2 Ic tten ic tzaꞌn bech oc in pokꞌchaj, jurat naj in tzkij ex mintiꞌ in cyaj ten, ic tten ic tzaꞌn jun xlecun in cub naj.

3 ¿Maj tibajtzun xjal lu tcub twitza, Nman Dios, ex maj tibajxtzun taja tuꞌn tcub tkꞌoꞌna jun castiw?

4 ¿Baka at jun jacu bant tuꞌn tuꞌn toc te sak ka mya sak taꞌ tanmi? Mi jun.

5 Tuꞌna echamaj jteꞌ kꞌij tuꞌn tten jun xjal twitz txꞌotxꞌ. Biꞌx banimaj tuꞌna tuꞌn mi ticꞌ tibaj.

6 Kꞌiꞌn el twitza tiꞌj ex kꞌon cyaja tuj tzalajbil, kꞌon cyaja tuꞌn takꞌnan ic tzaꞌn jun akꞌnal xjal ex tuꞌn ttzalaj tiꞌj takꞌunben.

7 Oc tjaw txꞌemit jun tzeꞌ, atx tumlal tuꞌn ttzaj t-xul ex cucx jacu tzaj t-xul. 8 Masque otok tijin tlocꞌ ex otok kꞌuꞌchix ttronquil tuj txꞌotxꞌ,

9 pero oc tnaꞌnte tchewil aꞌ, ctzajel t-xul, ex che jletel tkꞌab ic tzaꞌn jun wiꞌ tal awal ma in chꞌiy;

10 atzunte xjal oc in cyim, biꞌx in naj te jumajx, ex oc tcyim, ¿jatum cpol?

11 Ic tzaꞌn aꞌ tuj mar ex ke nima, jacu biꞌx che aj tzkij,

12 cyjaꞌxtzun tten xjal, ax cyjel ten te jumajx tuj mukbil ex mlay jaw weꞌtl; ic tzaꞌnx cyaꞌj cucx ctel te jumajx, ex mlayx tzul tnabl xjal.

13 Nokwit jacu chinx tewana tuj cynajbil cyimni, acux in baj tkꞌoja ex biꞌx tuꞌn ttzaj tmaꞌna alcye jun kꞌij tuꞌn wule tiꞌj tcꞌuꞌja.

14 Ka ma cyim jun xjal, ¿cꞌankꞌilpelo juntl maj? Jaculo chin ayone tiꞌj nok nicꞌpunxi tyemp wajbeble tuꞌn tul canun ju tzokpibl weye.

15 Jaculo chin txquete tuꞌna ex jaculo txi ntzakꞌweꞌne, ex jaculo chin tzaj t-xtalina, porque takꞌunbenx tkꞌaba kine.

16 Ka toc tcwenta wiꞌje jaꞌlo tzaꞌn in chin bete, te tibajxi mlay tzꞌoc tkꞌoꞌn tcwenta tiꞌj wile.

17 Biꞌxlo jacu tzicꞌ tnaꞌl npaltile tuꞌna, ex jaculo cub tnajsaꞌna nbinchbene mya baꞌn.

18 Icxpe ke witz cyjaꞌ cybaj xitj ex ke pic cyjaꞌ cyicꞌ chꞌexpuꞌn tuj cylugar.

19 Ic tzaꞌn aꞌ in baj tjakuꞌn tiꞌj abj ex aju jbal in xi tikan tkukil txꞌotxꞌ, cyjaꞌxtzun in baj naj tuꞌna aju in ayon xjal tiꞌj tuꞌn tjaw ankꞌin juntl maj.

20 In cub tiꞌj tuꞌna te jumajx ex biꞌx in naj, ex oc tcyim otok chꞌexpet tilbilal.

21 Ka ma tzꞌoc cyoclen ke tcꞌwaꞌl, mlay tbi; ex ka ma tzaj jun mya baꞌn cyiꞌj, ax mlay tbi.

22 Oꞌcx in tnaꞌn cꞌixcꞌoj tiꞌj tex t-ximlal ex aju yajbil in tzaj tiꞌjx.