3 Nimcu xjal ma txi tkꞌoꞌna xnakꞌtzbil cye ex oc cyipun nimcu tuꞌna, akeju otok che cub numj.

4 Nimcu xjal otok che jaw tolj xi tmaꞌna cye tuꞌn mi tbaj cycꞌuꞌj nok oꞌcx tuꞌn cyjaw weꞌ, ex e tzyet naj tuꞌna akeju cyjaꞌtok cycub tzꞌak.

5 Atzun jaꞌlo tej saj yajbil tiꞌja, ma tzaj baj tcꞌuꞌja ex mintiꞌtl tipuna.

6 Ic tzaꞌn teya, aya jun xjal ajbel te Dios tzꞌaklxixa ex mi jun tpaltila, ¿tikuꞌn mintiꞌ in keꞌ tcꞌuꞌja tiꞌj Dios?

7 Ximanxa tiꞌj ka naꞌn tuꞌna: ¿Atpe jun xjal mintiꞌ til o tzaj yajbil tiꞌj?

8 O wile ex o tzꞌel nnicꞌe tiꞌj, ke xjal in cybinchaꞌn mya baꞌn ex in che yajlan cyiꞌj ke cyucꞌil, axtzun jlu in tzaj cyiꞌj.

9 Oc in tzaj tkꞌoj Dios cyiꞌj ex oc in xi t-xupin cyiꞌj, biꞌx in che naj te jumajx.

10 Masque in che tzanun ic tzaꞌn ke balun, biꞌx in che kꞌajen oc tetz buchun twitz cyeꞌ tuꞌn Dios.

11 Che cymel ic tzaꞌn ke balun mintiꞌ in cnet cycanb, ex ke cyal cytxu balun biꞌx che bajel sputj.

12 At jun yol pon wucꞌile, pen o nbiye porque nok tuj jasan tzaj kꞌmaꞌn.

13 Te konicꞌan pon jlu wucꞌile, otok che tan xjal; at jun nwitzicꞌe oc, biꞌx tzaj nbise tuꞌn.

14 Tzaj nim t-xobil wiꞌje, ex tcyakil nximlale tzaj luꞌlun.

15 Icꞌ juban chꞌin cykꞌikꞌ nwitze, biꞌx tzaj salin wiꞌje.

16 Lu jun o wile waꞌl tcub, pero mintiꞌ el nnicꞌe tiꞌj tijil. Mintiꞌ jun in kꞌajt, pero te tibajxi o nbiye jun tkꞌajkꞌajel chi cyjaꞌ:

17 ¿Jacupe tzꞌoc xjal tzꞌaklxix ic tzaꞌn te Dios? ¿Maspelo sak tuj tanmi xjal ic tzaꞌn te Dios aju binchante te?

18 Mintiꞌlpe in keꞌ tcꞌuꞌj Dios cyiꞌj ke tmajen ateꞌ tuj cyaꞌj; in cnetpe cypaltil ke anjel tuꞌn Dios,

19 pyortzun te xjal, baka at tipun, ic tten ic tzaꞌn jun ja txꞌotxꞌ binchamaj tibaj kuk, ex ic tten ic tzaꞌn jun puꞌt in cub puchꞌl. 20 Ate xjal baꞌn taꞌ te prim, ya te kale otok naj; biꞌx cymel te jumajx ex mi aꞌl jun cꞌoquel tcwent tiꞌj. 21 Ic tten tankꞌibl xjal ic tzaꞌn jun nokꞌ in cub lakj; in cyim xjal naꞌnxtok toc tnabl, chitzun ju yol nbiye.