2 Aya Nman Dios, miꞌn cub tkꞌoꞌna nsentense, kꞌmantza alcyetzun mya baꞌn ma nbinchaye.

3 Aya chꞌisal weye, ¿baꞌnpetzun tuꞌn nyajlanjtze tuꞌna ex tuꞌn wel ticꞌuna, ex atzun tiꞌj cyximbetz xjal mya baꞌn tuꞌn tjaw tzalaja?

4 ¿Baka junx queꞌybil cye ke tiꞌxti tuj twitza ic tzaꞌn tuj cywitz ke xjal?

5 ¿Baka junx taꞌ tuj tkꞌija ic tzaꞌn tuj tkꞌij jun xjal in cyim?

6 ¿Tikuꞌntzun in jyona tiꞌj npaltile ex wile;

7 masque baꞌn tuꞌna mintiꞌ wile, ex mi aꞌl jun jacu clonte weye tuj tkꞌaba?

8 Aya o binchante weye tuꞌnx tkꞌaba, ex atzun jaꞌlo tajbila tuꞌn nnaje tuꞌna.

9 Naꞌntza tiꞌj txꞌotxꞌ in cub tbinchaꞌna: ¿Maj chin cꞌoqueltzun tkꞌoꞌna juntl maj te kuk?

10 Tbinchaya nximlale ic tzaꞌn in bant cyes tiꞌj lech oc tbaj ttzyun tib;

11 tzaj tkꞌoꞌna nchibjale ex ntzꞌumile, baj tmojbaꞌna ke nbakile ex ke nbotxꞌile;

12 tzaj tkꞌoꞌna nchwinklale, in chin tcꞌujlaꞌna, ex nok tuꞌnju cwentin kine tuꞌna, cucx itzꞌx kine jaꞌlo.

13 Atzun jaꞌlo ma tzꞌel nnicꞌe tiꞌj, tuj tanmiya at jun t-ximbetza tuj ewaj taꞌ:

14 toc tcwenta wiꞌje, mya yajcu nbinchaye il tuꞌntzun tcub tkꞌoꞌna nsentense tiꞌj wile.

15 Ka at wile becꞌbil nwitze; ex ka mintiꞌ wile ax icx mlay chin jaw tzalaje tuꞌn jlu; ma tzaj nchꞌixwiye ex ma tzaj nim nbise tuꞌna.

16 Ka ma jaw wiꞌn wipune tuꞌn nyoline, ctzajela wiꞌje ic tzaꞌn jun balun tuꞌn ntzyete, ex in tbinchaꞌna tbinchbena nim tipumal tuꞌn nnaje tuꞌna.

17 Cucx in che pon tiꞌna ke testiw twitza kꞌmalte mya baꞌn wiꞌje; aju tkꞌoja wiꞌje cucx tchꞌiy; mintiꞌ in xi tcolina tuꞌn toc tzokpaja wiꞌje ic tzaꞌn txkan soldad.

18 ¿Tikuꞌn tzaj tkꞌoꞌna ambil tuꞌn wul itzꞌje? Biꞌxwit in cyime ex mi junwtlo oc queꞌyinte weye.

19 In tzajxwitloye tuj talbil ntxuꞌye ex biꞌxwitlo in cuꞌx makuꞌne, icwitlo tzaꞌn mintiꞌ otok chin tene twitz txꞌotxꞌ.

20 Tuꞌnju chꞌin tuj nkꞌije paꞌmil tiba wiꞌje. Chin tkꞌoncja tuꞌn ntene chꞌin tuj tzalajbil,

21 naꞌnxtok tuꞌn nxiꞌye tuj nbeye jatum mlay chin ajtz meltzꞌaje, tuj ju najbil jatum mintiꞌ spicꞌun, oꞌcx klolj at,

22 tuj najbil oꞌcx kxopin at tuj ex mintiꞌ ttxolil, jatum junx taꞌ spicꞌun tucꞌil klolj, chi Job.