3 Xiꞌ juntl maj Ester yolil tucꞌil rey, cub mutzeꞌ twitz tkan rey, in okꞌ wen, ex xi tmaꞌn te tuꞌn tcub kꞌuchit aju orden mya baꞌn otok bant tuꞌn Amán, ex tuꞌn miꞌn tjapun aju banimaj tiꞌj tuꞌn tuꞌn tbinchante cyiꞌj ke xjal Judiy. 4 Atzunte rey xi tnukpiꞌn tbastón kꞌan pwak tiꞌj Ester. Jawtzun weꞌ Ester, cub weꞌ twitz rey, 5 ex tma:

—Ka baꞌn jacu tzꞌela tuj twitza Tat Rey, ex ka tuj tumelxix jacu tzꞌela nkanbetze tuj twitza, ka axix toc at tganiya ex tcꞌujlalila wiꞌje, entons e tcub tzꞌibet jun orden tuꞌn cycub kꞌuchit ke uꞌj xi t-samaꞌn Amán aju tcyꞌajal Hamedata, jatum tzꞌiban ju orden tuꞌn cycub baj byet ke xjal Judiy cyuj cycyakil partament ateꞌ tjakꞌ tcawbila. 6 Porque ¿tzaꞌn tten tuꞌn nlonteye aju mya baꞌn chꞌix ttzaj cyibaj ke nxjalile, ex tuꞌn tcub wipaꞌne oc cycub baj byoꞌn keju at nxilene cyucꞌil?

7 Xitzun ttzakꞌweꞌn rey Asuero te Ester ex te Mardoqueo aju xjal Judiy:

—O txi nkꞌoꞌne tja Amán te Ester, ex o jaw yobit Amán tiꞌj jun tzeꞌ tuꞌnju xi tkꞌoꞌn orden tuꞌn cynaj ke xjal Judiy. 8 Atzun jaꞌlo cxel nmaꞌne cyeye tuꞌn tcub cytzꞌibane nok alcye baꞌn tuj cywitze, tuꞌn tajben tuꞌn cyclet ke xjal Judiy. Jacu tzꞌoc npirmaye tiꞌj, ex cyseyarin cube ke uꞌj tuꞌn weye nsey.

(Jun uꞌj toc tpirma rey tiꞌj tucꞌix t-sey mlay cub kꞌuchin.)

9 Jurat naj e jeꞌx txocbaj ke aj tzꞌibal te rey tuj 23 tajlal toxin xjaw, ex ka aju xjaw Siván tbi. Tcyakilju xi tmaꞌn Mardoqueo cye aj tzꞌibal, xi cytzꞌiban cye xjal Judiy, cye ke xjal at cyoclen ttxlaj rey, cye ke gobernador cyuj partament ex cye mastl xjal at cyoclen cyuj 127 partament, xiꞌynix keꞌ tuj tnam India ex ponin baj max tuj tnam Etiopía. Cub tzꞌiban ic tzaꞌn che yolin ex ic tzaꞌnx tzꞌibbante cyyol junjun cꞌloj xjal tuj junjun partament. Ax icx cye xjal Judiy xi tzꞌiban tuj cyex cyyol ex ic tzaꞌnx tzꞌibbante cyyol.

10 Oc tpirma rey Asuero cyiꞌj ke uꞌj lu, ex cybajlenxitzun seyarin ke uꞌj tuꞌn t-sey rey, e jeꞌxtzun samaꞌn ke sanjel sipal cye, cyjax ke cyibaj ke tchej rey cye che kelan. 11 Cyujtzun ke uꞌj lu xi tmaꞌn rey cye xjal Judiy tuꞌn toc cychmon cyib cyuj nok alcyex tnam jatum najlke, tuꞌntzun cyclonte cyib ex tuꞌn tcub cybyoꞌn cycyakil ke xjal banin cyten tucꞌil cymacbil in che ajben tuj kꞌoj tuꞌn cyoc tzokpaj cyiꞌj, tucꞌix cyiꞌj cyxuꞌjil ex ke cycꞌwaꞌl, akeju ateꞌ tuj nok alcyex tnam ex ka partament. Ax icx tuꞌn cyoc xjal Judiy te tajwil cykꞌinumabl aj kꞌoj cyiꞌj. 12 Tcyakil jlu il tiꞌj tuꞌn tbant tuj junx kꞌij cyuj cycyakil partament ateꞌ tjakꞌ tcawbil rey Asuero, ex aju kꞌij banimaj tiꞌj, atzun tuj oxlaj tajlal tcablajin xjaw, aju xjaw Adar tbi. 13 Il tiꞌj tuꞌn tex chicꞌbet jun copya te ley lu, ex tuꞌn t-xi kꞌot cyuj cycyakil tnam ex ke partament, tuꞌntzun tbant cyten ke xjal Judiy tuj kꞌij lu tuꞌn cyclonte cyib cywitz ke aj kꞌoj cyiꞌj. 14 Tuꞌnju orden tuꞌn rey, akeju sipal uꞌj jurat naj baj cysipan ke uꞌj, cyjax ke cyibaj ke chej te rey. Ax icx ex chicꞌbet orden lu tuj tnam Susa.

15 Etztzun Mardoqueo tuj tja rey, toc t-xbalun t-xbalun rey, chaꞌx tucꞌ sak queꞌyin, ex tjax jun tbanil coron tuj twiꞌ, kꞌan pwak ttxꞌotxꞌil, ex toc juntl tbanil xbalun tiꞌj, lino tbi, ẍjulin queꞌyin. Ex cycyakil xjal najlke tuj tnam Susa nimxix e tzalaj. 16 Tcyakil jlu oc te nim tzalajbil ex te jun nimbil cye cycyakil xjal Judiy, ex e ten tuj txubtxaj. 17 Cyuj cycyakil partament, cyuj cycyakil tnam ex ke lugar jatum pon ju orden lu tuꞌn rey, nimxix e tzalaj ke xjal Judiy, oc nintz waꞌn cyuꞌn ex cub cyicꞌsaꞌn ninkꞌij. Ax icx ke xjal ax najlke tuj txꞌotxꞌ, at nimcu oc cykꞌon cyib te Judiy, porque tzaj cyxobil cywitz ke xjal Judiy.