2 Ploj nneꞌl tuj twitz xjal aju yajbil in tzaj tiꞌj, ex ka ma tzꞌoc ten kꞌojlel tuꞌn tlaj jlu, tuꞌnx in tzaj tiꞌn camic tiꞌj, tuꞌnju mintiꞌ tnabl.

3 O wile jun xjal mintiꞌ tnabl, jurat naj chmet nimcu te, pero jurat naj o cub xitj tja.

4 Mi aꞌl jun onil cye ke tcꞌwaꞌl; oc cypon kꞌiꞌn twitz jwes mintiꞌ in xi binchaꞌn cyiꞌj tuꞌn, ex mi aꞌl jun colol cyiꞌj.

5 Aju twitz tawal xjal mintiꞌ tnabl, in xi cywaꞌn ke xjal at weꞌyaj cyiꞌj masque tuj chꞌiꞌx in jaw cychmoꞌn; ex ke xjal at txketleꞌn cyiꞌj in pon cycꞌuꞌj tiꞌj tkꞌinumabl.

6 Aju mya baꞌn in tzaj kiꞌj, mya ax in jaw jlet twitz txꞌotxꞌ, aju bis mya ax in tzaj pokꞌl tuj txꞌotxꞌ.

7 Ic tzaꞌn ke cꞌech in che etz tuj kꞌakꞌ, icxtzun te xjal il tiꞌj tuꞌn ticꞌx cꞌixcꞌoj tuꞌn.

8 Nokwit akine at bis wiꞌje ic tzaꞌn teya, mawtlo chinxe kanil onbil te Dios ex mawtlo txi nkꞌon wibe te Dios tuꞌn t-xi tbinchaꞌn wiꞌje.

9 Nimxix tbinchben Dios in bant maꞌxix t-xilen, ex mi aꞌl jun jacu tzꞌel tnicꞌ tiꞌj.

10 A Dios in tzaj kꞌonte jbal twitz txꞌotxꞌ, ex tuꞌn in baj taꞌlin ke cojbil.

11 Ke xjal chꞌin cyoclen in che jaw nimsaꞌn tuꞌn Dios, ex keju in che bisun in cheꞌx tiꞌn tuj jun lugar segur jatum tuꞌn cyclonte cyib.

12 Aju xjal elni twitz tuꞌn t-sbun, in baj ttzacsin Dios t-ximbetz tuꞌntzun mi tbant aju otok cub t-ximan.

13 In che tzyet ke aj nabl tuꞌn Dios masque jawni cywitz, ex mintiꞌ in xi tkꞌoꞌn ambil cye tuꞌn tbant aju mya baꞌn otok cub cyximan.

14 Kꞌijl in che tacpajeꞌ, ex in che bet tuj kxopin mer ic tzaꞌn konicꞌan.

15 In che clet tuꞌn Dios ke meba xjal ex keju in che yajlanjtz cyuꞌn ke binchal mya baꞌn.

16 Ke xjal mintiꞌ cyipun, oꞌcx tiꞌj Dios in keꞌ cycꞌuꞌj tuꞌn cyclet. In maket cytziꞌ ke xjal mya baꞌn tuꞌn Dios.

17 At tzalajbil te xjal nnoꞌc mayoꞌn tuꞌn Dios tiꞌj ju mya baꞌn in tbinchaꞌn. Miꞌn tzꞌel ticꞌuna oc toc mayoꞌna tuꞌn Dios, aju at tipumal tuꞌn tbant tcyakil tuꞌn.

18 Ka ma tzꞌoc jun ẍil tiꞌja tuꞌn, ax cꞌoquel potzin tiꞌj; ka ma tzꞌoc cꞌixbisaꞌna tuꞌn, ax ckꞌanil teya.

19 A clolte teya tcyakil maj oc ttzaj xobajil tiꞌja, ex mlay takꞌ ambil tuꞌn ttzaj mya baꞌn tiꞌja.

20 Tuj tkꞌijlalil weꞌyaj cletela tuꞌn tuꞌn mi tcyima, ex oc ttzaj kꞌoj, cletela tuꞌn tuꞌn mi tcuba tuꞌn spad.

21 Cletela tuꞌn oc cysiꞌmin xjal yol tiꞌja, ex mlay xoba oc ttzaj xitbil tiꞌja.

22 Ka ma tzaj weꞌyaj ex ka ma tzaj xitbil, mlay baj tcꞌuꞌja ex mlay xoba cywitz ke txcup te tjakꞌ cꞌul.

23 Oc takꞌnana mlay tzꞌoc weꞌya cyiꞌj ke abj tuj tcojbila, ex ctel tmojbabl tiba cyucꞌil ke txcup.

24 Txubtxaj ctela tuj tjaya, ex cabal ateꞌ ke taluna oc cybaj tajlaꞌna.

25 Nimcu tiyjila che ul itzꞌj, ic tzaꞌn chaꞌx cꞌul tuj cojbil.

26 Atxtok tipuna oc tcyima, ic tzaꞌn jun cheꞌl triw otok pon tkꞌij.

27 Ma kile ex ma tzꞌel knicꞌe tiꞌj, ic ttenju. Binxa ex tzꞌajbenxwit teya, chi Elifaz, baj tmaꞌn.