3 ¿Chipetzuna ka tuꞌnju nim tyola miꞌn ko kꞌajte ex ka mi aꞌl jun jacu pon t-xcyeꞌ tuꞌn ttzakꞌwente tyola te xmaybil?

4 In tmaꞌna ka tuj tumelxix taꞌ t-xnakꞌtzbila, ex tuꞌnxa nnoꞌc tkꞌon tiba mintiꞌ tila twitz Dios.

5 Nokwit a Dios yolin tuꞌn t-xi tzakꞌweꞌna tuꞌn,

6 jacwitlo txi xnakꞌtzaꞌna tuꞌn jatum tzajni ju ojtzkibl aju cyuwxix tuꞌn tel knicꞌ tiꞌj. Jacutzun tzꞌel tnicꞌa tiꞌj, mintiꞌ ma cub tkꞌoꞌn Dios tcastiwoya ic tzaꞌnx ju tila.

7 ¿Chipetzuna ka jacu tzꞌel tnicꞌa tiꞌj tcyakilju at tuj t-ximbetz Dios? ¿Baꞌnpe tuꞌna jatum in pon baj tipumal?

8 Mas maꞌ t-ximbetz Dios ic tzaꞌn cyaꞌj lekꞌch tjaw, ex mas maꞌ t-xeꞌ ic tzaꞌn jul jalo ponin t-xeꞌ, ¿tzaꞌntzun tten jacu tzꞌel tnicꞌa tiꞌj?

9 Mas maꞌ twitz ic tzaꞌn txꞌotxꞌ ex ic tzaꞌn mar.

10 Ka nnuꞌlcu Dios ex ka in tzyetcuya tuꞌn tuꞌn toca tuj xjel, ¿alcye baꞌn tmayonte te Dios tiꞌj?

11 Baꞌn tuꞌn Dios alcye ke xjal nicꞌal yol; ex in tqueꞌyin aju mya baꞌn in cybinchaꞌn, ¿katzun tuj tnabla mintiꞌ toc tcwent Dios tiꞌj?

12 Mlay cub tmansin tib bur te tjakꞌ cꞌul. Icxtzunte xjal mintiꞌ tnabl, mlayx tzꞌoc tnabl.

13 Ximancuya tuꞌn tbeta tuj tumelxix, ex cubsantzuna twitz Dios.

14 Aju il in tbinchaꞌna, colincja, miꞌn txi tkꞌoꞌna ambil tuꞌn tten mya baꞌn tuj tjaya.

15 Cyjaꞌtzun jacu jaw tzalaja ex jacu cyaj tena mintiꞌtl tila, ex cteltzuna tuj txubtxaj ex mintiꞌ t-xobila.

16 Jacu tzicꞌ tnaꞌl tuꞌna aju cꞌixcꞌoj toc tiꞌja; cꞌicꞌel tnaꞌl tuꞌna ic tzaꞌn jun aꞌ in bet.

17 Mas ckoptzꞌajel tchwinklala ic tzaꞌn t-spicꞌumal kꞌij te chilcukꞌij, atzunju konicꞌan kloljxix ic cꞌoquel ic tzaꞌn in jawil kꞌij.

18 Oc ckebel tcꞌuꞌja ex cꞌankꞌila mintiꞌ t-xobila; ctala tuj txubtxaj porque a Dios cwentil teya.

19 Mi aꞌl jun cꞌoquel secꞌpunte teya oc tojlana. Nimcu che ul kanil xtalbil teya.

20 Atzun ke xjal mya baꞌn, che jyol tiꞌj jun onbil pero nokx gan; mlay cnet cyuꞌn jun lugar jatum tuꞌn tocx cyclon cyib, oꞌcx in che ayon tiꞌj tuꞌn cycyim, chi Zofar baj tmaꞌn.