3 —Cuchiwt tuꞌn tnaj ju konicꞌan tej woc tene tuj talbil ntxuꞌye, ex cuchiwt tuꞌn tnaj ju kꞌij tej witzꞌje.

4 Nokwit oc ju kꞌij te konicꞌan tej witzꞌje ex nokwit icꞌ tnaꞌl tuꞌn Dios tuꞌn miꞌn tjawil kꞌij.

5 Nokwit oc yupj tuꞌn txkan kꞌek muj ex biꞌxwit ocx naj tuj, ex nokwit yupj twitz kꞌij tuꞌn ttzaj xobajil.

6 Nokwit biꞌx xi naj ju konicꞌan lu tuj kxopin ex mintiꞌwt oc tajlal cyxol ke mastl kꞌij te xjaw ex te abkꞌi.

7 Nokwit mintiꞌ e itzꞌj cꞌwaꞌl tuj konicꞌan lu, ex nokwit mintiꞌ jaw tkꞌajkꞌajel cywi xjal tuꞌn tzalajbil tej tul itzꞌj jun neꞌ.

8 Nokwit otok txiꞌ cyyol ke aj kꞌij tiꞌj ju kꞌij lu, akeju baꞌn txi niman cyyol tuꞌnju nintz txcup at tuj mar, Leviatán tbi.

9 Nokwit mintiꞌ e cꞌant ke cheꞌw te prim lu, ex nokwit mintiꞌ jawil kꞌij aju in che ayon xjal tiꞌj, ex mintiꞌwt tzaj t-xe cyaꞌj.

10 Cuchiwt tuꞌn tnaj ju konicꞌan lu, aju o takꞌ ambil tuꞌn witzꞌje, tuꞌnju mintiꞌ mayet tuꞌn aju cꞌixcꞌoj ma tzaj wiꞌje.

11 ¿Tikuꞌn mi in cyime tuj talbil ntxuꞌye, ex tikuꞌn mya biꞌx in cyime texju or tej witzꞌje?

12 ¿Tikuꞌn in cub kꞌoꞌne twi tkan ntxuꞌye, ex tikuꞌn tzaj kꞌoꞌn nchꞌuꞌye tuꞌn ntxuꞌye?

13 Nokwit biꞌx in cyime tej wul itzꞌje, luwtlo kine in chin tan tuj txubtxaj ex luwtlo kine in chin ojlan tuj txubtxaj,

14 cyucꞌil ke rey ex cyucꞌil ke mastl xjal at cyoclen ttxlaj rey, akeju in baj cybinchaꞌn ke nmak cypantyón,

15 ex ka cyucꞌil ke cawil, akeju in baj cychmoꞌn nim kꞌan pwak ex sak pwak tuj cyja.

16 ¿Tikuꞌn mintiꞌ in cuꞌx makuꞌne ic tzaꞌn jun cꞌwaꞌl mintiꞌ in japun tkꞌij tuꞌn tul itzꞌj, ex ka ic tzaꞌn ke cꞌwaꞌl otok che cyim oc cyul itzꞌj?

17 Oc cycuꞌx makut ke xjal binchal mya baꞌn, ya mlay che yajlantl cyiꞌj cyucꞌil, ex ke xjal otok che sict wen, atzun in che ojlan.

18 Atzun in che ten ke pres tuj txubtxaj, ex ya mi aꞌl caporal tuꞌn tyolin cyuw cye;

19 atzun in che pon ke xjal maꞌ cyoclen ex ke chꞌin cyoclen, ex ju majen tcyaj tjakꞌ tcawbil patrón, atzun in tzokpet.

20 Tikuꞌn in tzaj tkꞌoꞌn Dios spicꞌun te xjal nim nnicꞌx tuꞌn?

21 In ayon tuꞌn tcyim, pero mintiꞌx in cyim; mas in jyon tiꞌj camic twitzju kꞌinumabl tcuꞌx tjakꞌ txꞌotxꞌ.

22 Maxitzun ctzalajel xjal lu oc tcuꞌx makuꞌn.

23 Nok in tacpajeꞌ xjal tuꞌn Dios, porque makoꞌn tbe tuꞌn tuj tcyakil pacꞌ.

24 Mintiꞌ chꞌin in chin waꞌne, nok oꞌcx in chin ayayane; ex oc in chin ayayane, mer ic tzaꞌn tkꞌajkꞌajel txkan aꞌ mintiꞌ in weꞌ tuꞌn tkꞌajt.

25 Tcyakilju in chin xobtoke tiꞌj ex aju mas tzaj t-xobil wiꞌje, ma tzaj wiꞌje.

26 Mintiꞌ in chin ojlane ex mintiꞌ in chin tene tuj txubtxaj; mintiꞌ in chin tene tuj tzalajbil, nok oꞌcx in chin yajlanjtze.