3 Pero ax icx weye at nnable, ex mya mas chꞌin nnable cywitze. ¿Alcye jun mintiꞌ baꞌn tcyakil jlu tuꞌn?

4 Nej in chin cubsane twitz Dios ex in chin tzaj tbiꞌn, atzun jaꞌlo in che tzeꞌn ke wamiwoye wiꞌje masque mintiꞌ wile ex mintiꞌ npaltile.

5 Aju xjal baꞌn taꞌ nneꞌl ticꞌun aju myaxix baꞌn taꞌ; mintiꞌ tbis tiꞌj tuꞌn t-xi tlamoꞌn aju cyjaꞌtok ticꞌ tzꞌak.

6 Ke xjal elekꞌ at tzalajbil tuj cyja, keju cycꞌiꞌ che niman Dios txubtxaj in che ankꞌin, aju cyipumal nnoꞌc cykꞌoꞌn te cydios.

7 Kaninxa cye txcup ex ka cye chyuꞌj; jacu tzaj xnakꞌtzaꞌna cyuꞌn.

8 Ax icx te txꞌotxꞌ ex ke cyiẍ ateꞌ tuj mar, baꞌn t-xi tkanina cye tuꞌn ttzaj xnakꞌtzaꞌna cyuꞌn.

9 ¿Atpe jun naꞌnx tbinte ka tuꞌn tkꞌab Dios o bant tcyakil?

10 Tuj tkꞌab Dios taꞌ cychwinklal cycyakil keju itzꞌ twitz txꞌotxꞌ, ax icx cyanmi cycyakil xjal.

11 Aju ẍcyinbaj baꞌn tuꞌn alcye t-xilen junjun yol, ic tzaꞌn kcꞌoꞌn in tnaꞌn ke tcꞌocꞌjal.

12 Ke tij xjal at cynabl; ax ju cyabkꞌiyil ma tzaj kꞌonte cynabl.

13 Pero ate Dios at nim tnabl ex at nim tipumal, in cub t-ximan alcyechak taj, ex in japun tuꞌn. 14 Aju in cub t-xitun Dios, mi aꞌl jun jacu jaw binchante juntl maj, aju ma tzꞌocx tjpuꞌn Dios, mi aꞌl jun jacu tzokpinte te.

15 Ka ma weꞌ jbal tuꞌn, tcyakil ctzkijel; ka ma tzaj tzokpaj jbal tuꞌn, cnajel txꞌotxꞌ.

16 Tuꞌn tipumal cbel tiꞌj tcyakil. Tuj tcwent Dios taꞌ ju xjal in cub sbuꞌn tucꞌix ju in sbun.

17 Nneꞌl tiꞌn cynabl ke xjal kꞌol nabl ex in tzpet cynabl ke cawil tuꞌn.

18 Nneꞌl tiꞌn cyoclen ke rey ex in cheꞌx tiꞌn pres.

19 Nneꞌl tiꞌn cyoclen ke pal ex keju nim cyoclen.

20 Ke kꞌol nabl, akeju kꞌuklxix cycꞌuꞌj xjal cyiꞌj, in che cyaj ten mintiꞌ cyyol, ex nneꞌl tiꞌn cyojtzkibl ke tij xjal.

21 Nneꞌl ticꞌun ke xjal nim cyoclen, ex nneꞌl tiꞌn cyipun keju at cyipun.

22 In tzaj ttxꞌolbaꞌn aju cyximbetz xjal at tuj ewaj ex in cub tkꞌoꞌn tuj spicꞌun aju attok tuj klolj.

23 In xi tkꞌoꞌn cyipun ke nasyon ex in che cub t-xitun, in che el t-sputun ex in che oc tchmoꞌn juntl maj.

24 Nneꞌl tiꞌn cynabl ke nejenel cyuj ke tnam ex in cheꞌx naj tuꞌn tuj jun lugar mintiꞌ cynajbil xjal tuj, mintiꞌ be tuꞌn tcnet cyuꞌn jatum tuꞌn cyxiꞌ,

25 jatum nok xmacan in che bet tuj klolj, nok in tacpajeꞌ cyicꞌ ic tzaꞌn cꞌal kꞌeꞌn.