—Bintza, akine najl kine tuj jun ja puro tbanil tzeꞌ wiꞌten, atzunju cax cꞌubl tley Dios tocxsaꞌn tuj jun ja xbalun.

2 Atzunte Natán xi ttzakꞌweꞌn:

—Binchama tcyakil ic tzaꞌnx ma cub t-ximana, porque a Dios tucꞌila.

3 Pero tujx konicꞌan lu, tzaj tmaꞌn Dios te Natán cyjaꞌ: 4 Txiꞌya tucꞌil nmajene David ex kꞌmanxa te: Chitzun Kman in tmaꞌn teya: Mya aya cjawil binchante jun njaye tuꞌn ntene tuj. 5 Atxix tuj kꞌij tej cyetz wiꞌne aj Israel tuj Ejipt, ex cucx jaꞌlo, mi jun maj ma chin tene tuj jun ja tbanil; nok oꞌcx ma chin tene tuj ja xbalun ex nok ma chin betjeꞌye. 6 Atxix ojtxi o chin bete cyucꞌil aj Israel, oc nkꞌoꞌne ke nejenel cyxol tuꞌn cycawin cyibaj, pero mi jun maj o txi nmaꞌne cye tuꞌn tjaw cybinchaꞌn jun ja te cꞌulbil weye, aju puro tbanil tzeꞌ wiꞌten. 7 Cyjaꞌtzun, kꞌmanxa te nmajene David: Akine Dios aju Tajaw Tcyakil in xi nmaꞌne jlu te: Ma tzꞌel wiꞌne tuꞌn miꞌn tpastorintla cyiꞌj ẍneꞌl tuj cojbil, tuꞌn toca te nejenel cye aj Israel, akeju etzan wuꞌne, 8 ma chin bete junx tucꞌila nok alcyex lugar jatum ma tzicꞌa tuj; ax icx o che cub baj nbyoꞌne ke aj kꞌoj, akeju e oc tzokpaj tiꞌja, ex cꞌelel tkanila wuꞌne tuꞌn cybinte xjal ka maꞌ toclena, ic tzaꞌn ke xjal maꞌ cyoclen ateꞌ tuj tcyakil twitz txꞌotxꞌ. 9 Ax icx o baj nbinchaꞌne jun lugar jatum tuꞌn cynajan aj Israel tuj, akeju etzan wuꞌne, ex ax ma che cub nkꞌoꞌne tuꞌn cynajan tuj cyex cytxꞌotxꞌ, tuꞌntzun mi jun tuꞌn tlabt cyiꞌj, ex mlay che yajlanjtz juntl maj cyuꞌn ke xjal binchal mya baꞌn, ic tzaꞌn nej, 10 tej cyoc nkꞌoꞌne ke nejenel tuꞌn cycawin cyibaj ke xjal etzan wuꞌne, akeju aj Israel. Wuꞌne cbel cyiꞌj cycyakil aj kꞌoj tiꞌja ex che cyjel ten tjakꞌ tcawbila. Ax icx cxel nmaꞌne teya, cchmetel cybaj ke tiyjila wuꞌne. 11 Octzun ttijina ex oc tcyima, akine chin oquel kꞌonte jun tcyꞌajala te rey, ex ccyuwsetel tcawbil wuꞌne, 12 ex atzunte cjawil binchante jun ja te cꞌulbil weye, ex akine chin cyuwsalte tcawbil te jumajx. 13 Akine chin oquel te tman ex atzunte cꞌoquel te ncꞌwaꞌle. Ex mlay tzꞌel npaꞌne ncꞌujlalile tiꞌj ic tzaꞌn o bant wuꞌne tiꞌj rey ten nej twitza; 14 nok oꞌcx ccyuwsetel wuꞌne tuj njaye te jumajx ex tuj ncawbile, ex cyxol ke tiyjil cucx cjawil nscꞌoꞌne jun tuꞌn toc te rey te jumajx, chi Kman, tzaj tmaꞌn te Natán.

15 Xi ttxꞌolbaꞌn Natán tcyakil jlu te David cabalxix ic tzaꞌnx otok til ex otok tbi. 16 Atzunte rey David ocx yolil tucꞌil Kman ex tma cyjaꞌ: Nman Dios, ¿alcyetzun kine ex ti cyoclen ke wiyjile, tuꞌnju ma tzaj tkꞌoꞌna woclene te rey? 17 Ex mya maꞌ ma tzꞌela jlu tuj twitza, Nman Dios; ax icx ma tzaj tmaꞌna aju cbajel cyiꞌj ke wiyjile tuj tkꞌijlalil tzul, ka che oquel te rey. Ma chin oc tkꞌoꞌna ic tzaꞌn jun xjal maꞌ toclen. 18 ¿Alcye mas yol baꞌn txi nmaꞌne teya tuꞌnju ma chin oc tkꞌoꞌna te jun xjal maꞌ toclen? Porque baꞌn tuꞌna alcye kine, akine tmajena. 19 Aya Nman, nok tuꞌnju at tcꞌujlalila wiꞌje, ex ic tzaꞌnx tajbila, ma tbinchaya tcyakil tbinchbena maꞌxix cyxilen tuꞌn tel nicꞌbaj cyiꞌj. 20 Aya Nman Dios, mi aꞌl juntl ic tzaꞌn teya, ex mi aꞌl juntl Dios at, nok oꞌcx aya, ic tzaꞌn tcyakilju o kbiye tiꞌja, 21 ex mintiꞌ juntl nasyon ic tzaꞌn cye aj Israel, akeju etzan tuꞌna, porque oꞌcxcu junx nasyon lu scꞌoꞌmaj tuꞌna tuj tcyakil twitz txꞌotxꞌ. Tuꞌna ma che tzokpet tuꞌn cyoc te jun tnam etzan tuꞌna, ex ma tzꞌel tkanil cyiꞌj ke tbinchbena nim cyipumal ex maꞌxix cyxilen. Tej cyetz tcolpiꞌna tuj Ejipt e icꞌ tlajoꞌna ke mastl nasyon cywitz, 22 porque tuꞌna ma che oc ke aj Israel te jun tnam etzan tuꞌna te jumajx; atzun teya, Nman, ma tzꞌoca te Cydios.

23 Cyjaꞌtzun Nman Dios, cyuwsama ju yol ma tzaj ttziyana weye ex cye ke wiyjile che ul itzꞌj te tibajxi, ex japunx tuꞌna aju ma tmaya. 24 Ex aju yol tzaj ttziyana, cuchiwt tuꞌn tjapun tuꞌna, ex aju tbiya cuchiwt cucx tuꞌn tjaw nimset te jumajx ex tuꞌn tkꞌmanjtz cyjaꞌ: Ate Kman aju Tajaw Tcyakil, atzun Cydios aj Israel, ex atzunju axix toc Cydios aj Israel. Ex cuchiwt tuꞌn miꞌn cycub yupj ke wiyjile che ul itzꞌj te tibajxi. 25 Aya Nman Dios, ma tzaj tmaꞌna weye ka che cyuwsetel ke wiyjile tuꞌna tuꞌn cyoc te rey; tuꞌntzun jlu, masque tmajena kine, ma nnimarin wibe tuꞌn ncubsane twitza. 26 Jaꞌlo Nman, aya Dios ma tzaj ttziyana tuꞌn ttzaj tkꞌoꞌna nimxix t-xtalbila weye, 27 cuchiwt baꞌn ma tzꞌela tuj twitza tuꞌn tcub tcyꞌiwlaꞌna ke wiyjile che oquel te rey te tibajxi, ex cucx tuꞌn cyten twitza. Aya Nman, ma che cub tcyꞌiwlaꞌna, ex cucx che cbel cyꞌiwlaꞌn te jumajx.