2 ex ic tzaꞌn jun majen otok sict, tajbil tuꞌn tojlan chꞌin t-xe xlecun, ex ic tzaꞌn jun akꞌnal in ayon jtoj tzul twi tcꞌuꞌj.

3 Ictzun weye, elaꞌxi xjaw mintiꞌ chꞌin in chin tzalaje, tcyakil konicꞌan nnicꞌx yajbil wuꞌne.

4 Oc in chinxe tal, matij nneꞌla konicꞌan tuj nwitze; ex in cub nximane ¿jnicꞌ or tuꞌn njaw weꞌye? Nim in chin sicte, tol wicꞌe tuj ncoẍbile ocxi ttzaj t-xe cyaꞌj.

5 Nojni tiꞌj nximlale cyuꞌn ẍukꞌ, ma tzꞌel pokꞌj ntzꞌumile ex ma tzaj poj tuj ẍil tiꞌj nximlale.

6 Ma tzul lakꞌeꞌ tkꞌijlalil tuꞌn ncyime, mas in ojkelan tuꞌn tel lakꞌeꞌ ic tzaꞌn nnicꞌx kꞌot twabl telar, mintiꞌx oybil weye.

7 Naꞌntza aya Nman Dios, aju nchwinklale ic tten ic tzaꞌn jun xjikꞌbaj cꞌuꞌj ex mlayx chin tene tuj txubtxaj.

8 Mi aꞌl jun cꞌoquel queꞌyinte nwitze porque chin najele oc toc tkꞌoꞌna twitza wiꞌje; cꞌoquel tkꞌoꞌna twitza wiꞌje ex chin najeltzune.

9 Ic tzaꞌn muj in bet ex in cub naj, icxtzun ju xjal in xiꞌ tuj mukbil; mlayx tzꞌajtz meltzꞌaj juntl maj,

10 mlay tzul juntl maj tuj tja jatum otok ten.

11 Cyjaꞌtzun mlay txi ncoline tuꞌn nyoline. Tucꞌil taꞌw ex tucꞌil nim nbise ctzyetel nyoline tiꞌj ju nnicꞌx wuꞌne.

12 ¿Baka ic kine ic tzaꞌn jun nintz txcup at tuj mar, tuꞌnju nnoꞌc tkꞌoꞌna jun xkꞌukil weye?

13 Ka ma nmaye: Ckebel ncꞌuꞌje oc ncub coẍeye ex kape cꞌelel nbise oc nxiꞌye tal, ka nchiye,

14 pero in chin oc t-xobtzaꞌna cyuꞌn witzicꞌ, ex in chin oc t-secꞌpuꞌna oc in chin cub t-xkꞌumsina.

15 Maslo baꞌn tuꞌn tcub tjatzꞌoꞌna nkule, mas baꞌn tuj nwitze tuꞌn ncyime twitzju tuꞌn wankꞌine.

16 Mlay tzicꞌx mastl wuꞌne. Mi wajtle tuꞌn wankꞌine. Chin tkꞌoncja; aju nchwinklale ic tten ic tzaꞌn jun xjikꞌbaj cꞌuꞌj.

17 ¿Ti t-xilen ju xjal tuꞌnju maꞌ t-xilen tuj twitza? ¿Tikuꞌn nimxix in ximana tiꞌj?

18 ¿Tikuꞌn nnoꞌc t-xkꞌukina tcyakil kꞌij ex cocꞌx nnoꞌc tuj malbil tuꞌna?

19 ¿Tikuꞌn mintiꞌ nneꞌl tiꞌn twitza wiꞌje, ex mintiꞌ in chin cyaj tkꞌoꞌna jun rat tuj txubtxaj?

20 Ka ma nbinchaye il, ¿titzun mya baꞌn in nbinchaꞌne tiꞌja tuꞌn jlu, aya xkꞌukil cye xjal? ¿Tikuꞌn ma chin oc tkꞌoꞌna ic tzaꞌn jun aj kꞌoj tuꞌn toc tzokpaja wiꞌje? Baka in chin labte tiꞌja.

21 ¿Tikuꞌn mintiꞌ in cub tnajsaꞌna wile? ¿Tikuꞌn mintiꞌ in cub tnajsaꞌna aju mya baꞌn o nbinchaye? Porque chꞌix ncyime; oc cjyola wiꞌje, ex mi aꞌltl kine.