Cub t-ximan Amán tuꞌn cynaj xjal Judiy
3
Te tibajxi jlu oc kꞌoꞌn Amán tuꞌn rey Asuero te nejenel cyxol cycyakil keju ateꞌ ttxlaj. Ate Amán tcyꞌajal Hamedata ex tiyjil Agag. 2 Cycyakil keju in che ajbentok tuj tja rey in che cub ẍmejeꞌ ex in cub mocꞌeꞌ cywiꞌ te nimbil te Amán oc tiꞌc bet, ex ka oc cypon twitz, porque ictzun tten kꞌmaꞌmaj tuꞌn rey; atzunte Mardoqueo mintiꞌ xi tniman aju orden lu.3 Atzun cye xjal maꞌ cyoclen ttxlaj rey xi cykanin te Mardoqueo tikuꞌn mintiꞌ in xi tniman aju orden tzaj tkꞌoꞌn rey. 4 Ex tcyakil kꞌij in xi cykanin ax yol, atzunte mintiꞌ in xi tniman aju in tzaj cymaꞌn te. E jeꞌxtzun kꞌmalte jlu tucꞌil Amán, tuꞌntzun tcyil alcye tuꞌn tbinchanjtz tiꞌj porque otok txi tmaꞌn cye ka Judiy xjalte. 5 Tejtzun tel tnicꞌ Amán tiꞌj mintiꞌ in cub ẍmejeꞌ ex mintiꞌ in cub mocꞌeꞌ twiꞌ Mardoqueo twitz, tzaj nimxix tkꞌoj, 6 ex tuꞌnju otok tbi Amán alcye ttanmi Mardoqueo, mintiꞌ cub tuj twitz tuꞌn tcub tbyoꞌn oꞌcx te Mardoqueo, ex cubtzun ten ximal tiꞌj tzaꞌn tten tuꞌn cycub baj tbyoꞌn cycyakil xjal Judiy, akeju najlke tjakꞌ tcawbil rey Asuero.
Etz jun orden tuꞌn cycyim ke xjal judiy
7 Tuj tnejel xjaw te abkꞌi ex ka aju xjaw Nisán tbi, tej otok bant cablaj abkꞌi ttzyetlen tcawin rey Asuero, jaw cyiꞌn swert twitz Amán tuꞌntzun tel cynicꞌ tiꞌj alcye kꞌij ex alcye xjaw tuꞌn tjapun aju otok cub t-ximan, ex tcꞌulbacu tuꞌn swert ka tuꞌn tbant jlu tuj oxlaj tajlal tcablajin xjaw, ex ka aju xjaw Adar tbi. 8 Xitzun tmaꞌn Amán te rey Asuero:
—Tat Rey, at jun cꞌloj xjal cysputun cyib cyuj cycyakil partament ateꞌ tjakꞌ tcawbila cypaꞌn cyib cyiꞌj mastl; junxitl cyley cywitz mastl tnam, ex mintiꞌ in che japun ke tleya cyuꞌn. Cyjaꞌtzun mya baꞌn tuꞌn cucx cyankꞌin xjal lu, Tat Rey. 9 Cyjaꞌtzun ka baꞌn tuj twitza, kꞌoꞌn exa jun orden tuꞌn cycyim cycyakil xjal lu; atzun weye jacu txi nkꞌoꞌne wuk mil tucꞌ jweꞌ syent quintal sak pwak cye ke cꞌuꞌl pwak, tuꞌn tocx cykꞌoꞌn tuj cꞌubl tkꞌinumabla.
10 Eltzun tiꞌn rey Asuero t-xmulkꞌab ex xi tkꞌoꞌn te Amán aju tcyꞌajal Hamedata ex tiyjil Agag, aju aj kꞌoj cyiꞌj xjal Judiy, 11 ex xi tmaꞌn te:
—E tcyaj ten pwak te teya, ex atzunju tnam lu, binchama tiꞌj nok alcye tajbila tuꞌn tbant.
12 Tuj oxlaj tajlal tnejel xjaw te abkꞌi e txquettzun ke aj tzꞌibal te rey, ex atzun ke e cub tzꞌibante ke orden e xi tmaꞌn Amán, tuꞌntzun t-xi kꞌoꞌn cye ke xjal at cyoclen ttxlaj rey ex cye ke gobernador ateꞌ cyuj cycyakil partament ex cye ke nejenel ateꞌ tuj junjun tnam. Akeju orden lu e cub tzꞌiban tuj tyol teyle junjun partament ex tuj tyol teyle junjun tnam, toc tpirm rey Asuero cyiꞌj ex seyarimaj ke tuꞌn t-sey rey. 13 E jeꞌxtzun samaꞌn naj ke sanjel kꞌolte uꞌj cyuj cycyakil partament ateꞌ tjakꞌ tcawbil rey. Ex cyuj ke uꞌj lu in tmaꞌn ka tuj junx kꞌij tuꞌn cynaj cycyakil xjal Judiy; ke cuꞌxun, ke tij xjal, ke cꞌwaꞌl ex ke xuꞌj, ex tuꞌn tel cyiꞌn tcyakil cykꞌinumabl. Ex atzun tuꞌn tbant jlu tuj oxlaj tajlal tcablajin xjaw, ex ka aju xjaw Adar tbi. 14 Xi samaꞌn jun copya tiꞌj ley lu cyuj cycyakil partament ex cyuj cycyakil tnam, tuꞌntzun tjaw schꞌiꞌn cywitz xjal ex tuꞌn cybinte, tuꞌntzun tbant cyten tuj kꞌij banimaj tiꞌj. 15 Tuj tnam Susa jaw schꞌin naj aju ley lu, ex ke sanjel jurat naj e jeꞌx sipal cye uꞌj ic tzaꞌnx otok tma rey. Atzunte rey tucꞌix Amán e cub keꞌ cꞌal vin, pero ke xjal ateꞌ tuj tnam Susa tzaj t-xobil cyiꞌj ex tzaj baj cycꞌuꞌj.