3 Ka at jun xjal taj tzꞌoc ten yolil tucꞌil Dios tuꞌn tclonte tib, cyxol jun mil tyol Dios mi jun jacu tzakꞌwet tuꞌn.

4 Ate Dios maꞌxix tipumal ex nimxix tnabl, ¿alcye jun jacu cub twaban tib twitz ex jacu tzokpaj?

5 Tuꞌn tkꞌoj Dios in che tzaj yucch ke witz; in che cub t-xitun ex mintiꞌ baꞌn cyuꞌn alcye otok yucunte cye.

6 Tuꞌn Dios in tzaj luꞌlun txꞌotxꞌ ex in che baj yucch ke tkꞌukbil tuꞌn.

7 Ka ma tma Dios tuꞌn mi tjawil kꞌij, ax mlay jawil, ex ka ma tma cye cheꞌw tuꞌn mi tcꞌant cyspicꞌumal, ax mlay che cꞌant.

8 Mi jun onin tiꞌj tej t-xi tlicꞌpuꞌn cyaꞌj ex in bet tibaj mar in pulin wen.

9 Ate baj binchante ke cheꞌw tuj cꞌlojin: Jun cꞌloj Osa Mayor cybi, juntl cꞌloj Orión cybi ex juntl cꞌloj Pléyades cybi, ex jun cꞌloj cheꞌw ateꞌ tuj tnayaj kꞌij.

10 Nimxix tbinchben Dios in bant maꞌxix t-xilen, ex mi aꞌl jun jacu tzꞌel tnicꞌ tiꞌj.

11 Ka ma tzꞌex Dios nwitze mlay wile; cꞌicꞌel tacl wiꞌje ex mlay nnaꞌye.

12 Ka at jun tiꞌxti nneꞌl tetzan, ¿alcye jun jacu tzꞌoc mayonte te tiꞌj? ¿Alcye jun jacu txi kanin te: ¿Ti in tbinchaꞌna, chiwt?

13 Ka in tzaj tkꞌoj Dios mlayx chewix tcꞌuꞌj jurat naj; twitz cbel cymansin cyib keju mojl cyyol tucꞌil Rahab, aju nintz txcup at tuj mar.

14 ¿Tzaꞌntzun tten tuꞌn tcnet yol wuꞌne tuꞌn taj nmojtzaꞌne Dios?

15 Masque mintiꞌ in bant il wuꞌne twitz Dios, pero mlay bant ttzakꞌwet wuꞌne; ate Dios jwes wiꞌje, oꞌcx jacu txi nkanine tuꞌn ttzaj kꞌakꞌan tcꞌuꞌj wiꞌje.

16 Ka ma tzaj ntxcoꞌne ex ka ma tzaj ttziyan tuꞌn tul, pero mlay txi nnimane ka jacu che tzaj tbiꞌn ke nyole.

17 Jaculo tzaj t-samaꞌn cykꞌikꞌ jbal tuꞌn ncꞌixbisanjtze tuꞌn, ex jaculo tzꞌoc tkꞌoꞌn mas ẍil wiꞌje nokx gan.

18 Jaculo tzaj nimxix bis wiꞌje tuꞌn, ex mlaylo tzaj tkꞌoꞌn ambil tuꞌn tjatz nxewe.

19 Ka ma ko yolin tiꞌj alcye mas at tipumal, ax toc ate Dios at mas tipumal; ka kajbil tuꞌn toc tuj xjel, ¿alcye ctzajel txconte te tuꞌn tul?

20 Masque mintiꞌ wile, pero ax ntziꞌye ckꞌmalte ka at wile ex mya baꞌn kine.

21 Masque mintiꞌ wile, pero mintiꞌ tajben jlu weye; ma baj nganiye tuꞌn wankꞌine.

22 Tcyakil junx taꞌ. Atzun jlu ximan wuꞌne: In che naj tuꞌn Dios ke xjal at cyil, ax icx keju mintiꞌ cyil.

23 Ka minaben ma tzaj jun cꞌixbisabl cyibaj xjal ex ka ma che cyim keju mintiꞌ cyil, nok in jaw tzeꞌn Dios tiꞌj ju nnicꞌx cyuꞌn.

24 In cyaj tkꞌoꞌn ke nasyon tuj cykꞌab xjal mya nimal Dios ke, ex nnoꞌc tmaksiꞌn cywitz ke jwes. Ka mya tuꞌn Dios in bant jlu, ¿al uꞌntzun?

25 Aju nkꞌijlalile ojkelxix tel, ex naꞌnx toc nqueꞌyine aju ttxubtxajal.

26 In ojkelanxix tel, ic tzaꞌn ke barc cyuw che bet, ic tzaꞌn jun tꞌiw in xi lipan tiꞌj tcanb tuꞌn ttzyet tuꞌn.

27 Ka ma cub nximane tuꞌn ticꞌ tnaꞌl nbise ex tuꞌn t-xi nyecꞌune nwitze in tzalaj,

28 tcyakil cꞌixcꞌoj nnaꞌjtz meltzꞌaj secꞌpul weye, porque baꞌn wuꞌne mlay txi tniman Dios ka mintiꞌ wile.

29 Katzun at wile tuj twitz Dios, nokxlo gan tuꞌn tjaw wipuman wibe.

30 Masque tzꞌel ntxꞌjoꞌne nkꞌabe tuꞌn jabón, ex masque tzꞌel njakuꞌne tuꞌn taꞌl tzaꞌj,

31 jaculo chinx t-xoꞌn Dios tuj soban, ex axpelo nxbalune jacu tzꞌel icꞌunte weye.

32 Nokwit xjal te Dios ic tzaꞌnx kine, jacwitlo tzꞌaj ntzakꞌwene, ex jacwitlo txi nmaꞌne te tuꞌn kxiꞌye tucꞌil twitz jun jwes tuꞌn t-xi binchaꞌn kiꞌje.

33 Nokwit at jun jwes kxole tuꞌn tcawin kibaje kcabile,

34 tuꞌn tmayet Dios tuꞌn, tuꞌn miꞌn cucx tcub ncastiwoye tuꞌn, ex tuꞌn miꞌn cucx ttzaj tkꞌoꞌn xobajil wiꞌje,

35 entons jaculo chin yoline tucꞌil mintiꞌ nxobile, ex jaculo txi nmaꞌne te ka mintiꞌ wile.