Jaw scꞌoꞌn Ester tuꞌn toc te t-xuꞌjil rey
2
Tbajlenxi jlu, chewix tkꞌoj rey Asuero ex ul Vasti tiꞌj tcꞌuꞌj, ax icx ul tiꞌj tcꞌuꞌj aju otok tbincha Vasti ex tiꞌj ley in yolin tiꞌj, aju otok tzꞌex tkanil cyxol xjal. 2 Entons ke xjal maꞌ cyoclen tuj tcawbil rey xi cymaꞌn cyjaꞌ: E cyxi joybaj ke kꞌapoj naꞌnx cylonte xinak ex tbanilxix che queꞌyin tuꞌn cyul twitza. 3 Kꞌoꞌn oca junjun nejenel cyuj cycyakil partament ateꞌ tjakꞌ tcawbila, ex atzun ke che tzajel kꞌinte cye txin tuj ja banimaj tuꞌna cye xuꞌj tuj tnam Susa, tuꞌn cycyaj ten tuj tcwent Hegai aju xinak kꞌukl tcꞌuꞌja tiꞌj ex cwentil cye xuꞌj, ex ax cxel kꞌonte tcyakilju cꞌajbel cye tuꞌn tbaj cybinchan cyib. 4 Alcyetzun jun kꞌapoj mas nimxix tganiya tiꞌj, atzunju cꞌoquel te t-xuꞌjila tuꞌn tcyaj ten te t-xel Vasti aju t-xuꞌjilbena, che chi.Aju nabl lu baꞌn ela tuj twitz rey ex banttzun jlu tuꞌn.
5 Tuj tnam Susa najltok jun xjal Judiy Mardoqueo tbi, tcyꞌajal Jair, atzunte Jair tcyꞌajal Simei, atzunte Simei tcyꞌajal Cis, aju tzajni tiyjil tiꞌj Benjamín. 6 Otok txi kꞌiꞌn Cis tuj Babilonia tuꞌn rey Nabucodonosor, tej cyex kꞌiꞌn xjal Judiy tuj Jerusalén junx tucꞌil Jeconías aju rey te Judá. 7 Attok jun tmeꞌjel terman tman Mardoqueo, otok cyim tman ex ttxuꞌ, ex tej cycyim tman txin oc tkꞌoꞌn Mardoqueo txin lu ic tzaꞌn tmeꞌjel. Hadasa tbi txin lu ex ax juntl tbi Ester; ex tbanilxix queꞌyin. 8 Tej tex chicꞌbaꞌn aju ley otok bant tuꞌn rey, nimcu kꞌapoj e oc chmoꞌn tuj tja rey aju at tuj tnam Susa, ex e cyaj ten tuj tcwent Hegai aju cwentil cye xuꞌj; cyxoltzun ke jlu ajuntok te Ester. 9 Nimxix o tzalaj Hegai tiꞌj txin lu, ex tuꞌntzunju, o xtalinjtz Ester tuꞌn. Xi tkꞌoꞌn Hegai tcyakilju at tuꞌn tajben tuꞌn tbaj tbinchan tib Ester ex xi tkꞌoꞌn tbanil chibj te. Ax icx e oc tkꞌoꞌn wuk txin te ajbel te, scꞌoꞌmaj ke cyxol ke mastl txin ateꞌ tuj tja rey; ex cyxol ke ja banimaj cye xuꞌj tuꞌn rey, xi tkꞌoꞌn Hegai aju ja mas tbanilxix te Ester, tuꞌn tten tuj, junx cyucꞌil ke txin.
10 Mintiꞌ xi tmaꞌn Ester alcye ke t-xjalil ex alcye tiyjil, porque otok txi kꞌmaꞌn te tuꞌn Mardoqueo tuꞌn miꞌn t-xi tmaꞌn. 11 Nok in betjeꞌtok Mardoqueo tcyakil kꞌij ttxaꞌn peꞌn te ja banimaj cye xuꞌj tuꞌn rey, tuꞌntzun tbinte ka baꞌn taꞌ Ester ex alcyetok in binchanjtz tiꞌj.
12 Ex cycyakil kꞌapoj il tiꞌj tuꞌn tbaj cybinchan cyib tuj cablaj xjaw. Tuj kak xjaw oc cysuꞌn aseyt tiꞌj cyximlal, aju aseyt nneꞌl tiꞌj tzeꞌ mirra tbi, ex tuj kaktl xjaw oc cykꞌoꞌn perjum cyiꞌj tucꞌix crem, aju in ajben cyuꞌn xuꞌj. Tejtzun tjapun baj twiꞌ jlu, teylex te junjun kꞌapoj xiꞌ yecꞌul tib twitz rey Asuero, tuj turn cyten. 13 Oc t-xiꞌ junjun kꞌapoj yecꞌul tib twitz rey, in xi kꞌoꞌn ambil te tuꞌn t-xi tiꞌn nok alcye tajbil tuꞌn toc tkꞌoꞌn tiꞌj oc tex tuj cyja xuꞌj tuꞌn tpon tuj tja rey. 14 Teyle junjun txin in xiꞌ tuj tja rey te konicꞌan; octzun kskix te juntl kꞌij in xiꞌtzun txin tuj juntl ja banimaj tuꞌn rey cye tcab t-xuꞌjil, ex atzun Saasgaz cwentil cye, aju xjal lu kꞌukl tcꞌuꞌj rey tiꞌj. Te tibajxi jlu mintiꞌtl in xiꞌ txin yecꞌul tib twitz rey, oꞌcx jacu txiꞌ ka ma tzalaj rey tiꞌj ex ka ma txocli tuꞌn.
15 Tejtzun tpon kꞌij tuꞌn t-xiꞌ Ester yecꞌul tib twitz rey, mintiꞌ jun tiꞌxti xi tiꞌn, nok oꞌcx aju xi tmaꞌn Hegai te tuꞌn toc tkꞌoꞌn tiꞌj. Cycyakil xjal in che oc queꞌyinte Ester in che tzalaj tiꞌj, porque tbanilxix queꞌyin ex baꞌn tmod. Ate Ester tmeꞌjel Abihail aju terman tman Mardoqueo. 16 Tuj tlajin xjaw, ex ka aju xjaw Tebet tbi, tej otok bant wuk abkꞌi ttzyetlen tcawin rey Asuero, xi kꞌiꞌn Ester tuj tja rey tuꞌn t-xi tyecꞌun tib twitz. 17 Masxix o t-xoꞌ tgan rey Asuero tiꞌj Ester cywitz mastl kꞌapoj; cyjaꞌtzun tten cꞌujlanjtz Ester tuꞌn rey Asuero ex nimxix cub xtalin Ester tuꞌn cywitz mastl kꞌapoj otok che pon aj tucꞌil; jax tkꞌoꞌn rey Asuero coron tuj twiꞌ Ester ex oc tkꞌoꞌn te t-xuꞌjil te t-xel Vasti aju t-xuꞌjilben. 18 Banttzun jun nintz waꞌn tuꞌn rey Asuero te nimbil te Ester, ex e tzaj ttxcoꞌn cycyakil keju at cyoclen ttxlaj ex cycyakil ke onilte tuj tcawbil, ex ajtz lakꞌeꞌ chojenj tuꞌn, aju in chjet cyuꞌn xjal cyuj ke partament, ex xi t-sipan nimcu oyaj, ic tzaꞌn in bant cyuꞌn rey at nim cykꞌinumabl.
El tnicꞌ Mardoqueo cyiꞌj jun cꞌloj xjal cyajbiltok tuꞌn tcub byoꞌn rey cyuꞌn
19 Tej cyoc chmoꞌn ke txin tcabin maj, kꞌukltok Mardoqueo ttzi tpwertil tja rey. 20 Naꞌnxtok t-xi tmaꞌn Ester alcye ke t-xjalil ex alcye tiyjil, ic tzaꞌnx otok txi tmaꞌn Mardoqueo te; nok oꞌcx cucxtok tbinchante aju in xi kꞌmaꞌntok te tuꞌn Mardoqueo, ic tzaꞌnx tej axtok taꞌ tucꞌil. 21 Tej kꞌukltok Mardoqueo ttzi tpwertil tja rey, o tbi tej cyoc ten Bigtán ex Teres yolil tiꞌj rey tuꞌn tcub cybyoꞌn, tuꞌnju otok tzaj nimxix cykꞌoj tiꞌj. Akeju cabe xjal lu cyoc te xkꞌukil ttzi tja rey. 22 Tejtzun tbinte Mardoqueo aju in banttok tiꞌj cyuꞌn cabe xjal lu, xi tmaꞌn te Ester aju t-xuꞌjil rey, ex atzunte Ester xi tmaꞌn te rey Asuero aju otok tma Mardoqueo. 23 Eltzun jlu tuj kꞌanchaꞌl, ex tej tel tnicꞌ rey tiꞌj ka ax toc, entons akeju cabe nejenel lu cub cysentens, ex e jaw yobin tuꞌn cycyim. Aju binchben lu, twitz rey cuꞌx tzꞌiban tuj libro jatum tzꞌiban aju txꞌolbaben tiꞌj nasyon.