David xi ttzakꞌweꞌn:

—Atine tuj jun bis maꞌxix. Mas baꞌn tuꞌn kcub tzꞌake tuj tkꞌab Kman, porque aju t-xtalbil maꞌxix te, ex mya tuꞌn kcub tzꞌake tuj cykꞌab xjal.

15 Te prim ax kꞌij lu tzaj t-samaꞌn Kman txꞌuꞌj yabil cyibaj aj Israel; o ten ox kꞌij ic tzaꞌnx banimaj tiꞌj, tzajx keꞌ tuj Dan ex tejxi tpon baj max tuj Beerseba e cyim 70 mil xjal. 16 Ex tej cyjaꞌtok tnaj tnam Jerusalén tuꞌnju anjel, tzaj tbis Kman tuꞌn tlaj otok che cyim nim xjal ex xi tmaꞌn teju anjel in che najtok tnam xjal tuꞌn: Acux jlu, ya miꞌn che cub tbyoꞌna mastl xjal.

Tujxju or lu otok pon t-anjel Kman ttxlaj lugar jatum nneꞌl ttxcꞌomil triw tuꞌnju xjal Arauna tbi, aju aj Jebusey. 17 Ex tej ttil David aju anjel in cꞌixbisantok cye tnam xjal, xitzun tmaꞌn te Kman:

—Akine ma chin binchan il. Akine at wile. Atzun ke xjal lu mintiꞌ cyil. In chin cubsane twitza tuꞌn tcub tzꞌak ju castiw lu tuꞌna wibaje ex cyibaj keju ateꞌ tuj njaye.

18 Tujx kꞌij lu xiꞌ Gad tucꞌil David, ex xi tmaꞌn te tuꞌn tjaw tbinchaꞌn jun altar te Kman tuj lugar jatum nneꞌl ttxcꞌomil triw tuꞌn Arauna aju aj Jebusey. 19 Xiꞌtzun David binchalte aju otok tma Gad, ic tzaꞌnx otok tzaj tmaꞌn Kman. 20 Atzunte Arauna o til tej cyjaꞌtok t-xiꞌ rey cyucꞌix ke xjal at cyoclen ttxlaj tuꞌn tpon jatum taꞌtok. Tzajtzun Arauna canul tiꞌj rey, cub ẍmejeꞌ twitz tejxi tpon tacl tibaj twitz twitz txꞌotxꞌ, 21 ex xi tmaꞌn:

—Tat Rey, ¿ti ma tzaja lolte wucꞌile akine tmajena?

Xi ttzakꞌweꞌn David:

—Waje tuꞌn tcyaj nlakꞌone teya aju lugar jatum nneꞌl ttxcꞌomil triw tuꞌna, tuꞌn tjaw nbinchaꞌne jun altar te Kman tuꞌntzun tweꞌ txꞌuꞌj yabil cyiꞌj tnam xjal.

22 Atzunte Arauna xi ttzakꞌweꞌn:

—Tat Rey, tzyuma nok alcye baꞌn tuj twitza ex kꞌonxa ke oyaj te Kman. Lu ke tor ateꞌ tzalu tuꞌn cyajben te oyaj patun tuꞌn cycub, ex ke tzeꞌ in che ajben te kꞌibl ttxcꞌomil triw ex ke yuw jacu che ajben te siꞌ. 23 Tcyakil jlu jacu txi nkꞌoꞌne teya Tat Rey, chi Arauna.

Ax icx xi tmaꞌntl:

—Txiꞌwt tcꞌmoꞌn Kman aju Tdiosa aju chojbil cxel tkꞌoꞌna.

24 Atzunte rey xi ttzakꞌweꞌn:

—Chjonte teya tuꞌn jlu, pero ctzajel nlakꞌoꞌne tcyakil teya ex cchjetel wuꞌne ic tzaꞌnx twiꞌ, porque mlay txi nkꞌoꞌne te Kman Dios ke oyaj patun tuꞌn cycub, ka mya lokꞌaj otok tzaj wuꞌne.

Cyjaꞌtzun tten o lakꞌet tuꞌn David aju lugar lu ex cyucꞌix ke tor tuꞌn 50 sak pwak, 25 ex atzun jaw tbinchaꞌn jun altar te Kman ex e jeꞌx tkꞌoꞌn ke oyaj patun in che cub ex ke chojbil te mojbabl tibil. Tzajtzun tbiꞌn Kman aju tnaꞌj Dios David cyiꞌj tnam xjal, ex atzunju txꞌuꞌj yabil biꞌx weꞌ cyxol aj Israel.