Tej cycamban xjal Judiy cyiꞌj aj kꞌoj cyiꞌj
9
Banimaj tiꞌj tuꞌn tjapun aju orden otok tzꞌex tuꞌn rey tuj oxlaj tajlal tcablajin xjaw, aju xjaw Adar tbi, ex ax kꞌij lu in che ayontok aj kꞌoj cyiꞌj ke xjal Judiy tuꞌn cycub ke xjal Judiy cyuꞌn; pero tcyakil jlu mintiꞌ o bant icju, porque ake xjal Judiy e camban cyiꞌj. 2 Oc cychmon cyib ke xjal Judiy cyuj ke tnam jatum najlke cyuj cycyakil partament ateꞌ tjakꞌ tcawbil rey Asuero, tuꞌn cyoc tzokpaj cyiꞌj ke xjal in che ximantok tiꞌj tuꞌn cybinchante mya baꞌn cyiꞌj, pero mi jun cub twaban tib cywitz, porque otok tzaj nim t-xobil cyiꞌj xjal ateꞌ cyuj cycyakil tnam. 3 Cycyakil xjal at cyoclen cyuj ke partament, ke xjal at cyoclen ttxlaj rey, ke gobernador ateꞌ cyuj cycyakil partament ex ke xjal maꞌxix cyoclen tuj tcawbil rey, e onin cyiꞌj ke xjal Judiy tuꞌnju otok tzaj tchi Mardoqueo cyiꞌj, 4 porque ate Mardoqueo otok tzꞌoc toclen maꞌxix tuj tja rey, ex aju tkanil tiꞌj otok pon baj cyuj cycyakil partament, ex teyle junjun kꞌij nnoꞌc mas tipun. 5 Cub cybyoꞌn xjal Judiy tuꞌn spad ke aj kꞌoj cyiꞌj; e naj cyuꞌn te jumajx ex o cybincha nok alcye cyajbil cyiꞌj aj kꞌoj cyiꞌj. 6 Oꞌcxpe tuj tnam Susa cub cybyoꞌn jweꞌ syent xinak; 7 ax icx e cub cybyoꞌn ke xjal lu: Parsandata, Dalfón, Aspata, 8 Porata, Adalía, Aridata, 9 Parmasta, Arisai, Aridai ex Vaizata, 10 atzun ke laj tcyꞌajal Amán jlu, aju aj kꞌoj cyiꞌj xjal Judiy, pero mintiꞌ el cyiꞌn aju cykꞌinumabl.11 Tujx kꞌij lu, tej tbinte rey aju cyajlal ke xjal otok che cub byoꞌn tuj tnam Susa, 12 xi tmaꞌn te Ester cyjaꞌ:
—Tuj tnam Susa ma cub cybyoꞌn xjal Judiy jweꞌ syent xinak cyucꞌix ke laj tcyꞌajal Amán. Pyortzunlo cyuj ke mastl partament ateꞌ tjakꞌ ncawbile. Kꞌmantza weye alcye mastl taja ex jacu txi nkꞌoꞌne teya, chi rey Asuero.
13 Atzunte Ester xi ttzakꞌweꞌn:
—Ka baꞌn tuj twitza Tat Rey, e t-xi kꞌot ambil cye xjal Judiy, akeju najlke tuj tnam Susa, tuꞌn cybinchante nchiꞌj cyiꞌj aj kꞌoj cyiꞌj ic tzaꞌnx ma cybincha jaꞌlo cyiꞌj aj kꞌoj cyiꞌj, ex ic tzaꞌnx in tmaꞌn ju orden; ax icx e tjaw yobit tiꞌj tzeꞌ cyximlal ke laj tcyꞌajal Amán, chi Ester.
14 Xitzun tmaꞌn rey tuꞌn tbant icju. Aju orden ex kꞌmaꞌn tuj tnam Susa, ex e jawtzun yobin cyximlal ke laj tcyꞌajal Amán.
15 Ke xjal Judiy najlke tuj tnam Susa oc cychmon cyib juntl maj tuj tcyajlajin tajlal xjaw Adar ex ax tuj tnam Susa cub cybyoꞌn juntl ox syent xinak, pero mintiꞌ el cyiꞌn cykꞌinumabl. 16 Ke xjal Judiy najlke cyuj txkantl partament oc cychmon cyib tuꞌn cyclonte cyib ex tuꞌn cykꞌojin cyiꞌj ke xjal aj kꞌoj cyiꞌj, ex cub cybyoꞌn 75 mil xjal aj kꞌoj cyiꞌj, pero mintiꞌ el cyiꞌn cykꞌinumabl. 17 Atzun jlu o baj tuj oxlaj tajlal xjaw Adar, ex tuj tcyajlajin tajlal ax xjaw e ojlan, ex oc nintz waꞌn cyuꞌn tucꞌil tzalajbil.
18 Atzun ke xjal Judiy najl tuj tnam Susa, tuꞌnju otok tzꞌoc cychmon cyib tuj oxlaj ex cyajlaj tajlal xjaw, cyjaꞌtzun maxi e ojlan tuj olaj tajlal xjaw, ex oc nintz waꞌn cyuꞌn tucꞌil tzalajbil. 19 Cyjaꞌtzun, ke xjal Judiy najlke cyuj ke aldey ex cyuj ke tnam mintiꞌ muro toc cyiꞌj, in cub cyicꞌsaꞌn ninkꞌij tucꞌil nim tzalajbil tuj tcyajlajin tajlal xjaw Adar, ex teyle junjun in xi tkꞌoꞌn oyaj te juntl.
Aju ninkꞌij Purim tbi
20 Cub ttzꞌiban Mardoqueo tcyakilju otok baj ex e jeꞌx t-samaꞌn ke uꞌj cye cycyakil xjal Judiy, akeju najlke cyuj ke partament ateꞌ tjakꞌ tcawbil rey Asuero, tzaꞌnx ke partament nikayin ateꞌ ax icx keju najchak ateꞌ. 21 Xi tmaꞌn tuj uꞌj: Tcyakil abkꞌi tuꞌn tcub icꞌset ninkꞌij lu tuj cyajlaj ex olaj tajlal xjaw Adar, 22 tuꞌnju atzun kꞌij lu e clet ke xjal Judiy tuj cykꞌab ke aj kꞌoj cyiꞌj, ex tuꞌnju atzun xjaw lu chꞌexpet cybis tuꞌn toc te tzalajbil ex aju cyokꞌel oc te ninkꞌij. Ax icx xi tmaꞌn tuꞌn tcub cyicꞌsaꞌn ninkꞌij lu tucꞌil nintz waꞌn ex tzalajbil, tuꞌn t-xi cykꞌoꞌn cyoyaj jun te juntl ex tuꞌn t-xi cykꞌoꞌn cycotz ke meba. 23 A jlu oc cykꞌoꞌn xjal Judiy te jun costumr ic tzaꞌn otok tzaj tmaꞌn Mardoqueo cye tuj uꞌj. 24 Porque ate Amán aju aj kꞌoj cyiꞌj cycyakil xjal Judiy, otok jaw tiꞌn swert tuꞌnju otok cub t-ximan tuꞌn cycub tbyoꞌn ex tuꞌn cynaj cycyakil xjal Judiy tuꞌn. Ate Amán tcyꞌajal Hamedata ex tiyjil Agag. 25 Tejtzun tocx Ester yolil twitz rey, cub ttzꞌiban rey jun orden tuꞌn ax tuꞌn tcub tzꞌak tcyakil mya baꞌn tibajx Amán, aju otok cub t-ximan tuꞌn tbinchante cyiꞌj xjal Judiy. Cyjaꞌtzun ate Amán cyucꞌix ke tcyꞌajal e jaw yobin tiꞌj tzeꞌ. 26 Cyjaꞌtzun, akeju kꞌij lu oc cybi Purim, ex atzun t-xilen yol lu, swert.
Ic tzaꞌnx in tmaꞌn tuj uꞌj otok txi t-samaꞌn Mardoqueo, ex ic tzaꞌnxju otok cyil ex otok baj cyiꞌj, 27 oc cykꞌoꞌn xjal Judiy jlu te jun cycostumr, ex tuꞌn tcyaj cymaꞌn cye ke cyiyjil che ul itzꞌj te tibajxi ex cye cycyakil xjal nnoꞌc cykꞌon cyib te Judiy; tcyakil abkꞌi tuꞌn tcub cyicꞌsaꞌn cab kꞌij ninkꞌij lu aju banimaj tiꞌj, ic tzaꞌnx otok txi kꞌmaꞌn cye, ex mintiꞌ tuꞌn ticꞌx tiꞌj. 28 Ke kꞌij Purim cucx tuꞌn cytzaj naꞌt ex tuꞌn tcub cyicꞌsaꞌn, ex wikinwik tuꞌn tcyaj cymaꞌn teyle junjun cꞌloj cyiyjil cye cycꞌwaꞌl cyuj cycyakil partament ex tnam, tuꞌntzun miꞌn tcub naj jlu cyxol ke xjal Judiy ex cyxol ke cyiyjil che ul itzꞌj te tibajxi. 29 Oc kꞌoꞌn toclen Ester aju t-xuꞌjil rey ex tmeꞌjel Abihail, tucꞌix Mardoqueo aju xjal Judiy, tuꞌn tcub cytzꞌiban tcabin uꞌj tiꞌj ninkꞌij Purim, tuꞌntzun tcyuwset-xix tnejel uꞌj otok txi t-samaꞌn Mardoqueo. 30 Ex xi cysamaꞌn cye cycyakil xjal Judiy ateꞌ tuj 127 partament ateꞌ tjakꞌ tcawbil rey Asuero. Aju yol tzꞌiban cyuj uꞌj, axix toc ex te kꞌukbabl cycꞌuꞌj, 31 tuꞌn tcyuwset tuꞌn tcub icꞌset ninkꞌij Purim tbi tuj tajlal xjaw banimaj tiꞌj, ic tzaꞌnx ju orden otok txi tmaꞌn Mardoqueo tucꞌix Ester aju t-xuꞌjil rey. Ax icx ke xjal Judiy otok bant tiꞌj cyuꞌn tuꞌn tcub cyicꞌsaꞌn ex tuꞌn tcyaj cymaꞌn cye ke cyiyjil che ul itzꞌj te tibajxi. Ex cub cykꞌoꞌn juntl orden cyxolx tuꞌn tcub cyyoꞌn weꞌyaj ex tuꞌn cyoc ten okꞌel, 32 ex tuꞌnju orden tuꞌn Ester o cyuwset tzaꞌn tten tuꞌn tcub icꞌset tkꞌijlalil Purim. Tcyakil jlu cuꞌx tzꞌiban tuj jun libro.