3 Ax icx cub tiꞌj Hadad-ezer tuꞌn David tej cyjaꞌtok t-xi Hadad-ezer tuꞌn tcawin tibaj txꞌotxꞌ at ttzi nima Éufrates. Ate Hadad-ezer rey tuj tnam Soba aju taꞌ tumlal tnam Hamat. 4 El tiꞌn David jun mil carwaj in che ajben tuj kꞌoj, ax icx xi tiꞌn wuk mil soldad pres, akeju cyjax cyibaj chej, cyucꞌix winkin mil soldad in che bet tuꞌn cykan, ex baj tkesin tbotxꞌil cykan cycyakil chej cabay, akeju jawolte carwaj, nok oꞌcx cyaj tcloꞌn txkan chej tuꞌn cyajben te jawol jun syent carwaj.

5 E pon naj aj Siria, akeju ateꞌ tuj tnam Damasco, tuꞌn cyoc ten onil te Hadad-ezer aju rey cye aj Soba, pero cub cyiꞌj aj Siria tuꞌn David, ex e cub tbyoꞌn 22 mil xinak aj Siria. 6 E cubtzun tkꞌoꞌn David junjun cꞌloj soldad te xkꞌukil tuj Siria aju at tuj tcwent Damasco, atzun cye aj Siria e cyaj ten tjakꞌ tcawbil ex chjet chojenj cyuꞌn. Ex a Kman o onin te David tuꞌn tcub cyiꞌj mastl tnam tuꞌn, nok jax jatum oc t-xiꞌ.

7 E tzaj tiꞌn David ke makbil kꞌan pwak, akeju in che ajben cyuꞌn ke xjal maꞌ cyoclen ateꞌ ttxlaj Hadad-ezer, ex e ul tiꞌn tuj Jerusalén. 8 Ax icx tzaj tiꞌn David txkan kꞌan cꞌuxbil tuj tnam Tibhat ex tuj tnam Cun, akeju tnam lu ateꞌtok tuj tcwent Hadad-ezer. Tiꞌjtzun ju kꞌan cꞌuxbil lu baj tbinchaꞌn Salomón ju pil matij, ax icx ke tkan ja, ex ke mastl macbil ax kꞌan cꞌuxbil tuꞌn cyajben tuj tja Dios.

9 Tejtzun tbinte Toi aju rey tuj tnam Hamat, ka otok cub cyiꞌj tuꞌn David cycyakil ke t-soldad Hadad-ezer aju rey tuj tnam Soba, 10 xi t-samaꞌn Toi jun tcyꞌajal, Adoram tbi, tuꞌn tpon tucꞌil David, tuꞌn t-xi tkꞌolbeꞌn ex tuꞌn t-xi tkꞌoꞌn chjonte te tuꞌnju otok tzꞌoc ten kꞌojlel tucꞌil Hadad-ezer ex otok cub tiꞌj tuꞌn, porque ax icx te Toi attok kꞌoj cyxol tucꞌil Hadad-ezer. Ax icx xi t-samaꞌn tcyakil txcaj macbil kꞌan pwak, sak pwak ex kꞌan cꞌuxbil cytxꞌotxꞌil te jun oyaj te David. 11 Atzunte David xi tkꞌoꞌn cycyakil ke macbil lu te Kman, junx tucꞌil ju kꞌan pwak ex sak pwak otok tzꞌel tiꞌn cye cycyakil nasyon lu: Cye aj Edom, cye aj Moab, cye aj Amón, cye aj Filistey ex cye aj Amalec.

12 Ax icx te Abisai aju tal Sarvia, e cub tbyoꞌn wajxak laj mil xinak aj Edom tuj lugar toc tbi Chkꞌajlaj te Atzꞌan. 13 Ex e cub tkꞌoꞌn David junjun cꞌloj soldad tuꞌn cyxkꞌukin tuj txꞌotxꞌ Edom, ex cycyakil aj Edom e cyaj ten tjakꞌ tcawbil. Ate Kman tzaj onin te David tuꞌn tcub cyiꞌj mastl tnam tuꞌn, nok jax jatum oc t-xiꞌ.

14 O cawin David cyibaj cycyakil aj Israel ex o tbincha tcyakil tuj tumelxix ex tuj ttxolil cye cycyakil tnam xjal. 15 Aju nejenel cye soldad, atzun Joab aju tal Sarvia; atzunte Josafat aju tcyꞌajal Ahilud, atzun aj tzꞌibal te rey. 16 Atzunte Sadoc aju tcyꞌajal Ahitob, ex Abimelec aju tcyꞌajal Abiatar, pal keꞌ; atzunte Savsa, atzun tzꞌibal tcyakilju in baj. 17 Atzunte Benaía aju tcyꞌajal Joiada, toctok te nejenel cyxol aj Ceretey ex aj Peletey, akeju cwentil te rey. Atzun ke tcyꞌajal David atzun ke maꞌ cyoclen ateꞌ ttxlaj.