—¿Jatum ma tzaja?
Atzun te xi ttzakꞌweꞌn:
—Ma baj nbetine tcyakil twitz txꞌotxꞌ; tzyet-x wuꞌne tuj jun pacꞌ ttxaꞌn txꞌotxꞌ ex ma pon baj tuj juntl pacꞌ.
3 Xitzun tmaꞌn Kman te:
—¿Mape tila nmajene Job? Mi aꞌl juntl xjal twitz txꞌotxꞌ in pon ic tzaꞌn te, in ankꞌin tuj tumel ex tzꞌaklxix, baꞌn niman weye, ex tpaꞌn tib tiꞌj mya baꞌn. Masque mintiꞌ til, in jyona tumlal tuꞌn tnaj tcyakilju at te wuꞌne, pero cucx tbinchan baꞌn ex mintiꞌ chꞌin tpaltil.
4 Tmatzun Satanás:
—Ka mya tiꞌjcu t-ximlal xjal ma tzaj yajbil, mlay bisun tuꞌn tlaj, porque jacu txi tkꞌoꞌn tcyakilju at te nok tuꞌn cucx tankꞌin. 5 Katzun ma tzꞌoc tcꞌixbisaꞌna acu t-ximlal, jacutzun tila ka mi xyolin mya baꞌn tiꞌja twitzcuya, chi Satanás.
6 Xitzun ttzakꞌweꞌn Kman te:
—Ax baꞌn, binchama alcye tajbila tuꞌn tbinchanteya tiꞌj, oꞌcx miꞌn cub tbyoꞌna.
7 Etztzun Satanás twitz Kman ex oc tkꞌoꞌn jun yabil txꞌaꞌc plojxix wen tiꞌj Job, tzajx ma tuj tlakal tkan ex japun baj max tuj twiꞌ. 8 Xiꞌtzun Job ex cub keꞌ tuj tzaꞌj tuꞌn tlaj tbis, ex jaw tiꞌn jun piẍ ttxꞌakan cꞌil te scatbil tiꞌj. 9 Atzunte t-xuꞌjil xi tmaꞌn te:
—¿Maj cucxtzun ocslaꞌn Dios tuꞌna? Maslo baꞌn tuꞌn tyolina mya baꞌn tiꞌj Dios tuꞌntzun tcyima.
10 Xitzun ttzakꞌweꞌn Job te t-xuꞌjil:
—Ma yolina ic tzaꞌn jun xuꞌj mintiꞌ tnabl. Ka in kcꞌmoꞌn ju baꞌn in tzaj tkꞌoꞌn Dios ke, ¿tzaꞌntzun tten miꞌn kcꞌam aju mya baꞌn in tzaj kiꞌj?
Cyjaꞌtzun mintiꞌ il o tbincha Job ex mi jun yol mya baꞌn tma, masque tzaj nimcu mya baꞌn tiꞌj.
E pon ke tamiw Job queꞌyilte te
11 Attok ox tamiw Job: Elifaz tbi jun, ate jlu aj Temán; juntl Bildad tbi, ate jlu aj Súa; atzun juntl Zofar tbi, ate jlu aj Naamat. Tej cybinte tkanil tiꞌj tcyakil yajbil otok tzaj tiꞌj Job, cubtzun be cyuꞌn tuꞌn cyxiꞌ kꞌukbalte tcꞌuꞌj ex tuꞌn cyten tucꞌil tuj yajbilte. 12 Atxtok taj tuꞌn cycanun jatum taꞌ Job, o cyil naj ex pen el cynicꞌ tiꞌj, jaw tkꞌajkꞌajel cywiꞌ ex e oc ten okꞌel; el cysbitꞌun cyxbalun tuꞌn cybis, e oc ten chitul tkukil txꞌotxꞌ twitz cyaꞌj ex jax cychitun tuj cywiꞌ; 13 e cubtzun keꞌ twitz txꞌotxꞌ ttxlaj Job, ex tuj enter wuk kꞌij ex wuk konicꞌan e ten tucꞌil pero mi jun yol o cyma te, porque o cyil nimxix cꞌixcꞌoj nnicꞌx tuꞌn.