3 Tuj toxin abkꞌi ttzyetlen tcawin rey Asuero, oc jun nintz waꞌn tuꞌn cye cycyakil keju at cyoclen ttxlaj, cye keju in che onin tiꞌj tuj tcawbil, cye ke nejenel cye soldad aj Persia ex aj Media, ex cye ke gobernador ex ke nejenel cyuj ke partament, 4 tuꞌntzun t-xi tyecꞌun aju tkꞌinumabl ex aju toclen tcawbil, ex tuꞌn t-xi tyecꞌun tipumal maꞌxix toclen. Ex aju ninkꞌij lu kak xjaw o ten. 5 Tejtzun tbaj ninkꞌij lu, o tbincha rey juntl wuk kꞌij ninkꞌij tuj ttxaꞌn peꞌn jatum tcub tkan bech twitz tja. Cycyakil keju najlke tuj tnam Susa, tzaꞌnx keju maꞌ cyoclen ax icx keju chꞌin cyoclen, e jeꞌx txcoꞌn waꞌl tuj nintz waꞌn lu. 6 Aju ttxaꞌn peꞌn otok baj adornarin cyuꞌn ke xbalun tbanilxix sak ex chaꞌx che queꞌyin, cꞌaloꞌn ke cyuꞌn ke takꞌal binchamaj tiꞌj nokꞌ lino ex juntl wik nokꞌ ẍjulin queꞌyin, cyexsaꞌn ke cyuj ke argoy sak pwak, ex cꞌaloꞌn ke cyiꞌj ke tkan ja abj mármol cytxꞌotxꞌil. Ax icx otok cub cykꞌoꞌn ke kꞌukbil kꞌan pwak ex sak pwak cytxꞌotxꞌil, ex te piso cycubtok ke tal abj tbanilxix, junxilchak che queꞌyin. 7 Xi kꞌoꞌn cycꞌa xjal cyuj ke copa kꞌan pwak cytxꞌotxꞌil; teyle junjun copa partchak binchben cye, ex nimtok taꞌl twitz uva at aju otok tzaj tkꞌoꞌn rey, tuꞌnju at nim tgan tuꞌn t-xi tkꞌoꞌn cye xjal. 8 Masque icju, pero otok txi tkꞌoꞌn rey orden cye keju in che ajben tuj tja tuꞌn miꞌn toc cykꞌoꞌn il cyiꞌj xjal tuꞌn cycꞌan vin, nok oꞌcx teyle junjun tuꞌn tcꞌan nok nicꞌpun taj. 9 Ax icx te Vasti aju t-xuꞌjil rey Asuero, bant jun nintz waꞌn tuꞌn, te cye cycyakil ke xuꞌj ateꞌ tuj tja rey.

10 Tujtzun twukin kꞌij ninkꞌij, tej in tzalajtok rey wen tuꞌnju vin otok baj tcꞌaꞌn, e jeꞌx t-samaꞌn wuk xinak in che ajben te ex kꞌukl tcꞌuꞌj cyiꞌj, ex atzun ke jlu: Mehumán, Bizta, Harbona, Bigta, Abagta, Zetar ex Carcas. 11 Xi tmaꞌn cye tuꞌn tpon cyiꞌn Vasti aju t-xuꞌjil max twitz, tbinchan tib wen ex tjaxsaꞌn tcoron tuj twiꞌ, tuꞌntzun cyjaw labin tnam xjal tiꞌj, ax icx ke xjal maꞌ cyoclen, oc cylonte ka mejorxix queꞌyin; ex ax toc tbanilxix queꞌyin t-xuꞌjil rey. 12 Atzunte Vasti aju t-xuꞌjil rey mintiꞌ xi tniman aju orden otok txi tkꞌoꞌn rey cye ke xinak kꞌuklxix tcꞌuꞌj cyiꞌj. Tzajtzun nimxix tkꞌoj rey, ex tzaj nim ttxꞌuꞌjil, 13 ex xi tkanin cye ke xjal at cynabl tiꞌj ley, como jun costumr jlu, ka at jun tiꞌxti in baj tiꞌj rey, in xiꞌ naj kanil te cye ke xjal at cynabl tiꞌj ley ex tiꞌj alcye tuꞌn tbant. 14 E tzajtzun ttxcoꞌn rey ke xinak lu: Carsena, Setar, Admata, Tarsis, Meres, Marsena ex Memucán; atzun ke wuk xinak lu maꞌxix cyoclen tuj Persia ex tuj Media, ex attok cyoclen tuj tcawbil rey ex attok cyoclen tuꞌn cyocx yolil tucꞌil rey nok alcyex or. 15 Xitzun tkanin rey cye:

—¿Ti in tmaꞌn ley, ti cbantel wuꞌne tiꞌj nxuꞌjile Vasti, tuꞌnju mintiꞌ ma txi tniman aju orden xi kꞌmaꞌn te cyuꞌn ke nsanjele?

16 Ex cywitztzun keju at cyoclen tuj tcawbil rey, xi ttzakꞌweꞌn Memucán te rey cyjaꞌ:

—Tat rey, aju t-xuꞌjila Vasti mya oꞌcx tiꞌja ma tbincha mya baꞌn, ax icx cyiꞌj cycyakil keju at cyoclen tuj cawbil ex cyiꞌj cycyakil xjal ateꞌ cyuj ke partament ateꞌ tjakꞌ tcawbila. 17 Cbinjtzel cyuꞌn cycyakil xuꞌj aju ma tbincha t-xuꞌjila, ex tuꞌn jlu mlay txi cyniman xuꞌj cychmil, ex oclo cymaꞌ cyjaꞌ: Ate rey Asuero xi txocbaj Vasti tuꞌn, aju t-xuꞌjil, ex atzunte t-xuꞌjil mintiꞌ xi tniman. 18 Oc cybinte cyxuꞌjil keju at cyoclen tuj Persia ex tuj Media aju ma tbincha t-xuꞌjila, oclo che oquel ten yolil tiꞌj biꞌx jaꞌlo tucꞌil cychmil, ex tuꞌntzun jlu ctzajel icꞌbil ex kꞌoj cyxol. 19 Cyjaꞌtzun, ka baꞌn tuj twitza Tat Rey, kꞌoꞌn exa jun ley aju mlay cub kꞌuchj, tuꞌn tcyaj tzꞌibet tuj cyley aj Persia ex aj Media, ex atzun ley jlu: Ya mintiꞌtl toclen Vasti aju t-xuꞌjil rey tuꞌn tpon juntl maj yecꞌul tib twitz rey. Ex aju toclen te t-xuꞌjil rey cꞌelel kꞌit ex cxel kꞌot te juntl xuꞌj mas baꞌn ic tzaꞌn te. 20 Aju ley cbantel tuꞌna il tiꞌj tuꞌn tbinjtz cyuꞌn cycyakil xjal ateꞌ tjakꞌ tcawbila, cyjaꞌtzun cycyakil xuꞌj cbantel cyniman cychmil, ka maꞌ toclen cychmil ex ka chꞌin toclen, chi Memucán.

21 Aju nabl xi tkꞌoꞌn Memucán baꞌn eꞌla tuj twitz rey, ax icx baꞌn eꞌla tuj cywitz keju at cyoclen tuj tcawbil, ex banttzun jlu tuꞌn rey. 22 E jeꞌxtzun t-samaꞌn rey ke uꞌj cyuj cycyakil partament jatum ponin baj tcawbil, tzꞌibamaj tuj cyyol xjal te teyle junjun partament ic tzaꞌnx tzꞌibbil te cyyol xjal cyuj cycyakil tnam ateꞌ tjakꞌ tcawbil, ex aju uꞌj lu il tiꞌj tuꞌn tjaw schꞌit cywitz cycyakil xjal tuj cyex cyyol. Xi tmaꞌn tuj uꞌj: Teyle junjun chmilbaj, a tuꞌn tcawin tuj tja.