Pon Ester yolil tucꞌil rey
5
Tujtzun toxin kꞌij oc tkꞌoꞌn Ester t-xbalun aju in ajben cyuꞌn ke cyxuꞌjil rey, ex ocxtzun twitz tja rey aju tocx tujxi, ex axtzun cub ten twitz tja rey jatum kꞌukl tocx rey tuj tkꞌukbil te cawbil, aju tcubsaꞌn tumlal ttzi ja. 2 Tejtzun ttil rey lu Ester aju t-xuꞌjil waꞌltok ttzi ja, jawtzun tzalaj tiꞌj ex xi tnukpiꞌn tbastón kꞌan pwak aju tzyuꞌn tuꞌn. Atzunte Ester xi lakꞌeꞌ ex oc tmacoꞌn twi bastón, 3 ex atzunte rey xi tkanin te:—¿Ti ma baj tiꞌja nxuꞌjile Ester? ¿Titzun taja? Ka ma tzaj tkanina mij ncawbile jacu txi nkꞌoꞌne teya.
4 Atzunte Ester xi ttzakꞌweꞌn:
—In chin cubsane teya Tat Rey, ka baꞌn tuj twitza, tuꞌn t-xiꞌya waꞌl wucꞌile jaꞌlo tuj jun nintz waꞌn ma bant wuꞌne te nimbil teya, ex tucꞌix Amán tuꞌn t-xi tucꞌina.
5 Xitzun tmaꞌn rey cye ke ajbel te:
—Jurat naj cytxcontze Amán, ic tzaꞌnx tajbil Ester.
Cyjaꞌtzun tten xiꞌ rey tucꞌix Amán tuj nintz waꞌn otok baj tbinchaꞌn Ester. 6 Tej matok in che waꞌn ex in che cꞌan vin, xi tmaꞌn rey te Ester:
—¿Alcye tkanbetza? Jacu txi nkꞌoꞌne teya. Ex ¿alcye taja? Kanintza ex jacu txi nkꞌoꞌne. Masque tzaj tkanina mij ncawbile jacu txi nkꞌoꞌne teya.
7 Atzunte Ester xi ttzakꞌweꞌn:
—Cxel nkanine teya aju wajbile ex atzun jlu: 8 Ka ax toc at-xix tcꞌujlalila wiꞌje, Tat Rey, ex ka baꞌn tuj twitza tuꞌn ttzaj tkꞌoꞌna aju wajbile ex tuꞌn ttzaj tkꞌoꞌna aju cxel nkanine teya, bix tzula nchiꞌj tuj juntl nintz waꞌn cbantel wuꞌne te nimbil teya, ex tucꞌix Amán tuꞌn ttzaj tucꞌina. Jacutzun txi nmaꞌne teya alcye wajbile, Tat Rey, chi Ester.
Baj tbinchaꞌn Amán jun tzeꞌ tuꞌn tjaw yobit Mardoqueo tiꞌj
9 Nimxix in tzalaj Amán tej tetz tuj nintz waꞌn, pero tzaj nim tkꞌoj tej tqueꞌyinte lu Mardoqueo kꞌukltok ttzi tja rey, mintiꞌ jaw weꞌ ex mintiꞌ jaw yucch tej ticꞌ Amán twitz, 10 pero mintiꞌ xi tyecꞌun tkꞌoj Amán. Tejtzun tpon tja, e tzajtzun ttxcoꞌn ke tamiw; tucꞌix Zeres aju t-xuꞌjil tzaj ttxcoꞌn, 11 ex oc ten yolil cyucꞌil cyiꞌj ke tkꞌinumabl nimxix, cyiꞌj nimcu tcꞌwaꞌl at, tiꞌj tzaꞌn tten otok jaw nimsaꞌn tuꞌn rey ex tiꞌj ju toclen oc kꞌoꞌn mas nim cywitz ke xjal maꞌ cyoclen ttxlaj rey ex ke ajbel te. 12 Ex xi tmaꞌntl:
—Ax icx oꞌcxcu a kine ẍin txconjtze tuꞌn Ester aju t-xuꞌjil rey, tuꞌn nxiꞌye tuj nintz waꞌn aju ma txi tkꞌoꞌn te rey; ax icx ma chin txconjtze juntl maj tuꞌn, tuꞌn nxiꞌye tuj juntl nintz waꞌn aju cbel tkꞌoꞌn te rey nchiꞌj. 13 Pero tcyakil jlu mintiꞌ tajben weye, porque cucx toc nqueꞌyine Mardoqueo aju xjal Judiy kꞌukl ttzi tja rey.
14 Cycyakiltzun ke tamiw Amán tucꞌix t-xuꞌjil xi cymaꞌn te cyjaꞌ:
—Binchama jun tzeꞌ te 25 var twaꞌl ex awaꞌn cuꞌxa tuꞌn tjaw yobit Mardoqueo tiꞌj, ex prim nchiꞌj txiꞌya kanil te rey tuꞌn tjaw yobit Mardoqueo tiꞌj, cyjaꞌtzun jacu txiꞌya tucꞌil nim tzalajbil tucꞌil rey tuj nintz waꞌn, che chi.
A jlu baꞌn eꞌla tuj twitz Amán ex xi tmaꞌn tuꞌn tbaj binchet ju tzeꞌ.