3 mintiꞌ in tclon tib tuꞌn yol nokx gan ex tuꞌn yol mintiꞌ tajben.

4 Tuꞌn tyola mya tuj tumel mlay che nimantl xjal twitz Dios; ex mlay che naꞌntl Dios.

5 Tuꞌn t-ximbetza mya baꞌn in yolina icju, ex in ajben ju yol te sbubl tuꞌna.

6 Mya il tiꞌj tuꞌn t-xi nmaꞌne at tila, porque tuꞌnx ju yol in tmaꞌna in tchicꞌbana at tila.

7 ¿Maj in ximana tiꞌj ka aya tnejel xjal bant tuꞌn Dios twitz txꞌotxꞌ, ex ka mintiꞌtok ke witz ateꞌ tej tbanta tuꞌn Dios?

8 ¿Ope tena cyxol ke kꞌol nabl ttxlaj Dios, ex oꞌcxpe teya at tnabla twitz txꞌotxꞌ?

9 ¿Alcye baꞌn tuꞌna aju mintiꞌ baꞌn kuꞌne? ¿Alcye tzkiꞌn tuꞌna aju mintiꞌ tzkiꞌn kuꞌne?

10 Kxole at ke tij xjal wen, mas tij xjal ke twitz tmana.

11 ¿Maj chꞌin nneꞌla tuj twitza tuꞌnju ax Dios in kꞌukbante tcꞌuꞌja ex cheba in ko yoline teya?

12 ¿Tikuꞌn nok in txꞌaꞌl tiꞌj tcꞌuꞌja, ex tikuꞌn in che etz wacpaj ke tbakꞌ twitza tuꞌn tkꞌoja?

13 ¿Tikuꞌn in tzaj ttxꞌuꞌjila tiꞌj Dios ex nimxix tyola mya baꞌn in tmaꞌna tiꞌj?

14 Mintiꞌ jun xjal sak tuj tanmi ex mintiꞌwt tpaltil.

15 Milpe cyiꞌj ke t-anjel mintiꞌ nnoꞌc keꞌ tcꞌuꞌj, ex myaꞌlpe sak nneꞌl ju cyaꞌj tuj twitz,

16 pyortzun te xjal jumajx tzꞌil ex icꞌbil, in pon tcꞌuꞌj tiꞌj mya baꞌn ic tzaꞌn jun xjal in cꞌan aꞌ oc ttzaj txketleꞌn tiꞌj.

17 Chin tbintza, cxel nmaꞌne teya aju ma tzꞌel nnicꞌe tiꞌj,

18 aju o tzaj cytxꞌolbaꞌn keye ke xjal at cynabl. O tzꞌel cycanoꞌn cyiꞌj ke cyxeꞌchel,

19 akeju oꞌcxcu cye xi kꞌoꞌn txꞌotxꞌ, ex mintiꞌ baj cysmon cyib cyucꞌil ke stranjer xjal.

20 Tuj tcyakil tankꞌibl xjal mya baꞌn, nim yajbil in tzaj tiꞌj. Aju xjal in yajlan cye mastl, mya maꞌ tuj tkꞌij.

21 Biꞌx in secꞌpaj tuꞌnju tkꞌajkꞌajel in tbiꞌn; aju kꞌij mas baꞌn taꞌ tnaꞌn, atzun kꞌij in che oc tzokpaj ke elekꞌ tiꞌj.

22 Mintiꞌ tumel tuꞌn ttzokpaj tuj klolj; banin tten jun spad tiꞌj tuꞌn tcub byoꞌn.

23 Cꞌajbel t-ximlal te cychiꞌ cꞌutz; biꞌn tuꞌn mlay tzicꞌx tiꞌj tuꞌn tnaj.

24 Oc ttzaj klolj nim cjawil xob, ctzajel nim tbis ex ctzajel baj tcꞌuꞌj, ic cyten jlu ic tzaꞌn jun rey banin tten tuꞌn toc tzokpaj kꞌojlel.

25 Atzun jlu in baj tiꞌj ju xjal in jaw tiꞌn tib tiꞌj Dios, ex in jaw tniman tib twitz Dios aju at tipumal tuꞌn tbant tcyakil tuꞌn,

26 nnoꞌc tzokpaj tiꞌj Dios, ex tocx jun makbil tuj tkꞌab te tcolbil tib.

27 Puro gord ke tkꞌoꞌtx ax icx tcꞌuꞌj.

28 Ke tnam jatum najl che bel xitj; cyjel cycolin xjal cyja ex nok tuj byujin che cyjel ten ke ttxꞌakan.

29 Mlay tzꞌoc kꞌinun te elaꞌ kꞌij, ex mlay chmet tkꞌinumabl.

30 Mlay tzokpaj tuj klolj. Ic cꞌoquel ic tzaꞌn jun awal in tzꞌeꞌy t-xul tuꞌn kꞌakꞌ ex in xi ikan t-xmacal tuꞌn cykꞌikꞌ.

31 Miꞌn tzꞌoc keꞌ tcꞌuꞌj tiꞌj ju nokx gan, katzun ma keꞌ tcꞌuꞌj tiꞌj, axte cbel sbuꞌn.

32 Ic cꞌoquel ic tzaꞌn jun tzeꞌ naꞌnxtok tpon tkꞌijlalil cbel tzkij tkꞌab ex mlay tzaj t-xul.

33 Ic tten ic tzaꞌn jun tkꞌab uva mlay kꞌanax twitz, ic tzaꞌn tzeꞌ olivo nneꞌl tzꞌak t-xmacal.

34 Ke xjal mya baꞌn mlay tzaj cyiyjil, ex cbel tzꞌeꞌy cyja tuꞌn kꞌakꞌ tuꞌnju otok che kꞌinumax tuꞌn pwak mya tuj tumel nneꞌl cykanin cye xjal.

35 Ke xjal lu in cub cyximan tuꞌn cybinchante mya baꞌn, ex atzun in bant cyuꞌn. Ex nojni tuj cyanmi tuꞌn sbubl.