Atzun cybi ke pal jlu: Seraías, Jeremías, Esdras, 2 Amarías, Maluc, Hatús, 3 Secanías, Rehum, Meremot, 4 Iddo, Gineto, Abías 5 Mijamín, Maadías, Bilga, 6 Semaías, Joiarib, Jedaías, 7 Salú, Amoc, Hilcías ex Jedaías. Atzun ke nejenel cye ke pal jlu ex nejenel ke cye keju at cyxilen cyucꞌil tuj tkꞌijlalil Jesúa.

8 Ke aj Leví atzun ke jlu: Jesúa, Binúi, Cadmiel, Serebías, Judá ex Matanías, cyucꞌix ke cyucꞌil; atzun ke at cyoclen tuꞌn cybitzan bitz te nimbil te Dios; 9 tucꞌix Bacbuquías ex Uni, ax cabetl cyucꞌil jlu, ex atzun ke in che cub ten cywitz tuj juntl pacꞌ oc in che bitzan.

10 Ate Jesúa tman Joiacim, atzunte Joiacim tman Eliasib, atzunte Eliasib tman Joiada, 11 atzunte Joiada tman Jonatán, ex atzunte Jonatán tman Jadúa.

12 Ke pal nejenel ke cye junjun cꞌloj pal at cyxilen cyucꞌil tuj tkꞌijlalil Joiacim, atzun ke jlu: Aju nejenel cye tiyjil Seraías, atzun Meraías; aju nejenel cye tiyjil Jeremías, atzun Hananías; 13 aju nejenel cye tiyjil Esdras, atzun Mesulam; aju nejenel cye tiyjil Amarías, atzun Johanán; 14 aju nejenel cye tiyjil Melicú, atzun Jonatán; aju nejenel cye tiyjil Sebanías, atzun José; 15 aju nejenel cye tiyjil Harim, atzun Adna; aju nejenel cye tiyjil Meraiot, atzun Helcai; 16 aju nejenel cye tiyjil Iddo, atzun Zacarías, aju nejenel cye tiyjil Ginetón, atzun Mesulam; 17 aju nejenel cye tiyjil Abías, atzun Zicri; aju nejenel cye tiyjil Miniamín ex te Moadías, atzun Piltai; 18 aju nejenel cye tiyjil Bilga, atzun Samúa; aju nejenel cye tiyjil Semaías, atzun Jonatán; 19 aju nejenel cye tiyjil Joiarib, atzun Matenai; aju nejenel cye tiyjil Jedaías, atzun Uzi; 20 aju nejenel cye tiyjil Salai, atzun Calai, aju nejenel cye tiyjil Amoc, atzun Eber; 21 aju nejenel cye tiyjil Hilcías, atzun Hasabías; aju nejenel cye tiyjil Jedaías, atzun Natanael.

22 Tzꞌibamaj cybi ke nejenel cye junjun cꞌloj aj Leví at cyxilen cyxolx, ax icx cye pal, atxix tuj tkꞌijlalil Eliasib, Joiada, Johanán ex Jadúa, tejxi tcawin Darío aju aj Persia. 23 Ke nejenel cye junjun cꞌloj aj Leví at cyxilen cyxolx, atzun tzꞌiban cybi tuj uꞌj jatum taꞌ tcyakilju txꞌolbaben tiꞌj cyakꞌunben, ex ul baj tuj tkꞌijlalil Johanán aju tcyꞌajal Eliasib. 24 Ke nejenel cye aj Leví, atzun ke jlu: Hasabías, Serebías, Jesúa aju tcyꞌajal Cadmiel, cyucꞌix ke cyucꞌil in che cub ten cywitz tuj juntl pacꞌ, in jaw cynimsaꞌn tbi Kman ex in xi cykꞌoꞌn chjonte te oc in tzaj cytzakꞌweꞌn tuj cybitz, ic tzaꞌn kꞌmaꞌmaj tuꞌn David aju tmajen Dios. 25 Ex akeju in che xkꞌukin cytzi tlamel ja cꞌubl twitz awal, atzun ke jlu: Matanías, Bacbuquías, Obadías, Mesulam, Talmón ex Acub. 26 Ake jlu e ten tuj tkꞌijlalil Joiacim aju tcyꞌajal Jesúa ex tal tchman Josadac, ex tuj tkꞌijlalil gobernador Nehemías ex tuj tkꞌijlalil Esdras aju pal ex xnakꞌtzal tiꞌj ley.

27 Tejtzun tpon kꞌij tuꞌn ticꞌset tkꞌijlalil muro toc tiꞌj Jerusalén, e jyonjtz ke aj Leví tuj tcyakil lugar jatum najlke, e jeꞌxtzun kꞌiꞌn tuj Jerusalén tuꞌn ticꞌset tkꞌijlalil muro tucꞌil tzalajbil, tuꞌn tjaw nimset tbi Dios tucꞌil bitz ex cyucꞌil chnab, lak cꞌuxbil, quitar ex arpa. 28 Ex oc cychmon cyib ke bitzal, akeju najlke tiꞌjele Jerusalén cyucꞌix keju ateꞌ cyuj ke aldey te Netofa, 29 cyucꞌix keju ateꞌ tuj Bet-gilgal, cyucꞌix keju ateꞌ tuj cojbil at tuj Geba ex tuj Azmavet; porque akeju bitzal otok che cub ten najal cyuj ke aldey ateꞌ tiꞌjele Jerusalén. 30 Tejtzun tbaj cyxjansan cyib ke pal ex ke aj Leví, e oc ten xjansal cye tnam xjal, cyucꞌix ke tpwertil tnam ex ju muro.

31 Te tibajxi xi nmaꞌne tuꞌn cyjax ke nejenel cye aj Judá twi muro, ex e oc nkꞌoꞌne cabe cꞌloj bitzal nim cyajlal. Aju tnejel cꞌloj cyjaꞌ e jeꞌx bet tibaj muro tuj bankꞌabaj tumlal pwert jatum nneꞌx chitet tzꞌis. 32 Cyiꞌjxi ke bitzal, lepchix t-xiꞌ Osaías, cyucꞌil mij nejenel cye aj Judá, 33 tucꞌix Azarías, Esdras, Mesulam, 34 Judá, Benjamín, Semaías ex Jeremías. 35 Ke pal ateꞌ cyucꞌil, akeju in che kꞌajtzan chun, atzun ke jlu: Zacarías aju tcyꞌajal Jonatán, ate Jonatán tcyꞌajal Semaías, atzunte Semaías tcyꞌajal Matanías, atzunte Matanías tcyꞌajal Micaías, atzunte Micaías tcyꞌajal Zacur, ex atzunte Zacur tcyꞌajal Asaf. 36 Ke mastl cyerman atzun ke jlu: Semaías, Azarael, Milalai, Gilalai, Maai, Natanael, Judá ex Hanani, ex atzun ke jlu in che kꞌajtzan ke chnab, ic tzaꞌn ke chnab e ajben tuꞌn David aju tmajen Dios, ex atzunte Esdras aju xnakꞌtzal tiꞌj ley, nejnitok cywitz. 37 Tej cypon jatum taꞌ Pwert Twi Aꞌ tbi, e jeꞌx bettl ex e jax cywiꞌ ke grad aju in japun jatum taꞌ tnam toc tbi Ttanmi David, ex cucx e jax tuꞌn cyjapun jatum cub ten tja rey David, tejxi cyjapun jatum taꞌ Pwert Cye Aꞌ tbi, aju tcub tumlal tjawitz kꞌij. 38 Atzun tcabin cꞌloj bitzal cyjaꞌ e jeꞌx bet tuj nayaj, lepch nxiꞌye cyiꞌj tcabin cꞌloj bitzal tibaj muro cyucꞌil mijtl xjal, xiꞌx keꞌ kuꞌne jatum tcubsaꞌn ja maꞌ twaꞌl, Ja te Jorni tbi, ex o pone jatum taꞌ Muro Maꞌ Twitz; 39 ex o icꞌe jatum cycubsaꞌn ke pwert lu: Aju Pwert Efraín tbi, Pwert Jesana tbi, Pwert cye Cyiẍ tbi, ex jatum taꞌ ja maꞌ twaꞌl Hananeel tbi, tucꞌix ju ja maꞌ twaꞌl Hamea tbi, max o pon baje jatum tcubsaꞌn Pwert cye Ẍneꞌl tbi, ex o cub weꞌye jatum tcubsaꞌn Pwert te Xkꞌukbil. 40 Atzun ke cabe cꞌloj bitzal e pon tuj tja Dios, teyle junjun cꞌloj tuj cyex cylugar; ax icx weye cyucꞌix mij cawil, akeju in che bet junx wucꞌile.

41 Ke pal in che kꞌajtzan chun, atzun ke jlu: Eliacim, Maaseías, Miniamín, Micaías, Elioenai, Zacarías ex Hananías, 42 Maasías, Semaías, Eleazar, Uzi, Johanán, Malquías, Elam ex Ezer. Ke bitzal in che bitzantok junx, ex aju nejenel cye, atzun Israhías.

43 Tuj kꞌij lu xi cykꞌoꞌn nimcu chojbil, atzun cye xjal nimxix e tzalaj porque a Dios tzaj kꞌonte nimxix tzalajbil tuj chjkꞌajlaj. Ax icx ke xuꞌj ex ke cꞌwaꞌl nimxix e tzalaj, ex aju tzalajbil baj tuj Jerusalén o binjtz cyuj ke lugar mas najchak.

44 Tuj tkꞌijlalil lu oc kꞌoꞌn cyoclen junjun xinak tuꞌn cycwentin ke ja te cꞌubl oyaj aju in pon cyiꞌn xjal, ex tuꞌn tjaw cychmoꞌn tnejel cywitz awal ex ke tlajiꞌn nneꞌl cypaꞌn xjal tiꞌj ju at cye, tuꞌntzun tajben cye pal ex cye aj Leví ic tzaꞌn in tmaꞌn ley, ex tuꞌntzun tocx cycꞌuꞌn cyuj ke cꞌubl, porque ke xjal aj Judá in che tzalajtok cyiꞌj ke pal ex cyiꞌj aj Leví, tuꞌnju in che ajben tuj cyajbebl. 45 Tzaꞌnx cye, ax icx ke bitzal ex ke xkꞌukil ttzi tja Dios, o japun cyuꞌn aju ajbebl tuj takꞌun Dios, ex tuj cycwent tuꞌn tbaj cysaksaꞌn tcyakil, ic tzaꞌnx banimaj tiꞌj tuꞌn David ex tuꞌn Salomón aju tcyꞌajal. 46 Atxix ojtxi tej tten Asaf tuj tkꞌijlalil rey David, ateꞌtok ke nejenel cye ke bitzal, akeju in che bitzan bitz te nimbil te Dios ex te kꞌobl chjonte te.

47 Cyjaꞌtzun tuj tkꞌijlalil tej tten Zorobabel, ax icx tej tten Nehemías, cycyakil aj Israel xi cykꞌoꞌn twitz cyawal teyle junjun kꞌij, tuꞌn tajben te cye ke bitzal ex cye ke xkꞌukil ttzi tja Dios; ax icx xi cykꞌoꞌn cye aj Leví aju at cyoclen tiꞌj, ax icx cye aj Leví nneꞌl cypaꞌn chꞌin tiꞌj ju otok cycꞌam, tuꞌn t-xi cykꞌoꞌn cye ke pal, akeju tiyjil Aarón.