Cykꞌonxe chjonte te tuꞌnju baꞌn te, ex cucx cꞌujlaꞌn koꞌ tuꞌn te jumajx.

2 ¿Alcye jun jacu tzaj kꞌmante ke takꞌunben Kman maꞌxix cyipumal? ¿Alcye jun jacu jaw nimsante te tuꞌnju at nim t-xtalbil?

3 At tzalajbil cye keju in che bet tuj tumelxix ex cucx in cybinchaꞌn aju tzꞌaklxix.

4 Bix chin tzaj tnaꞌna Nman oc tbinchanteya baꞌn cye ke xjal etzan tuꞌna; bix chin ule tiꞌj tcꞌuꞌja oc ttzaja clol cye,

5 tuꞌntzun twile aju cytzalajbil keju scꞌoꞌmaj tuꞌna, tuꞌntzun ntzalaje ex tuꞌn tjaw nnimsaꞌne tbiya junx cyucꞌil ke xjal etzan tuꞌna.

6 Ma ko binchane il ic tzaꞌnx ke kxeꞌchele; ma ko el tzpete; ma kbinchaye mya baꞌn.

7 Tej cyten ke kxeꞌchele max tuj Ejipt, mya nim toclen ela tuj cywitz ke tbinchbena maꞌxix e bant; icꞌ tnaꞌl cyuꞌn aju tcꞌujlalila maꞌxix, ex jaw cyiꞌn cyib tiꞌja ttzi Mar Cyak Queꞌyin.

8 Pero tuꞌn Dios e clet, ex xi tyecꞌun tipumal tuꞌn tjaw nimsaꞌn tbi.

9 Xi tmayoꞌn aju Mar Cyak Queꞌyin ex aj tzkij tuꞌn. Ex e icꞌtz tiꞌn max t-xeꞌpun mar, mer ic tzaꞌn tuj tzkij txꞌotxꞌ.

10 Cyjaꞌtzun e clet tuꞌn cywitz aj kꞌoj cyiꞌj, ex tjakꞌ cyipumal keju in che icꞌun cyiꞌj.

11 Ke aj kꞌoj cyiꞌj e cyaj mulkꞌaj tjakꞌ aꞌ ex mi jun cye o cyaj ankꞌin.

12 Xitzun cyniman ke yol otok tzaj ttziyan Dios ex xi cybitzan ke bitz te nimbil te.

13 Pero jurat icꞌ cynaꞌl ke tbinchben Dios cyuꞌn, ex mintiꞌ cub cyyoꞌn tuꞌn tel cynicꞌ tiꞌj alcye otok cub t-ximan tuꞌn tbant.

14 Nim pon cycꞌuꞌj tiꞌj cychiꞌ tuj tzkij txꞌotxꞌ; oc cykꞌoꞌn Dios tuj malbil.

15 Tzaj tkꞌoꞌn Dios aju xi cykanin, pero ax icx tzaj t-samaꞌn jun yabil cyiꞌj, ex nim xjal e cyim tuꞌn.

16 Tuj lugar jatum e cub ten, tzaj tloꞌch cycꞌuꞌj tiꞌj Moisés, ax icx tiꞌj Aarón, aju otok tzꞌel tpaꞌn Kman tuꞌn tajben te.

17 Eltzun cꞌabchaj txꞌotxꞌ ex xi tzꞌak Datán tuj, tucꞌix Abiram, cyucꞌix ke xjal ateꞌtok junx tucꞌil.

18 Jaw julin kꞌakꞌ cyiꞌj cycyakil keju otok che oc lpeꞌ cyiꞌj; tuꞌn tkan kꞌakꞌ lu e baj tzꞌeꞌy ke xjal mya baꞌn.

19 T-xe witz Horeb ocx cykꞌoꞌn kꞌan pwak tuj kꞌakꞌ tuꞌn tcub ulj, ex tiꞌjtzun jlu cub cybinchaꞌn tilbilal jun tal tor ex e cꞌulun twitz.

20 Cyaj cycolin Dios aju maꞌ tajwalil; te t-xel cub cybinchaꞌn jun tilbilal wacẍ baꞌn waꞌn cꞌul.

21 Icꞌ tnaꞌl Dios cyuꞌn, aju Clol cye, aju otok tbincha ke binchben maꞌxix tuj Ejipt,

22 ex otok tbincha ke binchben maꞌxix cyxilen tuj cytxꞌotxꞌ tiyjil Cam, ax icx tuj Mar Cyak Queꞌyin.

23 O yolin Dios tiꞌj tuꞌn cynaj tuꞌn; pero ate Moisés aju scꞌoꞌmaj tuꞌn oc ten yolil cyiꞌj tuꞌn miꞌn cynaj, ex o chewix ttxꞌuꞌjil Dios cyiꞌj, cyjaꞌtzun icꞌx tiꞌj tuꞌn cynaj.

24 Mas yajxi el cyicꞌun aju txꞌotxꞌ tbanilxix, ex mintiꞌ xi cyniman ke yol otok tzaj ttziyan Dios;

25 tuj cyja, xbalun ja, e yolin mya baꞌn tiꞌj Kman, ex mintiꞌ xi cyniman aju otok tzaj tmaꞌn.

26 Tuꞌn ttziꞌ xi tmaꞌn jun yol axix toc cyiꞌj, tuꞌn cycyim tuꞌn ax tuj tzkij txꞌotxꞌ,

27 ex tuꞌn cynaj ke cyiyjil che ul itzꞌj te tibajxi, ex tuꞌn cyxi t-sputun cyxol ke nasyon mya ocslal ke tiꞌj Dios.

28 Tuj lugar Peor oc cyjunin cyib cyucꞌil keju in che cꞌulun twitz tilbilal Baal, ex xi cychyoꞌn cychibjal ke alumaj in cub kꞌoꞌn cywitz ke tilbilal.

29 Tzaj tkꞌoj Dios cyiꞌj tuꞌn tlaj cybinchben mya baꞌn, tzaj jun cꞌixbisabl cyxol ex nim xjal e cyim.

30 Atzunte Finees jaw weꞌ ex cub tbyoꞌn aju binchan il, cyjaꞌtzun weꞌ aju cꞌixbisabl ex mintiꞌtl e cyim.

31 Baꞌn eꞌla tbinchben Finees tuj twitz Dios, ex cucx tuꞌn ttzaj naꞌn tuꞌn Dios te jumajx.

32 Ax icx tzaj tkꞌoj Dios cyiꞌj xjal tuꞌn tlaj cybinchben mya baꞌn ttzi aꞌ tuj Meriba, ex tuꞌn cye cylaj tzaj jun mya baꞌn tiꞌj Moisés,

33 porque otok baj tpasens cyuꞌn ex o yolin mya tuj tumel.

34 Mintiꞌ cub cyxitun ke tnam otok tma Kman tuꞌn tcub cyxitun.

35 Oꞌcx baj cysmon cyib cyucꞌil ke xjal mya ocslal tiꞌj Dios ex o bant cye cyuꞌn aju in bant cyuꞌn xjal;

36 e cꞌulun cywitz ke tilbilal nnoꞌc cydiosin xjal, ex tuꞌn jlu e naj,

37 xi cykꞌoꞌn ke cycyꞌajal ex ke cymeꞌjel te jun chojbil cye juꞌẍ.

38 Cub cybyoꞌn ke cꞌwaꞌl mintiꞌ cyil, ax ke cycyꞌajal ex ke cymeꞌjel, ex xi cykꞌoꞌn te chojbil cye ke tilbilal nnoꞌc cydiosin xjal tuj Canaán. Cyjaꞌtzun o tzꞌilix txꞌotxꞌ tuꞌn cychcꞌel,

39 e tzꞌilix ke xjal lu tuꞌn tcyakilju cybinchben mya baꞌn ex el cypaꞌn cyib tiꞌj Dios.

40 Tzajxix tkꞌoj Kman tiꞌj tnam etzan tuꞌn, ex e jeꞌl ticꞌun;

41 e jeꞌx tkꞌoꞌn tjakꞌ cycawbil ke nasyon mya ocslal ke, ex cub cyiꞌj cyuꞌn ke aj kꞌoj cyiꞌj;

42 e baj yajlaꞌn cyuꞌn ke aj kꞌoj cyiꞌj ex biꞌx e cyaj ten tjakꞌ cycawbil.

43 Nimcu maj e clet tuꞌn Dios, atzun cye mintiꞌ xi cyniman aju ximamajtl tuꞌn, ex e jeꞌx tzꞌak tujx cybinchben mya baꞌn.

44 Masque icju, pero tej ttzaj tqueꞌyin Dios aju yajbil cye ex tej tbinte tkꞌajkꞌajel cywiꞌ in che okꞌ,

45 tzaj tnaꞌn aju yol cyaj bant tiꞌj tuꞌn cyucꞌil ex chꞌexpettzun tnabl, porque maꞌxix tcꞌujlalil:

46 ex tma cye keju otok che camban cyiꞌj tuꞌn cycub xtalin cyuꞌn.

47 Ko tcloma Kman Dios. Ko tiꞌn exa cyuj ke nasyon tuꞌntzun tjaw knimsaꞌne tbiya xjan, ex tuꞌn ktzalaje nim oc tjaw knimsaꞌne.

48 Tuj tcyakil tabkꞌiyil nimanxwit te Kman aju Cydios aj Israel. Ex tuꞌn cymante cycyakil: Bant-xwit icju.

Nimanxwit tbi Kman.