—Kanintza weye nok alcye tajbila ex jacu txi nkꞌoꞌne teya; masque ma tzaj tkanina mijcu ncawbile jacu txi nkꞌoꞌne teya.

3 Atzunte Ester xi ttzakꞌweꞌn:

—Tat Rey, ka axix toc at tcꞌujlalila wiꞌje ex ka baꞌn jacu tzꞌela tuj twitza, oꞌcx wajbile tuꞌn t-xi nkanine teya tuꞌn tcolina wiꞌje ex cyiꞌj ke nxjalile tuꞌn miꞌn kcyime; 4 porque tzaꞌnx ke nxjalile, ax icx weye ma koꞌx cꞌayine tuꞌn kcub byoꞌne tuꞌn knaje te jumajx. Nokwit ma koꞌx cꞌayine te majen, mintiꞌwtlo ma nmaye jun yol teya, pero tuꞌnju ma cub t-ximan aj kꞌoj tuꞌn tbinchante mya baꞌn kiꞌje, cnajel nim tkꞌinumabla ex mlay chjet jlu tuꞌn, cyjaꞌtzun ma txi nmaꞌne jlu teya.

5 Atzunte rey Asuero xi tkanin te:

—¿Alcyetzun, ex jatum taꞌ aju xjal ma cub ximante tuꞌn tbinchante jlu?

6 Xi ttzakꞌweꞌn Ester:

—Aju yajlal keye ex aj kꞌoj kiꞌje, atzun Amán aju xjal jumajx mya baꞌn.

Tejtzun tbinte Amán jlu, tzaj nimxix t-xobil twitz rey ex twitz Ester. 7 Atzunte rey Asuero tzaj nimxix tkꞌoj, jaw weꞌ jatum nnoꞌctok nintz waꞌn ex xiꞌ t-xol tkan bech tcub twitz tja. El tnicꞌ Amán tiꞌj ka tuꞌn tcub byoꞌn tuꞌn rey, cyjaꞌtzun ax cyaj ten tuja tuꞌn tcubsan twitz Ester tuꞌn miꞌn tcub byoꞌn. 8 Tejtzun tul meltzꞌaj rey tajtzlenxi t-xol tkan bech, ocxtzun juntl maj tuj ja jatum otok bant nintz waꞌn, o til lu Amán ẍmejl tcub ttxlaj kꞌukbil jatum kejltok Ester, ex xitzun tmaꞌn rey te:

—¿Maj icx tajbila tuꞌn tcub tana tucꞌil Ester nwitzxe ex tujx njaye?

Nokx nbajcu tmaꞌn rey ke yol lu, ke xkꞌukil te rey oc cymaksiꞌn twitz Amán. 9 Attok jun cyxol keju xkꞌukil te rey, Harbona tbi, tma cyjaꞌ:

—Tat Rey, ma tja Amán ya banimaj jun tzeꞌ te 25 var twaꞌl, aju tuꞌnx Amán xi tmaꞌn tuꞌn tjaw binchet tuꞌn tjaw yobit Mardoqueo tiꞌj, aju tzaj tkꞌoꞌn tkanil tuꞌn tcleta ex tuꞌn miꞌn tcub byoꞌna.

—Axni cyyobin jawe Amán tiꞌj, chi rey, xi tmaꞌn.

10 Cyjaꞌtzun tten jaw yobin Amán tiꞌjx tzeꞌ aju otok bant tten tuꞌn tuꞌn tjaw yobit Mardoqueo tiꞌj. Tuꞌntzun jlu o chewix tkꞌoj rey.