2 Cymanxe jlu akeye ma che clet tuꞌn Kman ex ma che clete tuj cykꞌab aj kꞌoj,

3 akeye ma che ajtz chmoꞌne tuꞌn cyuj mastl tnam te jawni ex te cubni, te ocni ex te elni.

4 At junjun otok cheꞌx tzpet tuj tzkij txꞌotxꞌ mintiꞌ cynajbil xjal tuj, ex mintiꞌ cnet jun be cyuꞌn tuꞌn cypon tuj jun tnam jatum tuꞌn cynajan;

5 tzaj weꞌyaj ex txketleꞌn cyiꞌj, ex chꞌixtok cynaj,

6 pero tuꞌnju nim cybis e oc ten cubsal twitz Kman ex e clet tuj bis tuꞌn;

7 e jeꞌxtzun ẍakluꞌn tuꞌn tuj jun be jikun tiꞌj tuꞌn cypon tuj jun tnam jatum tuꞌn cynajan.

8 Baꞌn tuꞌn t-xi cykꞌoꞌn chjonte te Kman tuꞌnju at tcꞌujlalil, ex tiꞌj t-xtalbil in tbinchaꞌn cyiꞌj xjal.

9 Porque nneꞌl txketleꞌn cyiꞌj xjal tuꞌn, ex in xi tkꞌoꞌn nim cywa keju nneꞌl cycꞌuꞌj.

10 At junjun najltok ke tuj jun nintz klolj, presintok ke tuꞌn caden ex ateꞌtok tuj bis.

11 Tzaj jlu cyiꞌj tuꞌnju mintiꞌ xi cyniman tyol Kman aju Maꞌxix Toclen, ex el cyicꞌun aju t-ximbetz baꞌn cyiꞌj.

12 Cub tkꞌoꞌn Dios jun akꞌuntl cyuwxix cyibaj, e jaw tzꞌak ex mi jun onin cyiꞌj.

13 Pero tuꞌnju nim cybis e oc ten cubsal twitz Kman ex e clet tuj bis tuꞌn;

14 e jeꞌtz kꞌiꞌn tuꞌn tuj nintz klolj ex e jeꞌl tcoꞌpin tuj caden.

15 Baꞌn tuꞌn t-xi cykꞌoꞌn chjonte te Kman tuꞌnju at tcꞌujlalil, ex tiꞌj t-xtalbil in tbinchaꞌn cyiꞌj xjal.

16 Baj tpaꞌn ke tlamel ja kꞌan cꞌuxbil, ex e cub ttokin ke cꞌuxbil tocsaꞌn ttzi tventanil pres.

17 At junjun e yabt ex tzaj yajbil cyiꞌj tuꞌn tlaj cybinchben mya baꞌn ex cyil,

18 tcꞌiꞌtok cycꞌuꞌj tiꞌj wabj porque chꞌixtok cycyim.

19 Pero tuꞌnju nim cybis e oc ten cubsal twitz Kman ex e clet tuj bis tuꞌn;

20 tuꞌnju tyol tzaj tmaꞌn, biꞌx e banix ex e clet tuꞌn te camic.

21 Baꞌn tuꞌn t-xi cykꞌoꞌn chjonte te Kman tuꞌnju at tcꞌujlalil, ex tiꞌj t-xtalbil in tbinchaꞌn cyiꞌj xjal.

22 Baꞌn tuꞌn t-xi cykꞌoꞌn oyaj te, te akꞌbil chjonte, ex tuꞌn cybitzan tuꞌn tzalajbil tiꞌj tbinchben.

23 At junjuntl e jeꞌx aj jyol cycꞌaꞌẍ ttzi mar, ex in che bet tibaj mar tuj cybarc,

24 o cyil aju tbinchben Kman maꞌ t-xilen tibaj mar.

25 Tej ttzaj yolin Kman, tzaj jun nintz cykꞌikꞌ ex jaw pulwin mar tuꞌn;

26 ke barc in che jaw ikan lekꞌch wen tuꞌn aꞌ, ex in che cuꞌx aj max t-xe aꞌ in jaw pulwin, biꞌx tzaj baj cycꞌuꞌj ke xjal kꞌil barc tuꞌn tlaj aꞌ xobajilxix.

27 In che pichꞌjeꞌ ic tzaꞌn cꞌal kꞌeꞌn; masque at nim cynabl tuꞌn cyyucun barc pero oc te nokx gan.

28 Pero tuꞌnju nim cybis tzaj e oc ten cubsal twitz Kman ex e clet tuj bis tuꞌn.

29 Biꞌx taqueꞌ cykꞌikꞌ tuꞌn Kman ex mintiꞌ jaw pulwintl mar.

30 Tej cyqueꞌyinte cub numeꞌ mar, e jaw tzalaj ex e pon kꞌiꞌn tuꞌn Dios max tuj tnam tcub ttzi mar, jatum ximan cyuꞌn tuꞌn cypon.

31 Baꞌn tuꞌn t-xi cykꞌoꞌn chjonte te Kman tuꞌnju at tcꞌujlalil, ex tiꞌj t-xtalbil in tbinchaꞌn cyiꞌj xjal.

32 Baꞌn tuꞌn tjaw cynimsaꞌn tbi oc toc cychmon cyib xjal, ex tuꞌn t-xi cykꞌoꞌn chjonte te oc toc cychmon cyib ke cytijil xjal.

33 In che aj tzkij ke nima ex ke twi aꞌ tuꞌn Kman ex in che oc te tzkij txꞌotxꞌ.

34 In che oc ke tbanil txꞌotxꞌ tuꞌn te meba txꞌotxꞌ tuꞌn tlaj cybinchben xjal mya baꞌn, akeju najl twitz;

35 aju tzkij txꞌotxꞌ nnoꞌc te nintz najab tuꞌn, ex atzun in che jatz jlet ke twi aꞌ tuj,

36 atzun in che cub tkꞌoꞌn keju mintiꞌ in canun cywa, ex in jaw cybinchaꞌn cytanmi tuj.

37 In cuꞌx cyawaꞌn cyawal tuj cojbil, in cuꞌx cyawaꞌn tkan uva, ex nim twitz cyawal in jaw cychmoꞌn.

38 In che cub cyꞌiwlaꞌn tuꞌn Kman, in chmet cybaj ex in che chmet ke cyalun.

39 Katzun ma che cyim ex ka nok nicꞌx cybaj in cyaj ten tuꞌn tlaj yajbil cye cyuꞌn mastl xjal, ex tuꞌn tlaj cybis ex tuꞌn tlaj cꞌixcꞌoj in tzaj cyiꞌj,

40 nneꞌltzun ticꞌun Dios keju in che yajlan cye, ex in che tacpajeꞌ tuꞌn tuj lugar mintiꞌ cynajbil xjal tuj, jatum mintiꞌ be.

41 In che clet ke meba xjal tuꞌn, tuꞌn miꞌn cyten tuj bis, ex in chmet mas cybaj tuꞌn, ic tzaꞌn txkan ẍneꞌl.

42 Oc cyqueꞌyinte ke xjal tzꞌaklxix tcyakil jlu in che jaw tzalaj, atzun keju binchal mya baꞌn mintiꞌtl in che kꞌajt.

43 Aju xjal at tnabl, baꞌn tuꞌn toc tcwent tiꞌj jlu, ex baꞌn tuꞌn tel tnicꞌ tiꞌj tcꞌujlalil Kman.