3 maslo alxix twitz arena at ttzi mar. Cyjaꞌtzun cyuw ma chin yoline.

4 Ate Kman aju at tipumal tuꞌn tbant tcyakil tuꞌn, ma che oc t-xoꞌn ke tplech wiꞌje, ex aju venen toc cywiꞌ ma txi bet tuj nximlale. Ma tzaj nimxix nxobile toclen tzokpaj Dios wiꞌje.

5 ¿Baka in kꞌajt ttxaꞌn jun bur ka at chaꞌx cꞌul te twa? ¿Ex baka in muyin jun wacẍ ka at twa?

6 ¿Atpe jun xjal in xi tchyoꞌn jun tiꞌxti ka mintiꞌ atzꞌan tiꞌj? ¿Atpe tcꞌocꞌjal t-sakal jos tjunal?

7 Porque aju mintiꞌtok waje tuꞌn t-xi nwaꞌne nej, atzunju in xiꞌ wuꞌne jaꞌlo.

8 Cuchiwt tzaj tkꞌoꞌn Dios aju cxel nkanine te; cuchiwt tuꞌn tjapun tuꞌn aju wajbile.

9 Cuchiwt cub t-ximan Dios tuꞌn nnaje tuꞌn te jumajx.

10 Masque lu kine in chin cꞌixbiye tuꞌn taꞌw, in chin tzalaje, ex kꞌukl ncꞌuꞌje tuꞌnju mintiꞌ ma cub wewane tley ju Dios Xjan.

11 Mintiꞌtl wipune tuꞌn ticꞌx taꞌw wuꞌne, ¿ti gan cucx tuꞌn wankꞌine?

12 Mya ic wipumale ic tzaꞌn jun pic, ex mya ic tzaꞌn kꞌan cꞌuxbil.

13 Mlay bant ncwentin wibe wuꞌnx wibe, ex mi aꞌl jun onil weye.

14 Jun xjal at tuj yajbil at tcꞌuꞌj tamiw tiꞌj, masque mya tzꞌaklxix twitz Kman aju at tipumal tuꞌn tbant tcyakil tuꞌn.

15 Atzun cyeye, akeye wamiwoye, mintiꞌ ma cybinchaye jlu weye, ic cytene ic tzaꞌn aꞌ in tzkij tuj tkꞌab xak.

16 Ic cytene ic tzaꞌn aꞌ mya sak twitz, smoꞌn tucꞌil ttxa cheꞌw;

17 pero in cub naj ttxa cheꞌw ex in tzkij aꞌ tuj tkꞌab xak, ex oc ttzaj taꞌw cyak biꞌx in cub naj aꞌ.

18 Tuꞌn jlu ke xjal in che bet in che el tzpet tiꞌj cybe tuꞌn tlaj aꞌ, ex cyjaꞌ in cheꞌx tuj be tuj tzkij txꞌotxꞌ, ex atzun in che cyim.

19 Ke xjal aj Temán ex aj Sabá in keꞌ cycꞌuꞌj cyiꞌj ke tkꞌab xak lu oc in cheꞌx tuj jun cybe,

20 pero oc in che pon ttzi tkꞌab xak lu, mintiꞌ in cnet aꞌ cyuꞌn, in tzajtzun cybis ex biꞌx in naj cynabl.

21 Ictzun cytene wucꞌile: Nnoꞌc cyqueꞌyine nimxix mya baꞌn ma tzaj wiꞌje ex in tzaj t-xobil cyiꞌje.

22 Pero mintiꞌ jun tiꞌxti in xi nkanine cyeye, ex mintiꞌ in chin kanine pwak cyeye tuꞌn nclete,

23 ex mintiꞌ in chin kanine tuꞌn nclete cyuꞌne twitz jun aj kꞌoj, ex mi tuꞌn ncolpete cyuꞌne tuj cykꞌab ke xjal mya baꞌn.

24 Cykꞌontze jun xnakꞌtzbil weye, jacu chin cub txuleꞌye bilte; cykꞌmantze alcye npaltile ma nbinchaye.

25 Mi aꞌl jun jacu tzꞌel icꞌunte jun xnakꞌtzbil ka tuj tumelxix; ex atzun cyeye ma che yoline mya tuj tumel wiꞌje.

26 Cyeye nok in che xoꞌne yol wiꞌje, ex aju nyole tzcaj nneꞌla te cyeye ex mintiꞌ tajben tuj cywitze.

27 Jacu bant cyuꞌne tuꞌn tjaw cyiꞌne swert tiꞌj jun cꞌwaꞌl mintiꞌ tman ex ttxuꞌ tuꞌn toc te cymajene, ax icx jacu txi cycꞌayine jun cyamiwoye.

28 Cyqueꞌyintze tuj nwitze ex cymantze weye ka in chin nicꞌane yol.

29 Cycolinxe aju yol ma cymaye wiꞌje, miꞌn che oque mya tzꞌaklxix; tzꞌelx cynicꞌe tiꞌj, in chin yoline tuj tumel.

30 ¿Nicꞌal yolpetzun kine tuj cywitze? ¿Mintiꞌpetzun nneꞌl nnicꞌe tiꞌj aju in xi nmaꞌne?