4 Otok tzꞌel kꞌij tuj tcwenttok pal Eliasib taꞌ ke ja tuj tja Dios jatum cꞌuꞌn ke oyaj, ex tuꞌnju otok tzꞌoc tamiwin tib Eliasib tucꞌil Tobías, 5 cyjaꞌtzun otok txi tkꞌoꞌn jun cwart matij te, jatum nnoꞌcx cꞌuꞌt tcyakil oyaj nej, ex atzun ke jlu: Storac, ke macbil, aju tlajiꞌn nneꞌl kꞌiꞌn tiꞌj twitz triw, tiꞌj taꞌl twitz uva ex tiꞌj aseyt, aju kꞌmaꞌmaj tuꞌn t-xi kꞌot cye aj Leví, cye bitzal ex cye ke xkꞌukil ttzi tja Dios, ax icx jatum in xi cꞌuꞌt aju onbil in xi kꞌot cye ke pal. 6 Mi aꞌltok kine tuj Jerusalén tej tbaj jlu, porque tej otok bant 32 abkꞌi ttzyetlen tcawin Artajerjes aju rey te Babilonia, in aj meltzꞌaje tucꞌil tuj Babilonia ex tbajlenxi elaꞌ kꞌij, xi nkanine permis te, 7 ex in ajtztzune juntl maj tuꞌn wule tuj Jerusalén. Atzun el nnicꞌe tiꞌj aju mya baꞌn otok tbincha Eliasib, tuꞌnju otok txi tkꞌoꞌn jun cwart matij te Tobías, aju cwart tcub twitz tja Dios. 8 A jlu mya baꞌn eꞌla tuj nwitze, cyjaꞌtzun e jeꞌtz wiꞌne tcyakil tiꞌxti te Tobías tocxsaꞌn tuj cwart lu, 9 ex xi nkꞌoꞌne orden tuꞌn t-sakset cwart, ex tuꞌn tocx cykꞌoꞌn juntl maj tuj cwart lu, ke macbil in che ajben tuj tja Dios, ke oyaj ex storac.

10 Ax icx o nbiye ka mintiꞌ otok txi cykꞌoꞌn xjal cyoyaj, aju banimaj tiꞌj tuꞌn t-xi kꞌot cye aj Leví; ex tuꞌn jlu, ke aj Leví ex ke bitzal, akeju at cyoclen tuꞌn cykꞌoꞌn cꞌulbil, teyle junjun otok tzꞌaj ok tuj tex ttxꞌotxꞌ. 11 E octzun wicꞌleꞌne ke cawil, tuꞌnju otok cyaj cycolin tja Dios. Te tibajxi e oc nchmoꞌne ke pal ex ke aj Leví, ex cyaj bant cyten wuꞌne juntl maj tuj cyakꞌun. 12 Ex cycyakil xjal aj Judá ul cyiꞌn juntl maj tlajiꞌn tiꞌj twitz triw, tiꞌj taꞌl twitz uva ex tiꞌj aseyt, tuj ja te cꞌubl oyaj. 13 E cyajtzun nkꞌoꞌne ke ja cꞌubl twitz awal tuj tcwent pal Selemías, tucꞌix Sadoc aju aj tzꞌibal, ex tucꞌix jun aj Leví Pedaías tbi, ex oc nkꞌoꞌne Hanán te onil cye, aju tcyꞌajal Zacur ex tal tchman Matanías, porque cycyakil jlu kꞌuklxix ncꞌuꞌje cyiꞌj. Atzun ke at cyoclen tuꞌn tcub cysipan ke oyaj cyxol ke cyucꞌil. 14 Nman Dios: Chin tnaꞌntza tiꞌj ju ma bant wuꞌne ex miꞌn tzicꞌ tnaꞌl tuꞌna ju baꞌn ma nbinchaye tiꞌj tjaya ex cyiꞌj ke cꞌulbil.

15 Tuj tkꞌijlalil lu, o wile tuj Judá at junjun xjal in che wabin twitz uva tuj jun choc tuꞌn tbant vin tuj kꞌij te ojlabl, ex at in che ikan triw tuj cheꞌlin tten, ax icx at nnoꞌc cykꞌoꞌn ke bur ikal taꞌl twitz uva, ex ke rasim twitz uva tucꞌix twitz higo ex tcyakil txcaj iktz tuꞌn t-xi cycꞌayin tuj Jerusalén, ax tuj kꞌij te ojlabl. E octzun wicꞌleꞌne tuꞌnju in che cꞌayin tuj kꞌij lu. 16 Ax icx at junjun xjal aj Tiro, akeju ax najlke tuj Jerusalén, in pon cyiꞌn cyiẍ ex tcyakil txcaj cꞌaẍjel, in che cꞌayin tiꞌj cye xjal Judiy tuj Jerusalén tuj kꞌij te ojlabl. 17 E octzun wicꞌleꞌne ke nejenel cye xjal aj Judá ex xi nmaꞌne cye cyjaꞌ:

—¿Tikuꞌn ma cybinchaye mya baꞌn, tuꞌnju ma tzꞌoc cykꞌoꞌne kꞌij te ojlabl te mintiꞌ tajben? 18 Atzun jlu cybincha ke cyxeꞌchele, ex tuꞌntzun jlu ma tzaj tiꞌn Kman nimcu mya baꞌn kibaj ex tibaj tnam lu. ¿Myapetzun tuꞌn ttzaj mas tkꞌoj Dios cyiꞌj aj Israel tuꞌnju ma tzꞌoc cykꞌoꞌne kꞌij te ojlabl te mintiꞌ tajben?

19 Xi nmaꞌne cye tuꞌn cylamet naj ke tpwertil tnam Jerusalén, oꞌcx oc toc kax tuj viernes ex max tuꞌn cyjaket ocxi tex kꞌij sábado. E cub nkꞌoꞌne junjun xjal ajbel weye ttzi tpwertil tnam, tuꞌn miꞌn toctz mi jun iktz tuj kꞌij te ojlabl. 20 Ke comersyant ex ke cꞌayil, ex jun konicꞌan cyuꞌn jun maj, ex ka cab maj, tiꞌjxi tnam Jerusalén. 21 Pero in yoline cyucꞌil tiꞌj jlu, ex e oc wicꞌleꞌne tuꞌnju e cyaj tan twitz muro te tnam, ax icx xi maꞌne cye: Ka ma cybinchaye juntl maj icju, che oquex nkꞌoꞌne pres, nchiye. Atxixtzun ya mintiꞌtl e ul tuj kꞌij te ojlabl. 22 Te tibajxi xi nkꞌoꞌne orden cye aj Leví tuꞌn tbaj cyxjansan cyib ex tuꞌn cyxiꞌ xkꞌukil cye tpwertil tnam, tuꞌntzun miꞌn tbant jun mya baꞌn tuj kꞌij te ojlabl. Nman Dios: Chin tnaꞌntza tiꞌj jlu ex kꞌakꞌantz tcꞌuꞌja wiꞌje, ic tzaꞌn tcꞌujlalila nimxix.

23 Ax icx tuj tkꞌijlalil lu o wile attok junjun xjal Judiy otok che mojeꞌ cyucꞌil ke xuꞌj aj Asdod, aj Amón ex aj Moab; 24 ex mij cycꞌwaꞌl in che yolin tuj cyyol aj Asdod ex ka tuj cyyol mastl nasyon, pero mintiꞌ baꞌn cyyol xjal Judiy cyuꞌn. 25 In yoline cyucꞌil tiꞌj jlu ex tzaj nkanine mya baꞌn cyibaj; at junjun e baj ncꞌixbisaꞌne ex jatz nbakoꞌne ttzmal cywiꞌ, ex e oc nlajwersine tuꞌn t-xi cytziyan jun yol axix toc twitz Dios, tuꞌn miꞌn txi cykꞌoꞌn ambil cye cymeꞌjel tuꞌn cymojeꞌ cyucꞌil cycyꞌajal stranjer xjal, ex tuꞌn miꞌn ttzaj cyiꞌn cymeꞌjel stranjer xjal te t-xuꞌjil cycyꞌajal, ex tuꞌn miꞌn cyoc ke xuꞌj stranjer xjal te cyex cyxuꞌjil. Ax icx xi nmaꞌne cye: 26 Atzun il jlu tbincha Salomón aju rey cye aj Israel. Mi jun rey cyuj mastl nasyon pon ic tzaꞌn te, o cꞌujlanjtz tuꞌn Dios ex oc kꞌoꞌn te rey cyibaj cycyakil aj Israel. Masque icju, pero nok tuꞌn cylaj ke xuꞌj stranjer xjal, binchan rey Salomón il. 27 Cyjaꞌtzun miꞌn wajtle tuꞌn nbinteye tiꞌj matij il in cybinchaꞌne twitz Kman Dios, tuꞌnju in che mojeꞌye cyucꞌil ke xuꞌj stranjer xjal, nchiye cye.

28 At jun tcyꞌajal Joiada ex tal tchman tnejel pal Eliasib, otok tzꞌoc te tjiꞌ Sanbalat aju aj Bet-horón; biꞌx ex nlajoꞌne kꞌa lu tuꞌn miꞌn ttentl nwitze. 29 Nman Dios, naꞌntza cyil ke pal ma baj cytzꞌilsaꞌn cyoclen ex ma che icꞌ tibaj yol cyaj bant tiꞌj tuꞌna cyucꞌil ke pal ex ke aj Leví.

30 Cyjaꞌtzun, xi nkꞌoꞌne orden cye tuꞌn tel cypaꞌn cyib tiꞌj tcyakil mya baꞌn in cybinchaꞌn stranjer xjal, ex banttzun cyuꞌn icju. Banttzun cyten ke pal ex ke aj Leví wuꞌne tuj cyturn, teyle junjun alcye tuꞌn tbant tuꞌn. 31 Ax icx cyaj bant tiꞌj wuꞌne alcye tuꞌn ttzaj kꞌinte siꞌ tuj kꞌij banin tiꞌj ex tuꞌn ttzaj cyiꞌn xjal tnejel twitz cyawal. Nman Dios: Chin tnaꞌntza ex kꞌontza t-xtalbila wibaje.