Xi tmaꞌn rey te Amán tuꞌn tjaw nimsaꞌn Mardoqueo tuꞌn
6
Tujx konicꞌan lu mintiꞌ ocx watl tuj twitz rey, cyjaꞌtzun xi tmaꞌn tuꞌn ttzaj kꞌiꞌn aju libro jatum tzꞌiban tcyakil aju otok baj tuj tcawbil, tuꞌntzun tjaw schꞌiꞌn twitz. 2 Ex tujtzun libro lu cnet cyuꞌn jatum tzꞌiban tzaꞌn tten otok tzul tkanil tuꞌn Mardoqueo tiꞌj ju mya baꞌn otok cub cyximan Bigtán ex Teres, akeju xkꞌukil ttzi tja rey, tuꞌn tcub byoꞌn rey Asuero cyuꞌn. 3 Xitzun tkanin rey cye:—¿Alcyetzun chojbil ex nimbil ma tcꞌam Mardoqueo tiꞌj jlu?
—Mintiꞌ jun tiꞌxti ma tcꞌam, che chi ke xjal at cyoclen ttxlaj rey.
4 Tujx ju or lu ocx Amán ttxaꞌn peꞌn twitz tja rey tuꞌn t-xi tkanin te tuꞌn tjaw yobit Mardoqueo tiꞌj tzeꞌ otok baj tbinchaꞌn.
—¿Alcye in bet ttxaꞌn peꞌn? Chi rey.
5 —A Amán, che chi ke xjal at cyoclen ttxlaj.
—Cymanxe te tuꞌn toctz tuja, chi rey.
6 Ocxtzun Amán ex xi tkanin rey te:
—¿Ti cbantel tiꞌj jun xinak aju taj rey tuꞌn tjaw tnimsaꞌn?
Atzunte Amán cub t-ximan tuj tanmi: ¿Myapetzun a kine taj rey tuꞌn tjaw tnimsaꞌn? 7 Cyjaꞌtzun xi ttzakꞌweꞌn:
—Tat Rey, aju tuꞌn tbinchanjtz tiꞌj ju xinak lu: 8 Baꞌn tuꞌn ttzaj kꞌit jun t-ẍjoꞌwa ex tuꞌn ttzaj kꞌit chej cabay aju in ajben tuꞌna, aju toc jun adorn tiꞌj twiꞌ ic tzaꞌn ju coron in ajben tuꞌna. 9 Aju ẍjoꞌw cxel kꞌot te jun xjal mas maꞌ toclen tuj tcawbila tuꞌn toc tkꞌoꞌn tiꞌj xinak aju taja tuꞌn tjaw tnimsaꞌna, tucꞌix ju chej cxel kꞌot te, ex ax tuꞌn t-xi jawonte chej cyuj cay te tnam, tjax ju xinak tibaj aju taja tuꞌn tjaw tnimsana; ex tuꞌn t-xi tmaꞌn tucꞌil tkꞌajkꞌajel twiꞌ cyuwxix: Cyjaꞌtzun in bant tiꞌj xinak aju tajbil rey tuꞌn tjaw tnimsaꞌn, chi Amán.
10 Xitzun tmaꞌn rey te Amán:
—Chux t-xiꞌ naja, kꞌinxa aju ẍjoꞌw tucꞌix chej cabay ic tzaꞌnx ma tmaya, ex binchama jlu tiꞌj Mardoqueo aju xjal judiy, aju kꞌukl ttzi njaye. Japunx tuꞌna tcyakil aju ma tmaya.
11 Tzaj tiꞌn Amán ẍjoꞌw tucꞌix chej, oc tkꞌoꞌn ju ẍjoꞌw tiꞌj Mardoqueo, ex xitzun tjawoꞌn chej tjakꞌ Mardoqueo cyuj cay te tnam in tmaꞌntok ju yol lu tucꞌil tkꞌajkꞌajel twiꞌ cyuwxix: Cyjaꞌtzun in bant tiꞌj xinak aju taj rey tuꞌn tjaw tnimsaꞌn.
12 Tbajlenxitzun cybetin tuj cay, xiꞌ juntl maj Mardoqueo ttzi tja rey, atzunte Amán xi kelan tuꞌn tpon tja, in bisun wen ex oc tmaksiꞌn twitz tuꞌn tchꞌixwi. 13 Octzun ten Amán kꞌmalte te t-xuꞌjil ex cye ke tamiw tiꞌj tcyakil aju otok baj, ex atzun cye xi cymaꞌn te cyjaꞌ:
—Ka twitz Mardoqueo ma keꞌ tuꞌn tnaj toclena, ex ka ax toc cyiyjil xjal Judiy te Mardoqueo, mlayx cub tiꞌj tuꞌna, nok oꞌcx aya cbel tiꞌja tuꞌn, che chi.
14 Naꞌnxtok tpon baj twi cyyol tej cypon ke majen akeju in che ajben te rey, tuꞌn t-xi cyucꞌin Amán jurat naj tuj nintz waꞌn otok bant tuꞌn Ester.