Tzaj cybis xjal Judiy tuꞌn tlaj ju ley otok tzꞌetz tuꞌn rey
4
Tej tbinte Mardoqueo tiꞌj tcyakilju otok baj, el t-sbitꞌun t-xbalun tiꞌj te jun techal tbis, ex oc tkꞌoꞌn t-xbalun chꞌiꞌx twitz, jax tchitun tzaꞌj tuj twiꞌ ex baj tbetin tuj tnam in schꞌin wen tuꞌn taꞌw tbis, 2 ex cyjaꞌx tten tej tpon max ttzi tja rey. Axtzun cub weꞌ, porque mintiꞌtok kꞌoꞌn ambil tuꞌn tocx jun xjal tuj tja rey toc t-xbalun chꞌiꞌx twitz. 3 Ax icx cyuj cycyakil partament jatum pon tkanil ley otok txi tkꞌoꞌn rey, tzaj nimxix bis cyxol xjal Judiy; tuꞌntzunju cub cyyoꞌn weꞌyaj, e oc ten okꞌel ex e jaw ayayan, ex nimcu cye e cub tan tuj tzaꞌj ex oc cykꞌoꞌn cyxbalun chꞌiꞌx twitz.Xi tkꞌon tib Ester tuꞌn tonin cyiꞌj ke xjal Judiy
4 Ke majen xuꞌj in che ajben te Ester aju t-xuꞌjil rey, cyucꞌix ke xinak ateꞌ te xkꞌukil te, xi cymaꞌn te Ester tiꞌj aju in tbinchaꞌntok Mardoqueo. Tzajtzun nimxix tbis Ester ex xi t-samaꞌn xbalun te, tuꞌntzun tel tchꞌexpuꞌn t-xbalun chꞌiꞌx twitz toc tiꞌj, atzunte Mardoqueo mintiꞌ xi tniman. 5 Txquettzun Hatac tuꞌn Ester, ate Hatac jun cyxol ke xkꞌukil tja rey otok tzꞌoc tkꞌoꞌn rey tuꞌn tajben te Ester, ex xi tmaꞌn Ester te tuꞌn t-xiꞌ queꞌyilte Mardoqueo ex tuꞌn t-xi tkanin te ti in bajtok ex tikuꞌn in tbinchaꞌntok jlu. 6 Xiꞌtzun Hatac yolil tucꞌil Mardoqueo, aju ma taꞌtok tuj ttxaꞌn peꞌn tcubsaꞌn tumlal twitz tpwertil tja rey. 7 Xitzun tchicꞌbaꞌn Mardoqueo tiꞌj tcyakilju in baj, ax icx xi tmaꞌn tiꞌj sak pwak otok txi ttziyan Amán tuꞌn tocx tkꞌoꞌn tuj cꞌubl tkꞌinumabl rey ka ma che cub baj byoꞌn cycyakil xjal Judiy. 8 Ax icx xi tkꞌoꞌn Mardoqueo jun copya te ley te Hatac, aju otok tzꞌex chicꞌbaꞌn tuj tnam Susa, jatum tzꞌiban ka tuꞌn cycub baj byoꞌn cycyakil xjal Judiy, tuꞌntzun t-xi tkꞌoꞌn Hatac te Ester ex tuꞌn tbinte Ester tiꞌj tcyakil jlu. Ax icx xi tmaꞌn te Hatac tuꞌn t-xi tmaꞌn te Ester tuꞌn t-xiꞌ yolil tucꞌil rey, tuꞌn tcubsan twitz cyiꞌj ke t-xjalil, tuꞌn miꞌn cynaj.
9 Ajtzun meltzꞌaj Hatac ex xi tchicꞌbaꞌn tcyakil te Ester, aju otok tma Mardoqueo. 10 Xitzun t-samaꞌn Ester juntl maj Hatac tucꞌil Mardoqueo kꞌmalte tzakꞌwebl lu:
11 —Cycyakil xjal in che ajben te rey ex keju najlke cyuj ke partament ateꞌ tjakꞌ tcawbil, baꞌn cyuꞌn at jun orden in tmaꞌn cyjaꞌ: Ka at jun xinak ex ka jun xuꞌj ma pon twitz rey max twitz ja te tujxi, ex ka mya txcoꞌn otok txiꞌ tuꞌn rey, cbel tcastiw tuꞌn tcyim; oꞌcx ju xjal mlay cub byoꞌn ka ma tzaj tnukpiꞌn rey tbastón kꞌan pwak tiꞌj. Ic tzaꞌn weye ma bant-xi jun xjaw naꞌnx ntxquete tuꞌn rey, chi Ester.
12 Tejtzun tbinte Mardoqueo aju tzakꞌwebl tuꞌn Ester, 13 atzunte aj t-samaꞌntl ju yol lu: Miꞌn ximana tiꞌj ka oꞌcxcu aya jun xjal Judiy ccletela nok tuꞌnju tocxa tuj tja rey. 14 Ka ma cub t-xcꞌayin tiba tuꞌn tyolina twitz rey kiꞌje, jacu tzaj colbil cye xjal Judiy tuj juntl lugar, atzun teya ex ke terman ktzan tmana che cymele. Balo tuꞌn jlu ma tzꞌoca te t-xuꞌjil rey, tuꞌn tonina kucꞌile tuj ju mya baꞌn ctzajel kibaje lu.
15 Xitzun t-samaꞌntl Ester ju tzakꞌwebl lu te Mardoqueo: 16 Chmoꞌn oca cycyakil xjal Judiy ateꞌ tuj tnam Susa tuꞌntzun tcub cyyoꞌn weꞌyaj tuꞌn nlaje, miꞌn che waꞌne ex miꞌn che cꞌane tuj enter ox kꞌij ex ox konicꞌan; ax icx weye tzalu cyucꞌix ke nmajene xuꞌj cbel kyoꞌne weꞌyaj, ex te tibajxitzun chin xeꞌle yolil tucꞌil rey, masque chin icꞌele tibaj ley. Katzun ma chin cub byoꞌne, malo bant-x ncyime, chi Ester.
17 Xiꞌtzun Mardoqueo ex bant tuꞌn ic tzaꞌnx otok tma Ester.