4 Ke tcyꞌajal Job in cybinchaꞌntok tuꞌn toc jun nintz waꞌn tuj cyja teyle junjun; jun maj tucꞌil jun, juntl maj tucꞌil juntl, ex iclex in bant cyuꞌn. Oc nnoꞌc waꞌn cyuꞌn, in tzaj cytxcoꞌn keju ox cyanb tuꞌn cywaꞌn cyucꞌil. 5 Octzun tjapun baj junjun maj twiꞌ nintz waꞌn, in tzaj ttxcoꞌn Job ke tcyꞌajal, ex oc tjaw weꞌ te prim in cub tpatun ke alumaj te chojbil cyil ke tcyꞌajal teylex junjun. In binchet jlu tuꞌn Job porque in cub t-ximan: Mya yajcu ma che ximan ke ncyꞌajale mya baꞌn tiꞌj Dios ex ma che binchan il, chi Job.

6 At jun kꞌij tej cypon ke anjel twitz Dios, tucꞌix Satanás pon cyxol. 7 Xi tkanin Kman te Satanás:

—¿Jatum saja?

Xi ttzakꞌweꞌn Satanás:

—Ma baj nbetine tcyakil twitz txꞌotxꞌ; tzyet-x wuꞌne tuj jun pacꞌ ttxaꞌn txꞌotxꞌ ex ma pon baj tuj juntl pacꞌ.

8 Xitzun tmaꞌn Kman te:

—¿Mape tila nmajene Job? Mi aꞌl juntl xjal twitz txꞌotxꞌ in pon ic tzaꞌn te, in ankꞌin tuj tumelxix ex tzꞌaklxix, baꞌn niman weye, ex tpaꞌn tib tiꞌj mya baꞌn.

9 Xi ttzakꞌweꞌn Satanás:

—Baka nok cucx in ajben teya. 10 Baka mya tuꞌnju mintiꞌ in takꞌa ambil tuꞌn ttzaj jun mya baꞌn tiꞌj, mi cyiꞌj keju ateꞌ tuj tja ex mi tiꞌj tcyakilju at te; cyꞌiwlaꞌn tuꞌna tcyakilju in tbinchaꞌn, ex tuꞌn jlu ma che chmet-xix ke talun tuj txꞌotxꞌ lu. 11 Kꞌiꞌn elchaka tcyakilju at te, ex jacutzun tila ka mi xyolin mya baꞌn tiꞌja twitzcuya.

12 Xitzun ttzakꞌweꞌn Kman te Satanás:

—Ax baꞌn, binchama alcye taja tuꞌn tbant tiꞌj tcyakil tiꞌxti at te, atzun tiꞌjcu miꞌn tbinchaya jun mya baꞌn.

Etztzun Satanás twitz Kman.

13 At jun kꞌij matok in che icꞌsan ke tcyꞌajal Job ex ke tmeꞌjel jun nintz waꞌn tuj tja cytzic, 14 pon jun majen ma tja Job ex xi tkꞌoꞌn tkanil lu te:

—Matok in ko chꞌoquine txꞌotxꞌ tuj cojbil cyucꞌil ke wacẍ, ex atzun ke bur in che waꞌntok nikayin, 15 tej minaben ẍe pon ke xjal aj Sabey ex ma cheꞌx cyelkꞌaꞌn ke wacẍ ex ke bur, ex ma che cub cybyoꞌn ke mastl wucꞌile tuꞌn spad. Oꞌcxcu akine ẍin tzokpaj tuꞌn wule kꞌolte tkanil tucꞌila, chi majen.

16 Naꞌnxtok tbaj yolin majen lu tej tpon juntl majen ex tma:

—Xcub jun kꞌancyok ex biꞌx ẍe cyim ke pastor tuꞌn, cyucꞌix ke ẍneꞌl. Oꞌcxcu akine ma chin clet tuꞌn wule kꞌolte tkanil tucꞌila.

17 Naꞌnxtok tbaj yolin majen lu tej tpon juntl majen ex tma:

—At ox cꞌloj aj Caldey ẍe oc tzokpaj kꞌojlel kiꞌje ex ma cheꞌx cyelkꞌaꞌn ke chej camey, atzun ke mastl wucꞌile ma che cub byoꞌn tuꞌn spad. Oꞌcxcu akine ma chin tzokpaj tuꞌn wule kꞌolte tkanil tucꞌila.

18 Naꞌnxtok tbaj yolin majen lu tej tpon juntl ex tma:

—Ke tcyꞌajala ex ke tmeꞌjela matok in che icꞌsan jun nintz waꞌn ma tja ju nej tcyꞌajala, 19 tej minaben saj jun nintz cykꞌikꞌ tuj tzkij txꞌotxꞌ, ex ma cub tilj ja cyibaj ke tcꞌwaꞌla, porque tuj tcyajil pacꞌ tiꞌj ja saj cykꞌikꞌ. Cycyakil ma che cyim; oꞌcxcu akine ma chin clet tuꞌn wule kꞌolte tkanil tucꞌila.

20 Jawtzun weꞌ Job, ex tuꞌnju tzaj nim tbis el t-sbitꞌun t-xbalun ex el tmatzoꞌn ttzmal twiꞌ; cub ẍmejeꞌ ex pon tacl tibaj twitz max twitz txꞌotxꞌ tuꞌn tcꞌulun te Dios. 21 Ex tma:

—Mi jun tiꞌxti kꞌiꞌn wuꞌne tej wul itzꞌje, ex mi jun tiꞌxti kꞌiꞌn wuꞌne oc wicꞌe twitz txꞌotxꞌ. Ate Kman saj kꞌonte tcyakil weye, ex ax te Kman ma tzꞌel kꞌinte tcyakil. Nimanxwit tbi Kman.

22 Masque tzaj tcyakil jlu tiꞌj Job, pero mintiꞌ jun il o tbincha ex mintiꞌ o yolin mya baꞌn tiꞌj Dios.