16
Cyjaꞌtzun tten tzaj cyiꞌn cax cꞌubl tley Dios, ex ocx cykꞌoꞌn tuj ja xbalun, aju otok jaw tbinchaꞌn David. Te tibajxi jlu xi cykꞌoꞌn oyaj patun in cub, ex xi cykꞌoꞌn chojbil te mojbabl tibil tucꞌil Kman. 2 Tejtzun tbaj tkꞌoꞌn David ke chojbil, e cub tcyꞌiwlaꞌn ke tnam xjal tuj tbi Kman, 3 ex xi tkꞌoꞌn cye cycyakil aj Israel, teyle te junjun, tzaꞌnx ke xinak, ax icx ke xuꞌj, jun pan, jun piẍ chibj ex jun piẍ cyloꞌ twitz uva tzkijsaꞌmaj.4 Atzunte David oc tkꞌoꞌn cyoclen junjun aj Leví tuꞌn cyajben twitz cax cꞌubl tley Dios, tuꞌn ttzaj cynaꞌn tbi Kman, tuꞌn t-xi cykꞌoꞌn chjonte te ex tuꞌn tjaw cynimsaꞌn tbi Cydios aj Israel. 5 Aju nejenel, atzun Asaf, atzun tcabin nejenel, atzun Zacarías, ex lepchix Jeiel, Semiramot, Jehiel, Matatías, Eliab, Benaía, Obed-edom, ex Jeiel; atzun ke jlu at cychinb quitar ex arpa. Atzunte Asaf nnoꞌc kꞌajtzante ke tal lak cꞌuxbil, 6 ex atzun ke pal Benaía, ex Jahaziel, cucxtok toc cykꞌajtzaꞌn chun twitz cax cꞌubl tley Dios.
Jun salmo te akꞌbil chjonte tuꞌn David
7 Tujxtzun kꞌij lu, xi tmaꞌn David tnejel maj te Asaf ex cye mastl tucꞌil tuꞌn t-xi cybitzan aju bitz lu te akꞌbil chjonte te Kman.
8 Cykꞌonxe chjonte te Kman ex che cubsane twitz. Cykꞌmanxe ke tbinchben cye tnam.
9 Che bitzane bitz te nimbil te ex che yoline cyiꞌj ke tbinchben maꞌ cyxilen.
10 Che tzalajxe tiꞌj tbi Dios Xjan, tzalajxwit cyanmi keju in che jyon tiꞌj Kman.
11 Ckaninxe onbil te Kman aju at tipumal; che lakꞌexe tucꞌil, ex ax che tene.
12 Cynaꞌntze ke tbinchben maꞌ cyxilen ex nim cyipumal, ex cynaꞌntze ke tley tzaj tmaꞌn.
13 Akeye tiyjil Israel aju tmajen Dios, ex akeye tcꞌwaꞌl Jacob, scꞌoꞌmaj keye tuꞌn,
14 atzun Kman jlu aju Kdios, ex a in cawin tibaj tcyakil twitz txꞌotxꞌ.
15 Masque ma tzicꞌ jun mil cꞌloj cyiyjil xjal, pero mlay tzicꞌ tnaꞌl tuꞌn aju tyol cyaj bant tiꞌj cyucꞌil.
16 Mlay tzicꞌ tnaꞌl tuꞌn aju tyol cyaj bant tiꞌj tucꞌil Abraham, aju tyol axix toc xi ttziyan te Isaac,
17 ex cyaj tcyuwsaꞌn ju yol lu te Jacob, tuꞌn toc ic tzaꞌn jun ley, ex cyaj tcyuwsaꞌn te jumajx te Israel.
18 Chi cyjaꞌ: Teya cxel nkꞌoꞌne aju txꞌotxꞌ Canaán tuꞌn toc te tetzbila.
19 Mya nim cybaj tej cyten tuj cytxꞌotxꞌ aj Canaán, stranjer xjal ke,
20 nok in che betjeꞌ tuj cytxꞌotxꞌ junjun nasyon ex tjakꞌ cycawbil junjun rey,
21 pero mintiꞌ xi tkꞌoꞌn Dios ambil tuꞌn cyyajlanjtz cyuꞌn mastl xjal, nokpe xi tmaꞌn cye rey cyjaꞌ:
22 Miꞌn tzꞌoc cykꞌoꞌn cykꞌabe cyiꞌj ke xjal scꞌoꞌmaj wuꞌne, ex miꞌn cybinchaye jun mya baꞌn cyiꞌj ke nsanjele.
23 Che bitzane te Kman cycyakile akeye najl twitz txꞌotxꞌ; cykꞌmanxe tcyakil kꞌij tkanil colbil tuꞌn,
24 che yoline tiꞌj tajwalil ex cyiꞌj ke tbinchben maꞌxix cyxilen, cykꞌmanxe ke jlu cye cycyakil xjal ex cye cycyakil nasyon,
25 porque ate Kman maꞌ t-xilen ex baꞌn tuꞌn tjaw nimset tbi. Mas tuꞌn kxob twitz cywitz ke mastl cydios xjal.
26 Ke tilbilal nnoꞌc cydiosin xjal mintiꞌ cyajben, atzunte Kman, a o binchante cyaꞌj,
27 txolin tiꞌj tuꞌn tajwalil ex tuꞌn t-spicꞌumal; at nim tipumal ex tzalajbil tuj tnajbil.
28 Cycyakile, akeye xjal najl twitz txꞌotxꞌ, cynimsaꞌnctze tbi Kman, cynimsaꞌnctze tbi tuꞌnju at tipumal ex tajwalil.
29 Cykꞌonxe nimbil te Kman tuꞌnju maꞌ t-xilen; cyiꞌntz cyoyaje ex che lakꞌetze twitz; che cꞌulune twitz Kman tuꞌnju tbanilxix te ex xjan te.
30 Cycyakile, akeye xjal najl twitz txꞌotxꞌ, che luꞌlune tuꞌn cyxobile twitz. Tuꞌn cub tkꞌoꞌn t-simyentil txꞌotxꞌ tuꞌn miꞌn tyucch.
31 Baꞌn tuꞌn ttzalaj cyaꞌj ex txꞌotxꞌ; baꞌn tuꞌn t-xi kꞌmaꞌn cyuj ke nasyon: Ate Kman Rey.
32 E tjulin mar tucꞌix tcyakilju at tuj. Baꞌn tuꞌn cytzalaj ke cojbil tucꞌix tcyakilju at cyuj.
33 E cyjaw schꞌin ke tzeꞌ tuj chcꞌul tuꞌn tzalajbil twitz Kman, aju tzul tuꞌn tcawin twitz txꞌotxꞌ.
34 Cykꞌonxe chjonte te Kman, porque puro baꞌn te, ex aju tcꞌujlalil cucx at te jumajx.
35 Ex cymanxe: Ko tcloma, aya Dios Clol keye. Ko tchmon oca ex kꞌin ajtza koꞌye cyuj ke nasyon, tuꞌntzun tjaw knimsaꞌne tbiya xjan ex tuꞌn tjaw knimsaꞌna tucꞌil tzalajbil.
36 Nimanxwit tbi Kman aju Kdios akoꞌ aj Israel, tuj tcyakil tabkꞌiyil. Che chi, baj cybitzan.
Ex cycyakiltzun tnam xjal xi cytzakꞌweꞌn: Icxwitju, ex e octzun ten nimsal tbi Kman.
37 Cyjaꞌtzun cyaj kꞌoꞌn Asaf tuꞌn David cyucꞌix mastl tucꞌil, tuꞌn cyajben tcyakil kꞌij twitz cax cꞌubl tley Dios, nok alcyex jun tiꞌxti il tiꞌj tuꞌn tbant junjun kꞌij, 38 ex cyaj kꞌoꞌn Obed-edom tuꞌn David cyucꞌix mastl tucꞌil, 68 cybaj, tuꞌn cyajben junx cycyakil, tucꞌix juntl Obed-edom aju tcyꞌajal Jedutún, ex tucꞌix Hosa. Atzun ke cabe lu e cyaj tkꞌoꞌn te cwentil ttzi tja Dios. 39 Ax icx aju pal Sadoc cyucꞌix ke mastl pal in che ajben tucꞌil, e cyaj tkꞌoꞌn David twitz ja xbalun te Kman, tuj lugar te cꞌulbil at tuj Gabaón, 40 tuꞌntzun t-xi cykꞌoꞌn te Kman aju oyaj patun in cub tibaj altar tcyakil kꞌij, prim ex kale, ic tzaꞌnx tzꞌibamaj tuj tley Kman, aju cyaj tmaꞌn tuꞌn tbant cyuꞌn aj Israel. 41 Ax icx cyaj tkꞌoꞌn David Hemán ex Jedutún cyucꞌil, cyucꞌix ke mastl xjal otok che jaw scꞌoꞌn, ex otok jaw t-schꞌin cybi, tuꞌn cybitzan cyjaꞌ: Cykꞌonxe chjonte te Kman, tuꞌnju at tcꞌujlalil te jumajx. 42 Atzun ke jlu in che kꞌajtzantok chun ex ke tal lak cꞌuxbil, cyucꞌix mastl chnab te tmoj cybitz keju in che bitzan tbi Kman. Atzun ke tcyꞌajal Jedutún cycyajsaꞌn ke te cwentil ttzi ja.
43 Te tibajxi jlu cycyakil aj Israel e aj cyja; ax icx te David aj tja tuꞌn cycub tcyꞌiwlaꞌn keju ateꞌ tuj tja.