2 Aju cyeye baꞌn cyuꞌn, ax icx weye baꞌn wuꞌne; ex mya mas chꞌin nnable cywitze.

3 Pero wajbile tuꞌn nyoline tucꞌil Dios aju at tipumal tuꞌn tbant tcyakil tuꞌn, wajbile tuꞌn nyoline tucꞌil tuꞌn nbinteye tikuꞌn ma tzaj jlu wiꞌje.

4 Cyeye nok in jaw cynicꞌane yol; ic cytene ic tzaꞌn jun doctor mintiꞌ jun xjal in banix tuꞌn.

5 Nokwit baꞌn tuꞌn miꞌn cykꞌajte, tuꞌn jlu jaculo che oc kꞌoꞌne cyuꞌn xjal at cynable.

6 Cybinchame xtalbil, cybintze, cykꞌoꞌnc cywiꞌye tiꞌj yol cxel nmane te ncolbil wibe.

7 ¿Che chipetzune ka in che coline tiꞌj Dios tuꞌnju nicꞌaj yol in cymaꞌne, ex ka in che ajbene te Dios tuꞌn cyyole te sbubl?

8 ¿Cyajpeye tuꞌn cyonine tiꞌj Dios ex tuꞌn cycoline tiꞌj?

9 ¿Ti jacu baj ka tajbil Dios tzicꞌ twitz tuj cyanmiye? ¿Jacupe cub cysbuꞌne Dios ic tzaꞌn jun xjal?

10 Ka nok tten cyuꞌne cyajbile tuꞌn cyonine tiꞌj, cꞌoquel tmaꞌn Dios tibaj cywitze.

11 Oc che secꞌpajtele tuꞌn tajwalil Dios maꞌxix ex ctzajel cyxobile tuꞌn.

12 Tcyakil cyyole in cymaꞌne mintiꞌ tajben, junx taꞌ ic tzaꞌn tzaꞌj; ex aju cycolbil cyibe mer ic tzaꞌn jun muro txꞌotxꞌ mintiꞌ tipun.

13 Jaꞌlo miꞌn che kꞌajte oc chin yolile ka ma tzaj nok alcyex wiꞌje.

14 Cxel woyin nchwinklale tuꞌn ncyime.

15 Masque chin cub byoꞌne tuꞌn Dios, oꞌcx chin ayole tiꞌj, oꞌcx waje tuꞌn toc nmaꞌne ncolbil wibe tecu.

16 Mya yajcu atzun taꞌ ju colbil weye, porque jun xjal mya baꞌn mlayx tzꞌocx max twitz Dios.

17 Cybincuye, cykꞌoꞌnc cywiꞌye tiꞌj tcyakilju cxel nchicꞌbaꞌne.

18 Cxel nmaꞌne ju colbil wibe, ex baꞌn wuꞌne ax toc jlu.

19 Ka at jun ma tzꞌel tnicꞌ tiꞌj ka at wile, jacu miꞌn chin kꞌajte ex jacu chin cyime.

20 Kꞌontza oꞌcx cabe nkanbetze, aya Nman Dios, ex mlay cub wewan wibe twitza.

21 Miꞌn cucx ncub tcꞌixbisaꞌna, ex miꞌn tzaj tkꞌoꞌna nimxix t-xobil wiꞌje.

22 Chin ttxconxa ex cxel ntzakꞌweꞌne; ex ka akine tuꞌn nyoline nej, atzun teya tuꞌn ttzaj ttzakꞌweꞌna.

23 Kꞌmantza alcyetzun ke wile ex npaltile. ¿Alcyetzun ke mya baꞌn o che bant wuꞌne?

24 ¿Tikuꞌntzun nneꞌl tewan tiba nwitze? ¿Tikuꞌn in tbinchaꞌna wiꞌje ic tzaꞌn tiꞌj jun aj kꞌoj?

25 Ic ntene ic tzaꞌn jun t-xak tzeꞌ ikan tuꞌn cykꞌikꞌ, ¿tikuꞌn tajbila tuꞌn nnaje? Ic ntene ic tzaꞌn tzkij chꞌim, ¿tikuꞌn nnoꞌc lpeꞌya wiꞌje tuꞌn ntzyete tuꞌna?

26 In cub tkꞌoꞌna ncastiwoye nimxix taꞌw, in tzaj tnaꞌna aju mya baꞌn o bant wuꞌne tuj ncuꞌxumale.

27 Nnoꞌc tcꞌaloꞌna nkane tuꞌn caden, toc twitza tiꞌj jatumchak in chin bete, ex toc twitza tiꞌj jatumchak tcublen nkane.

28 Niban tbaj kꞌay nximlale ic tzaꞌn jun tzeꞌ kꞌayni, ex ic tzaꞌn jun xbalun in baj tuꞌn pocꞌ, chi Job.