3 Ate Dios aju at tipumal tuꞌn tbant tcyakil tuꞌn mlay baj tmeltzꞌuꞌn aju tzꞌaklxix ex aju jikun tiꞌj.

4 Malo che binchan ke tcꞌwaꞌla il twitz Dios, tuꞌntzun jlu ma tzaj cycastiw tuꞌn.

5 Ka ma txi tkanina onbil te Dios aju at tipumal tuꞌn tbant tcyakil tuꞌn, ex ka ma txi tkanina te tuꞌn ttzaj kꞌakꞌan tcꞌuꞌj tiꞌja,

6 ka mintiꞌ tila ex ka ma tbinchaya aju tzꞌaklxix, cꞌoquel cwentina tuꞌn ex ctzalajela juntl maj tuj tjaya ex tiꞌj tcyakilju at teya, ic tzaꞌn nej.

7 Aju tkꞌinumabla at nej myaxix nim, atzunju tzul kꞌoꞌn te tibajxi, nimxix wen.

8 Kaninxa cye ke ojtxi xjal, xnakꞌtzam tiba tiꞌj cyojtzkibl cyman.

9 Atzun ke, ma cꞌitzke koꞌ ex mintiꞌ chꞌin baꞌn kuꞌn; aju kankꞌibl tzalu twitz txꞌotxꞌ ic tten ic tzaꞌn jun xlecun.

10 Pero ke ojtxi xjal jacu che yolin tucꞌila, ex jacu tzaj cykꞌoꞌn nimcu xnakꞌtzbil teya.

11 Aju ajlaj ex aju tkan chum oꞌcx in che chꞌiy jatum at nim aꞌ;

12 masque icju, pero chaꞌxtok ex naꞌnxtok cyjaw txꞌemit, nej in tzkij cywitz mastl cꞌul.

13 Icxtzun in baj cyiꞌj ke xjal nnicꞌ tnaꞌl Dios cyuꞌn; mintiꞌ jatum tuꞌn toc keꞌ cycꞌuꞌj;

14 jatum nnoꞌc keꞌ cycꞌuꞌj mintiꞌ tipun, ic tzaꞌn jun twitz nokꞌ, ex ic tzaꞌn jun tchemaj xin.

15 Ka ma che oc kꞌejeꞌ tiꞌj tchemaj xin, mlayx tipaꞌ tuꞌn miꞌn tcub lakj; ka ma t-xi cykꞌoꞌn cyalil tibaj tchemaj xin, mlayx xcyeꞌ tjakꞌ cyalil.

16 Ke xjal mya baꞌn, ic cyten ic tzaꞌn chaꞌx cꞌul tcub tiꞌj kꞌij in tzaj chꞌiy cyxol tcyakil tkan awal;

17 nim tlocꞌ in xi bet cyxol abj ex in che baj tzyet ke abj tuꞌn tlocꞌ,

18 pero ka at jun ma jaw bakonte te jatum tcub, mi aꞌl jun jacu tzꞌel tnicꞌ tiꞌj ka attok jun cꞌul o cub ten tuj lugar lu.

19 Cyjaꞌtzun tten in baj tzkij, ex jatum otok cub ten in tzaj pokꞌl mastl cꞌul te t-xel.

20 Mintiꞌ in cyaj tcolin Dios aju xjal mintiꞌ tpaltil, ex mintiꞌ in onin cyiꞌj ke xjal mya baꞌn.

21 Cjawil tzeꞌna juntl maj tuꞌn Dios ex cjawil schꞌina tuꞌn tzalajbil.

22 Atzun ke aj kꞌoj tiꞌja ctzajel cychꞌixwi, ex cbel xitj cyja ke xjal mya baꞌn.