2 Cyiꞌmel cywatle akeye chnab arpa ex quitar; oc chin jawil weꞌye naꞌnxtok ttzaj t-xe cyaꞌj.

3 Nman, oc cjawil nnimsaꞌna tucꞌil bitz, cyxol ke tnam ex ke nasyon.

4 Porque maꞌxix tcꞌujlalila ic tzaꞌn ju cyaꞌj. Ex aju tyola axix toc max in japun canun twitz cyaꞌj.

5 Nman Dios tcuba tibaj cyaꞌj; nojni twitz txꞌotxꞌ tuꞌn tajwalila.

6 Ko ttzakꞌwentza; ko tcloma tuꞌn tipumala, tuꞌntzun cytzokpet keju cꞌujlaꞌn tuꞌna.

7 Max tzaj yolin Dios tuj tja xjan ex tma: Tucꞌil tzalajbil cbajel npaꞌne tuj piẍin aju txꞌotxꞌ Siquem ex cbajel npaꞌne ju chkꞌajlaj Sucot.

8 Aju txꞌotxꞌ Galaad ex txꞌotxꞌ Manasés weye ke; aju txꞌotxꞌ Efraín ic tten te weye ic tzaꞌn jun pasbil cꞌuxbil tjax tuj nwiꞌye te makbil; aju txꞌotxꞌ Judá ic tten te weye ic tzaꞌn nvare tuꞌn ncawine;

9 aju txꞌotxꞌ Moab ic tten te weye ic tzaꞌn jun palangán jatum tuꞌn tel ntxꞌjoꞌne ke nkane; ex tibaj txꞌotxꞌ Edom cxel nxoꞌne nxajbiye te jun techal ka otok tzꞌoc te weye; oc chin jawil schꞌine tuꞌnju otok chin cambane cyiꞌj aj Filistey.

10 ¿Alcye cxel kꞌinte weye tuj tnam toc muro tiꞌj? ¿Alcye cxel ẍaklunte weye tuꞌn npone max tuj Edom?

11 Nman Dios, ma ko el ticꞌuna, mintiꞌtl nneꞌtza cyucꞌil ke ksoldadiye.

12 Ko tonintza tuꞌn tcub cyiꞌj aj kꞌoj kiꞌje, porque mintiꞌx tajben aju onbil cyuꞌn xjal.

13 Nok tuꞌnju onbil tuꞌn Dios oc ko cambale; ex tuꞌn cbel cyiꞌj aj kꞌoj kuꞌne.