2 porque ke xjal nicꞌal yol ex ke xjal mya baꞌn in che yolin mya baꞌn wiꞌje, ex mya ax toc aju in cymaꞌn.

3 Txolin wiꞌje cyuꞌn ke xjal in che yolin yol te icꞌbil; in che oc tzokpaj wiꞌje ex mintiꞌ wile.

4 At ncꞌujlalile cyiꞌj, atzun cye in che oc tzokpaj wiꞌje; pero weye in chin naꞌne Dios.

5 Mya baꞌn chojbil weye tzaj cykꞌoꞌn te t-xel aju baꞌn nbinchaye cye, ex te t-xel ncꞌujlalile ma chin el icꞌune cyuꞌn.

6 Kꞌon oca jun jwes mya baꞌn tuꞌn toc xjal lu tuj xjel tuꞌn, ex tuꞌn tcub t-sentens ax tuꞌnju xjal toc te yolil tiꞌj.

7 Oc toc tuj xjel tzꞌocwit at til; tuꞌnxwit tyol te colbil tib cub t-sentens.

8 Nicꞌxwit kꞌij tzꞌankꞌin ex juntlxwit txi cꞌmonte toclen.

9 E cycyaj ten ke tcꞌwaꞌl mintiꞌ cyman ex aju t-xuꞌjil e toc te meba xuꞌj.

10 E cyoc tcyꞌajal te moꞌl ex tuꞌn cyel labt ke nok jachak. E cyex lajet tuj ttxꞌakan cyja.

11 Txiꞌwt tiꞌn kꞌol chꞌex tcyakilju at te. Awt xjal mi ojtzkiꞌn tuꞌn txi kꞌinte twitz takꞌunben.

12 Mintiꞌwt jun xjal tzaj tzꞌeꞌy tcꞌuꞌj tiꞌj ex mi cyiꞌj ke tcꞌwaꞌl oc cycyaj ten mintiꞌ cyman.

13 Biꞌxwit che cub baj ke tiyjil, e tnaj cybi te jumajx.

14 Tzajxwit tnaꞌn Kman aju mya baꞌn tbincha tman xjal lu ex miꞌnxwit cub najsaꞌn til ttxuꞌ;

15 cucxwit tzaj tnaꞌn Kman aju cyil ex miꞌnwt tzaj naꞌntl cybi xjal lu tzalu twitz txꞌotxꞌ.

16 Mintiꞌx cub t-ximan tuꞌn ttzaj tzꞌeꞌy tcꞌuꞌj cyiꞌj xjal; nok oꞌcx e baj tyajlaꞌn ke meba ex keju mintiꞌ cyipun ex keju in che bisun, ex e cub tbyoꞌn.

17 Tuꞌnju mas o tajbe tuꞌn t-xi tkanin jun mya baꞌn tibaj juntl, icxwittzun te e ttzaj mya baꞌn tibaj. Mintiꞌ o tajbe tuꞌn tcub tcyꞌiwlaꞌn juntl, ex miꞌnxwittzun cub cyꞌiwlaꞌn te.

18 Oꞌcx o kanin tuꞌn ttzaj mya baꞌn cyibaj xjal; ic tten mya baꞌn te te ic tzaꞌn t-xbalun toc, ocx tuj tcꞌuꞌj ic tzaꞌn aꞌ ex ocx tuj tbakil ic tzaꞌn aseyt;

19 e toc txayin tiꞌj ic tzaꞌn tuꞌn jun xbalun ex e toc jatzꞌoꞌn tcꞌuꞌj mer ic tzaꞌn tuꞌn jun sinch.

20 Icwit tten cub cycastiw ke aj kꞌoj wiꞌje tuꞌn Kman ex keju in che yolin mya baꞌn wiꞌje.

21 Atzun teya Nman, chin t-xtalin cuba tuꞌn tjaw nimsaꞌn tbiya. Chin tcloma tuꞌnju t-xtalbila ex tcꞌujlalila.

22 Jumajx meba kine ex in chin bisune, ma tzaj taꞌw tuj wanmiye.

23 Niban ncub naje ic tzaꞌn jun xlecun, in chinx jawoꞌne tuꞌn cykꞌikꞌ mer ic tzaꞌn jun ẍplon.

24 Tuꞌnju mintiꞌ in chin waꞌne, in che jaw luꞌlun ke nkane ex ma tzꞌoc wiꞌje.

25 Ma chin oque te cytzebl xjal. Oc tcyil kine, in xi cyyucun cywiꞌ tuꞌn cyxmayin wiꞌje.

26 Chin tonintza Nman Dios, chin tcloma tuꞌn tcꞌujlalila,

27 tuꞌntzun tel cynicꞌ xjal tiꞌj ka tuꞌna o che bant ke jlu tuꞌn tkꞌaba.

28 Ma bant-x ka ma tzaj cykanin mya baꞌn wibaje, atzun teya chin bel tcyꞌiwlaꞌna. Tzajxwit cychꞌixwi, atzun weye chin tzalajele, akine tmajena.

29 Tzajxwit cychꞌixwi ke aj kꞌoj wiꞌje. Ex e toc txayin cyiꞌj tuꞌnju chꞌixbil ic tzaꞌn tuꞌn jun xbalun.

30 Tuꞌn ntziꞌye cucx cxel nkꞌoꞌne nim chjonte te Kman; cjawil nnimsaꞌne cyxol nimcu xjal.

31 Porque ate in colin cyiꞌj ke meba ex in che clet tuꞌn tuj cykꞌab keju in che cub kꞌonte cysentens.